سۋرەت جي كومەگىمەن جاسالدى
العاش قاراعاندا قىرعىزستان ۇسىنعان تەتىكتەر ءتيىمدى كورىنەدى. اتاپ ايتقاندا, ءوندىرىس ءۇشىن قاجەت جابدىقتاردى, تەحنولوگيالاردى, رەاگەنتتەر مەن شيكىزاتتى يمپورتتاۋعا قوسىلعان قۇن سالىعى سالىنبايدى. سونداي-اق دايىن ءونىم ەكسپورتىنا ققس-تىڭ نولدىك مولشەرلەمەسى قولدانىلادى.
دەگەنمەن بۇل جەڭىلدىكتەر ءوندىرىستى ىسكە قوسۋ كەزەڭىمەن عانا شەكتەلەدى.
قىرعىزستاندا زەرگەرلىك بۇيىمداردىڭ ىشكى نارىقتاعى اينالىمىنا 12 پايىزدىق ققس سالىنادى. ياعني كاسىپكەر شيكىزات پەن جابدىق اكەلۋ كەزىندە بەلگىلى ءبىر ۇتىسقا جەتكەنىمەن, دايىن ءونىمدى ساتۋ بارىسىندا سالىق جۇكتەمەسىنە قايتا تاپ بولادى. ناتيجەسىندە تۇپكى تابىستىڭ ەداۋىر بولىگى بيۋدجەتكە كەتەدى.
قازاقستانداعى جۇيە وزگەشە قۇرىلعان. بىرىنشىدەن, ەلدە وندىرىلمەيتىن جابدىقتار مەن تەحنولوگيالاردى يمپورتتاۋ كەزىندە ققس ەسەپكە الۋ ءادىسى ارقىلى تولەنەدى. بۇل كاسىپكەرلەرگە اينالىم قاراجاتىن بۇعاتتاماۋعا مۇمكىندىك بەرەدى. ەكىنشىدەن, زەرگەرلەر وتاندىق اففيناج زاۋىتتارىنان تازارتىلعان التىندى بەلگىلەنگەن كۆوتا اياسىندا ققس-سىز ساتىپ الا الادى. ۇشىنشىدەن, ارنايى سالىق رەجيمدەرى ارقىلى كومپانيالار جىلدىق اينالىمى 600 مىڭ ايلىق ەسەپتىك كورسەتكىشكە, ياعني شامامەن 2,6 ملرد تەڭگەگە دەيىن ققس تولەمەيدى. سونىڭ ارقاسىندا دايىن ءونىم دە سالىقسىز ساتىلادى.
وسى فاكتورلاردىڭ جيىنتىعى قازاقستاندى وڭىردەگى ەڭ قولايلى ءارى بولجامدى الاڭعا اينالدىرىپ وتىر. قازىر ەلدە زەرگەرلىك بۇيىمدار وندىرەتىن 445 كاسىپورىن جۇمىس ىستەيدى, ال ولاردى ساتۋمەن اينالىساتىن كومپانيالار سانى 3 759-عا جەتكەن. 2025 جىلدىڭ العاشقى ون ايىنىڭ قورىتىندىسى بويىنشا ىشكى نارىق كولەمى 3,1 پايىزعا ءوسىپ, 124,3 ملن اقش دوللارىن قۇرادى.
ساراپشىلاردىڭ پىكىرىنشە, قازاقستانداعى باستى ارتىقشىلىق – سالىقتىق جۇكتەمەنىڭ ءوندىرىس تىزبەگىنىڭ سوڭعى كەزەڭىندە جەڭىلدەۋى. بۇل كاسىپكەرگە ۇزاق مەرزىمدى جوسپار قۇرۋعا جانە ءونىم باعاسىن تۇراقتى ۇستاپ تۇرۋعا مۇمكىندىك بەرەدى.
