«نۇر وتان» مەن «ەدينايا روسسيا»

پارتيالارى ءوزارا ءىس-قيمىل مەن ارىپتەستىك تۋرالى كەلىسىمگە قول قويدى  «نۇر وتان» پارتياسى ءتور­اعاسىنىڭ ءبىرىنشى ورىنباسارى باۋىرجان بايبەكتىڭ باسشى­­لى­عىمەن «نۇر وتان» پارتياسى دەلە­گاتسياسىنىڭ رەسەي فەدەرا­تسيا­سىنا رەسمي ساپارى باس­تالدى. ەكىجاقتى كەزدەسۋ بارىسىندا ماسكەۋدە «ەدينايا روسسيا» بۇكىلرەسەيلىك ساياسي پارتياسى مەن «نۇر وتان» پارتياسى – ەكى بيلەۋشى پارتيانىڭ اراسىندا ءوزارا ءىس-قيمىل مەن ارىپتەستىك تۋرالى كەلىسىمگە قول قويىلدى. رەسمي ساپارىنىڭ ءبىرىنشى كۇنىندە «نۇر وتان» پارتياسى ءتور­اعاسىنىڭ ءبىرىنشى ورىنباسارى باۋىرجان بايبەك رەسەي فەدە­راتسياسى فەدەرالدىق جينا­لىسى مەملەكەتتىك دۋ­ماسىنىڭ ءتور­اعاسى سەرگەي نارىشكينمەن كەزدەستى. ەكىجاقتى كەزدەسۋ بارىسىن­دا بۇگىنگى تاڭدا قازاقستان رەس­پۋب­ليكاسى پارلامەنتى سەناتى مەن رەسەي فەدەراتسياسى فەدە­راتسيا كەڭەسىنىڭ, قازاقستان ­رەس­پۋبليكاسى پارلامەنتى ءماجىلى­سى مەن رەسەي فەدەراتسياسى مەم­­لەكەت­تىك دۋماسىنىڭ ارا­سىندا تىكەلەي ءوزارا ءىس-قيمىل­دىڭ ورناتىل­عانى, ال دەپۋ­تاتتاردىڭ تمد پار­لا­مەن­ت­ارالىق اسسام­بلەياسى, ۇقشۇ, ەقىۇ مەن ەقىۇ پار­لامەنت­تىك اسسامبلەياسى وتىرىس­تارى شەڭ­بەرىندە جەمىستى جۇمىس جاساپ جات­قاندارى اتاپ ءوتىلدى. تاراپتار ەكى ەلدىڭ پارلامەنتى اراسىنداعى بايلانىستاردى ءارى قاراي دا دامىتۋعا نيەتتى ەكەندەرىن جەتكىزدى. ساپار شەڭبەرىندە «نۇر وتان» پارتياسىنىڭ دەلەگاتسياسى «ەدينايا روسسيا» باس كەڭەسىنىڭ حاتشىسى, رف فەدەرالدى جينالىسى مەملەكەتتىك دۋماسى توراعاسىنىڭ ورىنباسارى سەرگەي نەۆەروۆپەن جۇزدەستى. كەزدەسۋ بارىسىندا باۋىرجان بايبەك «نۇر وتان» مەن «ەدينايا روسسيا» پارتيالارىنىڭ بيلەۋشى بولىپ تابىلاتىنىن جانە ءوز ەلدەرىندەگى زاڭنامالىق ورگانداردا كوپشىلىك داۋىسقا يە ەكەنىن اتاپ ءوتتى. سونىمەن بىرگە, پارتيالاردى «نۇر وتان» دوكتريناسىنداعى, سونداي-اق, «ەدينا روسسيانىڭ» رەسمي تۇعىرناماسىندا بەلگىلەنگەن ورتالىقشىلدىق يدەولوگياسى مەن ورتاق كونسەرۆاتيۆتىك قۇندىلىقتار بىرىكتىرەتىنىنە نازار اۋداردى. تاراپتار ءبىزدىڭ ەلدەرىمىزدىڭ اراسىنداعى پارتيا­­ارالىق جانە پارلامەنتارالىق ارىپتەستىكتىڭ قار­قىن­دى دامۋىنىڭ قازاقستان مەن رەسەيدىڭ ءوزارا ءتيىمدى ارىپتەستىگىنىڭ نىعايۋىنا ىقپال ەتەتىنىنە توقتالدى. ساپار شەڭبەرىندە «نۇر وتان» پارتياسى توراعا­سىنىڭ ءبىرىنشى ورىنباسارى باۋىرجان بايبەك, سونداي-اق, رف مەملەكەتتىك دۋماسىنداعى «ەدينايا روسسيا» پارتياسى فراكتسياسىنىڭ جەتەكشىسى, رف فەدە­رال­دى جينالىسى مەملەكەتتىك دۋماسى توراعا­سىنىڭ ورىنباسارى ۆلاديمير ۆاسيلەۆپەن جۇزدەستى. رەسەيلىك ارىپتەستەرىمەن كەزدەسۋى بارىسىندا باۋىرجان بايبەك قازاقستان پرەزيدەنتى, پارتيا توراعاسى ن.