كوللاج: Kazpravda.kz / اديلبەك تاۋەكەلوۆ
- جاقىندا بەلگىلى الپينيست انار بۋراشەۆا انتاركتيداداعى ۆينسون تاۋىنا شىقتى. ءسويتىپ, ونىڭ ەسىمى ورتالىق ازيا بويىنشا ءار قۇرلىقتاعى ەڭ بيىك جەتى شىڭدى باعىندىرعان تۇڭعىش ايەل رەتىندە تاريحتا قالدى. بۇعان دەيىن انار ەۆەرەست (8818 مەتر, ازيا), اكونكاگۋا (6962 مەتر, وڭتۇستىك امەريكا), دەنالي (6194 مەتر, سولتۇستىك امەريكا), كيليماندجارو (5895 مەتر, افريكا), ەلبرۋس (5642 مەتر, ەۋروپا), كارستەنس پيراميداسى (4884 مەتر, اۋستراليا) تاۋلارىنىڭ ۇشار بيىگىنەن شىققان. وسى جوسپاردى جۇزەگە اسىرۋعا قازاقتىڭ قايسار قىزىنا ەكى جىل ۋاقىت قاجەت بولدى.
- ءۇش جىلدان كەيىن ەلىمىزدە تاعى ءبىر زاماناۋي فۋتبول ستاديونى بوي كوتەرەدى. ناقتىلاپ ايتساق, بيىل اتىراۋدا 12 مىڭ كورەرمەنگە ەسەپتەلگەن سپورت نىسانىنىڭ قۇرىلىسى باستالادى. ونى 2029 جىلى اياقتاۋ جوسپارلانىپ وتىر. سونىمەن قاتار سول قالادا ورنالاسقان «مۇنايشى» ستاديونى جاڭعىرتۋدان ءوتىپ, مۇمكىندىگى 8 مىڭ ادامدى قابىلداۋعا دەيىن جەتكىزىلەدى.
- جەڭىل اتلەتيكا فەدەراتسياسىنىڭ پرەزيدەنتى ولگا رىپاكوۆا قىزمەتىنەن كەتتى. بۇل ەسىم جانكۇيەرلەرگە جاقسى تانىس. ونىڭ قورجىنىندا وليمپيادانىڭ تولىق جۇلدە جيىنتىعى – التىن دا, كۇمىس تە, قولا دا بار. الەم چەمپيوناتىندا ءۇش رەت جۇلدەگەرلەر قاتارىنان كورىنىپ, جابىق عيماراتتاعى الەمدىك دودادا دارا شىقتى. جازعى ازيا ويىندارىندا ءتورت مارتە مەرەيى ۇستەم بولىپ, دۇنيەجۇزىلىك ۋنيۆەرسيادا, باسقا دا اسا ءىرى حالىقارالىق جارىستاردا جەڭىس تۇعىرىنىڭ ەڭ بيىك ساتىسىنا كوتەرىلدى. مىنە, سول اتاقتى سپورتشى ءوز ورنىن «قازمۇنايگاز» ۇلتتىق كومپانياسى» اق باسقارما توراعاسى اسحات حاسەنوۆكە بوساتتى. ءوزى اتالعان فەدەراتسيانىڭ قۇرمەتتى پرەزيدەنتى بولىپ قالادى.
