قاراپايىم ماماندىقتارعا گرانت كوبەيدى

ناتيجەسىندە, مەگاپوليستە جۇمىسسىزدىق دەڭگەيى 4,7%-عا, جاس­تار اراسىنداعى جۇمىس­سىز­دىق 2.9%-عا تومەندەدى. سۋب­سي­ديا­لا­ناتىن جۇمىس ورىندارىنا جولدانعاندار – 5 403, بوس جۇمىس ورنىنا ورنالاسقاندار – 12 555 ادام. ودان بولەك, كاسىپتىك ءبىلىم الۋعا – 760, ونلاين پلاتفورماعا – 3 657, ۆاۋچەرلىك وقۋعا 128 ادام جىبەرىلدى. جالپى, جۇمىسپەن قامتۋ شاراسىنا 25 630 تۇرعىن قاتىستى.

باسقارما ماماندارىنىڭ ايتۋىنشا, بۇگىندە شاھاردا جاڭا جۇمىس ورىندارى كوپتەپ اشىلىپ جاتىر. ونىڭ ناتيجەسى دە جوق ەمەس. ايتالىق, اۋەلگى مەجە – 21 مىڭنىڭ ورنىنا 27 781 ادام تۇراقتى جۇمىسپەن قامتىلىپ, جوسپار 127%-عا ورىندالدى.

سونىمەن قاتار وتكەن جىلى مەگا­­پوليستە جۇ­مىسپەن قام­­­­تۋعا ار­­نال­عان 76 ءىس-شارا ۇيىم­داستىرىلدى. ونىڭ ىشىندە قالادا, شالعاي ەلدى مەكەندەردە وتكەن بوس جۇمىس ورىندارى جارمەڭكەسى, «اشىق ەسىك» كۇندەرى بار. جارمەڭكەلەرگە 400-دەن استام جۇمىس بەرۋشى مەن 4,5 مىڭعا  جۋىق جۇمىسسىزدار قاتىسىپ, ناتيجەسىندە 711 ازامات تۇراقتى جۇمىسقا, 291 تۇرعىن سۋبسيديالاناتىن جۇمىس ورىندارىنا جولداندى. ودان بولەك, باسقارما ماماندارىنىڭ تۇسىندىرمە جۇمىستارى ارقىلى مىڭنان استام ازامات سولتۇستىك وڭىرلەرگە ەرىكتى قونىس اۋدارۋ باعدارلاماسىمەن جاقىن تانىستى. اقىر سوڭىندا وسى باعدارلاماعا 160 وتباسى نەمەسە 677 ادام قاتىسۋعا نيەت ءبىلدىرىپ, جۇمىس كۇشى تاپشى بولعان سولتۇستىك وڭىرلەرگە ەرىكتى تۇردە قونىس اۋداردى.

الەۋمەتتىك سالاعا جاۋاپتى مەكەمەنىڭ مالىمەتىنشە, 2025 جىلى شىمكەنتكە 1 045 قانداس كوشىپ كەلىپ, بۇگىندە جاڭا ءومىر جاعدايىنا بەيىمدەلىپ جاتىر. ولاردىڭ باسىم بولىگى ەڭبەككە قابىلەتتى جاستاعى ازاماتتار. سولاردىڭ ىشىندە  22 قانداس جۇمىسپەن قامتۋ شارالارىنا تارتىلدى.

سونداي-اق قالالىق ءبىلىم باسقارماسىنىڭ دەرەگىنە سۇيەن­سەك, 2025–2026 وقۋ جىلىنا تەحنيكالىق, كاسىپتىك مامان­­­دىق­تارعا 8000 گرانت بولىنگەن. بۇل رەتتە وتكەن جۇمىسشى ما­ماندىقتار جىلى اياسىندا بىلىك­تى كادرلاردى دايارلاۋ ىسىنە قاراستىرىلعان گرانت 29,2%-عا كوبەيگەن. ءتيىستى ماماندىقتارعا گرانت ءبولۋ جونىندە 246 جەرگىلىكتى كاسىپورىن ارنايى ءوتىنىم بەرگەن. دەمەك مەگاپوليستەگى شاعىن جانە ورتا بيزنەس سالاسىنا كاسىپتىك, تەح­ني­كالىق ماماندىقتار اۋاداي قاجەت بولىپ تۇر. ءوز كەزەگىندە ارنايى قۇرىلعان كوميسسيا 70 ماماندىق بويىنشا 8000 ورىنعا بولىنگەن مەملەكەتتىك تاپسىرىستى قالاداعى 26 كوللەدجگە ۇلەستىرگەن. تاپسىرىس نەگىزىنەن ءبىلىم, ونەر, گۋمانيتارلىق, الەۋمەتتىك عىلىم, اقپارات, بيزنەس, باسقارۋ, قۇقىق, اقپاراتتىق-كوممۋنيكاتسيالىق تەحنولوگيا, ينجەنەرلىك, وڭدەۋ جانە قۇرىلىس, اۋىل, ورمان, بالىق شارۋاشىلىعى, ۆەتەريناريا, دەنساۋلىق ساقتاۋ, الەۋمەتتىك قولداۋ, قىزمەت كورسەتۋ سەكىلدى سالالاردى قامتىعان.

شىمكەنت