العا قويىلعان مىندەتتەردى ەسكەرە وتىرىپ, وتكەن جىلى 100 مىڭ شارشى شاقىرىم جالپى الاڭدا 1:50.000 ماسشتابتى گەولوگيالىق ءتۇسىرىلىم جۇرگىزۋگە 20 جوبا ازىرلەندى, ودان كەيىن جىل سايىن 30 مىڭ شارشى شاقىرىمدىق اۋماقتار ورايىمەن قامتىلدى. سالىستىرۋ ءۇشىن ايتساق, كەڭەس زامانىندا جاسالعان كارتانىڭ بۇرىنعى ماسشتابى 1:200.000 ەدى.
تاياۋداعى ءۇش جىلدا اتالعان 20 جوبانى جۇزەگە اسىرۋعا, سونداي-اق از زەرتتەلگەن شوگىندى باسسەيندەر اۋماعىندا سەيسميكالىق بارلاۋ جۇمىستارىن جۇرگىزۋگە, قازىرگى زامانعى گەولوگيالىق ينفراقۇرىلىمدى قۇرۋعا 240 ملرد تەڭگە نەمەسە 500 ملن دوللارداي قاراجاتتى ءبولۋ جوسپارلانىپ وتىر. جالپى كەيىنگى 15 جىلدا 469 ملن دوللار قارجى سالىندى.
جوبالارعا جەردى قاشىقتىقتان زوندتاۋ دەرەكتەرىن تالداۋ, اەروگەوفيزيكالىق جانە گەوحيميالىق زەرتتەۋ, دالالىق جۇمىس كەشەنى كىرەدى. اۋماقتار تىزبەسىن قالىپتاستىرۋ كەزىندە قورلاردىڭ سارقىلۋ فاكتورلارى, جەر قويناۋىن پايدالانۋشىلاردىڭ بولماۋى نەمەسە ەڭ از سانى مەن پايدالى قازبالاردىڭ باسىم تۇرلەرىنىڭ الەۋەتى ەسكەرىلدى. ناتيجەسىندە, مىس, التىن, قورعاسىن, مىرىش, سيرەك جەر ەلەمەنتتەرى, باريت, بوكسيت كەن ورىندارىن ايقىنداۋ الاڭدارى انىقتالدى.
بۇدان بولەك, از زەرتتەلگەن مۇناي-گاز كەلەشەگى كەلەلى سولتۇستىك تورعاي, شۋ-سارىسۋ مەن سىرداريا باسسەيندەرىندە سەيسميكالىق بارلاۋ جۇمىستارىن جۇرگىزۋ جوسپارلانعان. سونداي-اق زەرتحانالىق-تالدامالىق بازانى جاڭعىرتۋ مەن گەولوگيالىق دەرەكتەردى تسيفرلاندىرۋ كوزدەلىپ وتىر.
وسى ماسشتابتا جەر قويناۋىن گەولوگيالىق زەرتتەۋگە كوشۋ ەۋروپالىق وداق, كانادا, اۋستراليا, قىتاي ەلدەرىنىڭ حالىقارالىق تاجىريبەسىنە سايكەس كەلەتىن گەولوگيالىق بولجامداردىڭ دالدىگىن ەداۋىر ارتتىرۋعا مۇمكىندىك بەرەدى.
ايماقتىق كارتاعا جۇيەلى ءتۇسىرۋ الەۋەتى اۋماقتاردى انىقتاۋعا, گەولوگيالىق ءارى ينۆەستيتسيالىق تاۋەكەلدەردى ازايتۋعا, گەولوگيالىق بارلاۋ مەن پايدالى قازبالاردى وندىرۋگە جەكە ينۆەستيتسيالار تارتۋ ءۇشىن بازالىق نەگىز بولادى.
