ينستيتۋت عالىمدارىنىڭ جۇرگىزگەن زەرتتەۋلەرى ناتيجەسىندە, ەلىمىزدە وتاندىق كۇن پانەلدەرى وندىرىلە باستادى. وتكەن جىلى ىسكە قوسىلعان بۇل جوبا ەلىمىزدە جاڭارتىلاتىن ەنەرگيا كوزدەرىن دامىتۋعا, كۇن ەنەرگەتيكاسى سالاسىنداعى وندىرىستىك مۇمكىندىكتى كەڭەيتۋگە باعىتتالعان. بۇل ونىمدەر جوعارى تيىمدىلىگىمەن, تۇراقتى قۋات بەرۋىمەن, ەلىمىزدىڭ ءارتۇرلى كليماتتىق جاعدايىنا بەيىمدەلۋىمەن ەرەكشەلەنەدى. ۇزاق مەرزىمگە ەسەپتەلگەن كۇن پانەلدەرى قازىردىڭ وزىندە بىرقاتار ءوندىرىس ورىندارىندا قولدانىلادى. قولجەتىمدى باعاسىمەن جوعارى ساپاسى تەك كاسىپورىندار ءۇشىن عانا ەمەس, جەكە تۇرعىن ۇيلەر ءۇشىن دە ءتيىمدى.
فيزيكا-تەحنيكالىق عىلىمي زەرتتەۋ ينستيتۋتى ەلىمىزدە كۇن ەنەرگەتيكاسى سالاسىنداعى جاڭا عىلىمي باعىتتاردى العاشقىلاردىڭ ءبىرى بولىپ يگەرىپ وتىر. اتاپ ايتقاندا, گەتەرووتكەلدى فوتوەلەمەنتتەر بويىنشا زەرتتەۋلەر جۇرگىزىلىپ, كۆانتتىق فيزيكا مەن نانوتەحنولوگيالارعا نەگىزدەلگەن تەحنولوگيالىق شەشىمدەر ازىرلەندى. ينستيتۋت عالىمدارى 20 جۋىق ۋاقىت بويى گەرمانيا مەن رەسەيدەگى جەتەكشى عىلىمي ورتالىقتاردىڭ تاجىريبەسىن زەردەلەپ, ونى وتاندىق ءوندىرىس تالاپتارىنا بەيىمدەگەن. سونىڭ ناتيجەسىندە, «TopCon» مەن «HIT» تەحنولوگيالارى نەگىزىندە كۇن پانەلدەرىن ازىرلەۋ مەن ءوندىرۋ جولعا قويىلدى.
جوبا ەڭ الدىمەن, ىشكى نارىقتىڭ سۇرانىسىن قامتاماسىز ەتۋگە باعىتتالعان. باسىمدىق كۇن رادياتسياسى جوعارى وڭىرلەردىڭ قاجەتتىلىگىن وتەۋگە بەرىلىپ وتىر. كۇن پانەلدەرىن ەل ىشىندە ءوندىرۋ يمپورتقا تاۋەلدىلىكتى ازايتىپ, وتاندىق جوعارى تەحنولوگيالى ونىمگە دەگەن سەنىمدى ارتتىرۋعا مۇمكىندىك بەرەدى.
وتكەن جىلعى جۇمىس قورىتىندىلارى كۇن ەنەرگەتيكاسىنىڭ ەل ءۇشىن ماڭىزى ارتىپ كەلە جاتقانىن كورسەتتى. ينستيتۋت ماماندارىنىڭ ايتۋىنشا, بۇل سالا بىرتىندەپ تۇراقتى دامۋدىڭ ماڭىزدى باعىتتارىنىڭ بىرىنە اينالىپ كەلەدى. نانوتەحنولوگيالار مەن زاماناۋي ينجەنەرلىك شەشىمدەر تاجىريبەلىك جوبالار ارقىلى ناقتى ناتيجەگە جەتىپ, ەنەرگەتيكالىق قاۋىپسىزدىكتى نىعايتۋعا جانە ەكونوميكانىڭ جاڭا باعىتتارىن دامىتۋعا جول اشىپ وتىر. ق.ساتباەۆ ۋنيۆەرسيتەتىنىڭ عالىمدارى مەن ينجەنەرلەرى الداعى ۋاقىتتا دا جاڭارتىلاتىن ەنەرگيا كوزدەرىن كەڭىنەن ەنگىزۋگە ۇلەس قوسۋدى ماقسات ەتكەن.