ءا.نازارباەۆتىڭ پارتيانىڭ ءحVى سەزىندە جاريا ەتكەن بەس ينستيتۋتسيونالدىق رەفورماسىن, سونداي-اق, قابىلدانعان «100 ناقتى قادام» ۇلت جوس­پارىن ىسكە اسىرۋداعى «نۇر وتان» پارتياسىنىڭ ءرولىن اتاپ ءوتتى. ءوز كەزەگىندە «ەدينايا روسسيا» پارتياسى فراك­تسياسىنىڭ جەتەكشىسى, مەملەكەتتىك دۋمانىڭ ۆيتسە-سپيكەرى ۆلاديمير ۆاسيلەۆ پارتيالار اراسىنداعى اشىق جانە سەنىمدى قارىم-قاتىناستاردى جوعارى باعالادى. ءبىز رەسەي-قازاقستان ءوزارا ءىس-قيمىلىنىڭ دەڭگەيى مەن جەمىستى سيپاتىن كورسەتەتىن «ەدينايا روسسيا» جانە «نۇر وتان» پارتيالارىنىڭ اراسىنداعى قالىپتاسقان اشىق جانە سەنىمدى قارىم-قاتىناستاردى جوعارى باعالايمىز», – دەدى ۆ.ۆاسيلەۆ. وسى رەتتە, «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك بيىلعى جىلى قازاقستاننىڭ تمد-عا توراعالىق ەتەتىنىن جانە ەلدەر­دىڭ اراسىنداعى ساۋدا-ەكونوميكالىق ءوزارا ءىس-قيمىل­دى ءارى قاراي تەرەڭدەتە تۇسۋگە ىقىلاستى ەكەنىن جەتكىزدى. «رەسەي قازاقستان ءۇشىن – باۋىرلاس ەل, بەيبىت كورشى جانە ستراتەگيالىق سەرىكتەس. بيىلعى جىلى قازاقستان پرەزيدەنتى, «نۇر وتان» پارتياسى توراعاسىنىڭ وسىدان جيىرما جىل بۇرىن جاريالاعان يدەياسىن شىندىققا اينالدىرعان ەۋرازيالىق ەكونوميكالىق كەڭەس باستاۋ الدى. بىرىگۋدىڭ عالامدىق تاجىريبەسى كۇش-جىگەردى بىرىكتىرۋدىڭ ۇزاق مەرزىمدى ەكونوميكالىق ديۆيدەندتەر اكەلەتىنىن جانە حالىقتىڭ ءال-اۋقاتىن كوتەرەتىنىن كورسەتىپ وتىر», – دەدى ب.بايبەك. رەسەي پارلامەنتشىلەرى اتاۋلى كۇندەردى مەرەكەلەۋ بويىنشا بىرلەسىپ جۇمىس جاساۋدىڭ قاجەت ەكەنىن جەتكىزدى, ولاردىڭ قاتارىندا ۇلى وتان سوعىسىنداعى جەڭىستىڭ 70 جىلدىعى دا بار. سونىمەن بىرگە, فەدەراتسيا كەڭەسىنىڭ حالىقارالىق ىستەر كوميتەتى باسشىسىنىڭ ورىنباسارى ا.