كەزدەسۋدىڭ نەگىزگى ماقساتى – قوعامدىق قاۋىپسىزدىكتى قامتاماسىز ەتۋدەگى مەملەكەتتىك ورگانداردىڭ قىزمەتىن ءتۇسىندىرۋ, ازاماتتاردىڭ قۇقىقتىق مادەنيەتىن ارتتىرۋ, سونداي-اق مەملەكەتتىك ورگاندار مەن ازاماتتىق قوعام اراسىنداعى ءوزارا ىقپالداستىقتى نىعايتۋ.
ءىس-شاراعا وبلىستاعى ارحيۆ جانە كىتاپحانا قىزمەتكەرلەرى, قوعامدىق كەلىسىم سالاسىنىڭ ماماندارى, قۇقىق قورعاۋ ورگاندارىنىڭ وكىلدەرى, سونداي-اق ۇكىمەتتىك ەمەس ۇيىم مۇشەلەرى قاتىستى. كەزدەسۋ اشىق ديالوگ فورماتىندا ءوتىپ, قاتىسۋشىلار وزدەرىن تولعاندىرعان سۇراقتارىن قويىپ, ناقتى جاۋاپ الدى.
جيىن بارىسىندا قازىرگى قوعامدا وزەكتى بولىپ وتىرعان الاياقتىقتىڭ الدىن الۋ ماسەلەسىنە ەرەكشە نازار اۋدارىلدى. سوڭعى جىلدارى تەلەفون جانە ينتەرنەت ارقىلى جاسالاتىن الاياقتىق ارەكەتتەردىڭ جيىلەپ كەتكەنى, اسىرەسە اعا بۋىن وكىلدەرىنىڭ ءجيى الدانىپ قالاتىنى ايتىلدى. وسى باعىتتا وبلىستىق پروكۋراتۋرانىڭ قوعامدىق مۇددەلەردى قورعاۋ باسقارماسىنىڭ اعا پروكۋرورى جالعاس تولەنوۆ ءتۇسىندىرۋ جۇمىستارىن جۇرگىزىپ, الاياقتىقتان ساقتانۋ جولدارىنا توقتالدى.
سونىمەن قاتار, پوليتسيا دەپارتامەنتىنىڭ اكىمشىلىك پوليتسيا باسقارماسى باستىعىنىڭ ورىنباسارى, پوليتسيا پودپولكوۆنيگى ارمان مۇحامەتجان ۇلى قوعامدىق ءتارتىپتى ساقتاۋ جانە قۇقىق بۇزۋشىلىقتىڭ الدىن الۋ باعىتىنداعى جۇمىسپەن تانىستىردى.
كەزدەسۋدە «Amanat» پارتياسى ۇلىتاۋ وبلىستىق فيليالىنىڭ پارتيالىق باقىلاۋ جونىندەگى ينسپەكتورى ەرشات اۋباكيروۆ ازاماتتىق جاۋاپكەرشىلىكتىڭ ماڭىزدىلىعىنا توقتالدى. ۇكىمەتتىك ەمەس ۇيىمدار اتىنان ۇلىتاۋ جاستارى قوعامدىق بىرلەستىگى توراعاسىنىڭ ورىنباسارى باقىت بولاتوۆا ازاماتتىق قوعامنىڭ قۇقىقتىق مادەنيەتتى قالىپتاستىرۋداعى رولىنە نازار اۋداردى.
مەملەكەتتىك قۇقىقتىق جۇمىس ءبولىمىنىڭ باسشىسىنىڭ مىندەتىن اتقارۋشى قۇرالاي قالماعانبەتوۆا زاڭنامالىق وزگەرىستەر مەن ازاماتتاردىڭ قۇقىقتارىن قورعاۋ تەتىكتەرى تۋرالى اقپارات بەردى.
وسىنداي سەمينار قۇقىقتىق ساۋاتتىلىقتى ارتتىرۋعا, قوعامدىق قاۋىپسىزدىكتى نىعايتۋعا جانە قوعامداعى تۇراقتىلىقتى قامتاماسىز ەتۋگە وڭ اسەر ەتەدى.
