كوشپەلى وتىرىس بارىسىندا «AMANAT» پارتياسىنىڭ «حالىقپەن بىرگە!» سايلاۋالدى باعدارلاماسىن ىسكە اسىرۋ جونىندەگى 2023-2027 جىلدارعا ارنالعان ۇلىتاۋ وبلىسىنىڭ جول كارتاسى اياسىندا «جەزقازعان قالالىق حالىقتار دوستىعى مەن مادەنيەت ءۇيى» عيماراتىنا جۇرگىزىلىپ جاتقان كۇردەلى جوندەۋ جۇمىستارىنا پارتيالىق باقىلاۋ جۇرگىزىلدى.
ءىس-شاراعا پارتيالىق باقىلاۋ كوميسسياسىنىڭ توراعاسى, وبلىستىق ءماسليحات دەپۋتاتى ەرجان توقىمباەۆ, «Miras» كەڭەسىنىڭ توراعاسى, وبلىستىق ءماسليحات دەپۋتاتى دوسحان ساكەن جانە كەڭەس مۇشەلەرى قاتىسىپ, نىساندا اتقارىلىپ جاتقان جۇمىستارمەن تانىسىپ, مەردىگەر كومپانيا وكىلدەرىنىڭ ەسەبىن تىڭدادى.
سونداي-اق جەزقازعان قالاسى اكىمىنىڭ ورىنباسارى بەرىك ابەن مادەنيەت نىسانىندا اتقارىلىپ جاتقان جۇمىستار جونىندە اقپارات بەردى.
مەملەكەتتىك ساتىپ الۋ كونكۋرسىنىڭ قورىتىندىسى بويىنشا «ەڭبەك» جاۋاپكەرشىلىگى شەكتەۋلى سەرىكتەستىگى جەڭىمپاز بولىپ تانىلىپ, جالپى قۇنى 1 030 ميلليون تەڭگەنى قۇرايتىن وتپەلى كەلىسىمشارت جاسالدى.
وتكەن جىلى كۇردەلى جوندەۋ جۇمىستارىن جۇزەگە اسىرۋ ءۇشىن جەرگىلىكتى بيۋدجەتتەن 300 ميلليون تەڭگە ءبولىندى.
2026 جىلعا جەرگىلىكتى بيۋدجەتتەن 730 ميلليون تەڭگە قاراجات قاراستىرىلعان.
بۇگىنگى كۇنگە دەيىن «حالىقتار دوستىعى مەن مادەنيەتى ءۇيى» عيماراتىندا كۇردەلى جوندەۋ جۇمىسى اياسىندا بىرقاتار جۇمىس اتقارىلدى. اتاپ ايتقاندا, دەمونتاج جانە سىلاق جۇمىستارى جۇرگىزىلىپ, ەدەندەرگە بەتون قۇيىلدى. سونىمەن قاتار ەلەكتر جۇيەلەرى جاڭارتىلىپ, عيماراتتىڭ تەرەزەلەرى مەن جىلۋ رادياتورلارى اۋىستىرىلدى. سۋ جەلىلەرى, جىلۋ جانە كارىز جۇيەلەرى تارتىلىپ, جەلدەتۋ جۇيەسى ورناتىلدى.
عيماراتتىڭ كۇردەلى جوندەۋ جۇمىسى جاز ايىنا دەيىن اياقتالادى دەپ جوسپارلانىپ وتىر.
ۇلىتاۋ وبلىسىندا «زاڭ مەن ءتارتىپ» قاعيداتى اياسىندا سەمينار ءوتتى
