فوتو: اشىق دەرەككوز
قازاقستان بىلتىرعى 65-ورىننان 61-ورىنعا جوعارىلادى. قازىر ەل ازاماتتارى 78 مەملەكەتكە ۆيزاسىز كىرە الادى. وتكەن جىلى بۇل كورسەتكىشتە 77 ەل بولعان. وسى ناتيجەمەن قازاقستان ورتالىق ازيادا كوش باستاپ تۇر.
رەيتينگتىڭ ەڭ جوعارى ساتىسىندا سينگاپۋر تۇر. ونىڭ ازاماتتارى 192 ەلگە ۆيزاسىز بارا الادى. ودان كەيىن جاپونيا مەن وڭتۇستىك كورەيا كەلەدى, ارقايسىسى 188 ەلگە جول اشادى. ال دانيا, ليۋكسەمبۋرگ, يسپانيا, شۆەتسيا جانە شۆەيتساريا تۇرعىندارى 186 ەلگە ۆيزاسىز كىرە الادى.
ءتىزىمنىڭ سوڭىندا اۋعانستان ورنالاسقان. بۇل ەلدىڭ پاسپورتى نەبارى 24 مەملەكەتكە ەركىن كىرۋگە مۇمكىندىك بەرەدى.
Henley & Partners مۇنداي رەيتينگتى 20 جىلدان بەرى جاساپ كەلەدى. قازاقستان ازاماتتارى ۆيزاسىز باعىتتاردىڭ تولىق ءتىزىمىن Egov پورتالى ارقىلى تەكسەرە الادى.
