ايتىس اقىندارى مەن جىرشى, تەرمەشىلەردىڭ حالىقارالىق وداعىنىڭ وبلىستىق فيليالى توراعاسى باۋىرجان حاليوللانىڭ ايتۋىنشا, ون كۇننەن سوڭ ورال قالاسىندا رەسپۋبليكالىق الامان وتكىزۋ جوسپارلانعان ەكەن.
«بيىل ايتىستىڭ قارا نارى ءجۇرسىن اعامىز مەرەيلى 75 جاسقا تولعالى وتىر. ءومىر مەن ءولىمنىڭ ورتاسىندا جاتىپ, ەل تىلەۋىنىڭ ارقاسىندا ارامىزعا قوسىلعان ارداقتى اعامىزدىڭ تويىن اقجايىق جاعاسىنان باستاساق دەگەن وي بولدى. بۇل ۇسىنىسىمدى قولداعان وبلىس باسشىلارىنا, دەمەۋشىلەرگە راحمەت», دەيدى باۋىرجان ەرگەن ۇلى.
2026 جىلدىڭ العاشقى ءسوز دوداسىنا وسىناۋ حالىق ونەرىنىڭ شىراقشىسىنداي بولىپ, قازاق ايتىسىنىڭ جۇگىن قىرىق جىل كوتەرگەن ءجۇرسىن ەرمان اقجايىق وڭىرىنە ارنايى كەلدى. قايراتكەردى وبلىس باسشىسى ناريمان تورەعاليەۆ ءوزى قابىلداپ, قۇرمەت كورسەتتى. وبلىستىڭ باۋىرجان شيرمەدين ۇلى, تالعات مىقي, اينابەك بيسەنعاليەۆ ت.ب. سىندى 12 اقىنى قاتىسقان ايتىسقا بەلگىلى كاسىپكەر ماديار قۇرمانعاليەۆ دەمەۋشى بولدى.
قازىلار القاسىن ءجۇرسىن ەرماننىڭ ءوزى باسقارىپ, جەرگىلىكتى اقىن-جازۋشىلار داريعا مۇشتانوۆا, عايساعالي سەيتاق, باۋىرجان عۇبايدۋللين, باۋىرجان حاليوللا ساراپشىلىق ەتتى.
ايتىستىڭ شارىقتاۋ شەگى − «التىن دومبىرانىڭ» ءۇش دۇركىن جەڭىمپازى مۇحتار نيازوۆ پەن «التىن دومبىرا» مەن «اسىل دومبىرانىڭ» جالعىز يەگەرى جانسايا مۋسينانىڭ اراسىنداعى جەكپە-جەك ايتىس بولدى. مەتسەنات ماديار قۇرمانعاليەۆ ەكى اقىنعا دا ارعىماق مىنگىزدى.
ال وبلىستىق ءسوز سايىسىنىڭ ناتيجەسىندە باس جۇلدە تالعات مىقيعا بۇيىرىپ, 1 ملن تەڭگەگە يە بولدى. ءبىرىنشى ورىنعا – ورىنبەك مەڭدىقۇلوۆ, ءىى ورىنعا – مۇرادىم ميرلانوۆ پەن ەلدار يحسانوۆ, ءىىى ورىنعا – اينابەك بيسەنعاليەۆ, مەيىرمان شاكەنوۆ, رايىمبەك وتەپوۆ, دانيار نىسانعاليەۆ لايىق دەپ تانىلدى. باۋىرجان شيرمەدين ۇلى – ءجۇرسىن ەرمان اتىنداعى ارنايى سىيلىق يەسى اتانسا, جارقىنبەك شىنتاەۆ, بەكبولات قالەنوۆ جانە ءادىل احمەتوۆ شابىتتاندىرۋ سىيلىعىنا يە بولدى.