كليموۆ «قازاق حاندىعىنىڭ 550 جىلدىعىنىڭ ءبىزدىڭ حالقىمىزدىڭ تاريحىنداعى ماڭىزدى كەزەڭى بولىپ تابىلاتىنىن جانە وسى ايتۋلى وقيعانى نازاردان تىس قالدىرمايتىندارىن» اتاپ ءوتتى. وسى كۇنى «نۇر وتان» پارتياسى مەن «ەدينايا روسسيا» بۇكىلرەسەيلىك ساياسي پارتياسى اراسىندا ءوزارا ءىس-قيمىل مەن ارىپتەستىك تۋرالى كەلىسىمگە قول قويىلدى. اتالعان كەلىسىم «تاۋەلسىزدىك, تەڭدىك, ءوزارا قۇرمەت پەن ءبىر-ءبىرىنىڭ ىسىنە ارالاسپاۋ نەگىزدەرى مەن قاعيداتتارىنا سۇيەنىپ جاسالدى. ويتكەنى, پارتيالىق بايلانىس قازاقستان-رەسەي قارىم-قاتىناستارىنىڭ ماڭىزدى قۇرامداسى بولىپ تابىلىپ, ورتاق مۇددە ءۇشىن ولاردىڭ تۇراقتى دامۋىنا ىقپال ەتۋدى كوزدەيدى». بيلەۋشى پارتيالاردىڭ اراسىنداعى ءوزارا ءىس-قيمىلدىڭ نەگىزگى اسپەكتىلەرىنىڭ قاتارىندا پارتيا قۇرى­­لىسى سالا­سىنداعى تاجىريبەسىمەن ءبىرىن-ءبىرى تانىس­­تىرۋ, پارتيالىق جوبالاردى, ۇيىمداستىرۋ جۇمىس­­تارىن, باقىلاۋ-رەۆيزيالىق قىزمەتتى, كادر­­­لار­­دى وقىتۋ مەن دايىنداۋدى ىسكە اسىرۋ, مەملە­­كەتتىك بيلىك­تىڭ ءوزارا ورتاق مۇددەنى تانىتاتىن زاڭ­نا­مالىق ورگان­داردىڭ قىزمەتىنە, جاستار ساياساتى­نا, حالىق­ارا­لىق بايلانىستار مەن باسقا دا سالالارعا قاتىسۋى بار. سونىمەن قاتار, كەلىسىمنىڭ تاراپتاردىڭ پارتيانىڭ وقىتۋ قۇرىلىمدارى اراسىندا تاجىريبە الماسۋعا, سونداي-اق, «دوستىق پەن كورشىلىكتى نىعايتۋ, جاستاردى پاتريوتيزم مەن ەڭبەكسۇيگىشتىككە باۋلۋ ماقساتىندا «نۇر وتان» پارتياسى جانىنداعى «جاس وتان» جاس­تار قاناتى مەن «مولودايا گۆارديا ەدينوي روسسي» بۇكىلرەسەيلىك قوعامدىق ۇيىمىنىڭ اراسىنداعى ارىپتەستىكتى دامىتۋعا ىقپال ەتەتىنى ايتىلعان. تاراپتار پارتيا باسشىلىعى دەلەگاتسياسى ساپارلارىمەن الماسۋ تۋرالى كەلىستى. مىسالى, 2015-2016 جىلدارى «ەدينايا روسسيا» بۇكىلرەسەيلىك ساياسي پارتياسى باسشىلىعى دەلەگاتسياسىنىڭ قازاقستان رەسپۋبليكاسىنا ساپارى جوسپارلانعان, 2017 جىلى «نۇر وتان» پارتياسى باسشىلىعىنىڭ دەلەگاتسياسى رەسەي فەدەراتسياسىنا ساپارمەن بارادى. ساپار بارىسىندا دەلەگاتسيا مۇشەلەرى «ەدينايا روسسيا» پارتياسىنىڭ ورتالىق اتقارۋ كوميتەتىنىڭ جەتەكشىلەرىمەن, «مولودايا گۆارديا ەدينوي روسسي» باسشىلىعىمەن كەزدەسىپ, پارتيانىڭ ماسكەۋ قالالىق وڭىرلىك ءبولىمىنىڭ جۇمىسىمەن تانىستى. دەلەگاتسيا قۇرامىندا «نۇر وتان» پارتياسى ساياسي كەڭەسى بيۋروسىنىڭ مۇشەسى اناتولي باش­ماكوۆ, سىبايلاس جەمقورلىققا قارسى ءىس-قيمىل بويىنشا رەسپۋبليكالىق قوعامدىق كەڭەستىڭ توراعاسى, پارلامەنت ماجىلىسىندەگى پارتيا فراكتسياسىنىڭ مۇشەسى قايىربەك سۇلەيمەنوۆ, «جاس وتان» جاستار قاناتىنىڭ توراعاسى نۇرلان سىدىقوۆ, پارتيانىڭ ساياسي مەنەدجمەنت مەكتەبىنىڭ ديرەكتورى اسەت ابدۋاليەۆ بولدى. ساۋلەبەك ءبىرجان.