مەملەكەت باسشىسى قاسىم-جومارت توقاەۆ 2026 جىلدى تسيفرلاندىرۋ جانە جاساندى ينتەللەكت جىلى دەپ بەكىتتى. وڭىرىمىزدە 357 ەلدى مەكەن بار بولسا, سونىڭ 98 پايىزى ينتەرنەتپەن قامتاماسىز ەتىلگەن. بارلىعى 14 انتەننا-مۇنارالى قوندىرعى ورناتىلدى. سونداي مۇنارانىڭ ءبىرى شىلىكتى اۋىلىندا دا ىسكە قوسىلىپ جاتىر.
وبلىس اكىمى نۇرىمبەت ساقتاعانوۆتىڭ ايتۋىنشا, الداعى ءبىر-ەكى جىلدا وبلىستىڭ بارلىق ەلدى مەكەنى ينتەرنەتكە قوسىلادى.
پويىزدار مەن ۇشاقتاردا Starlink دەڭگەيىندەگى ينتەرنەت پايدا بولادى
شىلىكتىدە ورناتىلعان 15 مەترلىك انتەننا-مۇنارالىق قوندىرعى جەر تەلىمىمەن بىرگە زايسان اۋدانىنىڭ تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ بالانسىنا بەرىلدى. ۇيالى بايلانىس وپەراتورى انىقتالىپ, نىسان ىسكە قوسىلدى. وسى ورايدا جەرگىلىكتى تۇرعىن, كوپ جىل مادەنيەت سالاسىندا ەڭبەك ەتكەن ايگۇل دوسانوۆا اۋىلعا جاھاندىق جەلىنىڭ كەلۋىن ەرەكشە مەرەكە دەپ اتاپ ءوتتى.
– تۇنگى ساعات ون ەكىلەر شاماسىندا ۇيالى تەلەفونىم بەزىلدەپ, مازا بولماي كەتتى. بۇعان نە بوپ قالدى دەپ قاراسام, ينتەرنەت قوسىلىپ, نەشە كۇننەن بەرگى تۋىس-تۋعانداردىڭ حات-حابارى توپىرلاپ كەلىپ جاتىر ەكەن. ينتەرنەت – ءبىلىمنىڭ باستاۋى. بالالارىمىز بولاشاقتا عالامتور ارقىلى ءبىلىم الىپ, جاساندى ينتەلەكتىنى مەڭگەرىپ, جان-جاقتى داميدى, – دەپ العىسىن ءبىلدىردى ايگۇل دوسانوۆا.
انتەننا-مۇنارالى قوندىرعىنىڭ ىسكە قوسىلۋى ارقاسىندا شالعايداعى ەلدى مەكەن حالقى تەلەكوممۋنيكاتسيا قىزمەتتەرىنە قول جەتكىزىپ, تسيفرلىق جۇيەنىڭ يگىلىگىن كورۋگە مۇمكىندىك الدى.
