رەسمي دەرەككە سايكەس, جول قوزعالىسى ەرەجەلەرىن بۇزۋ فاكتىلەرى سوڭعى ۋاقىتتا ايتارلىقتاي ارتقان. 2025 جىلى عانا ءنومىرسىز, جالعان نەمەسە ادەيى جابىلعان مەملەكەتتىك نومىرمەن جۇرگەن جۇك كولىكتەرىنە قاتىستى 47 مىڭ زاڭبۇزۋشىلىق تىركەلگەن. كوپ جاعدايدا كولىكتى باسقارعان جۇرگىزۋشىلەردى انىقتاۋ مۇمكىن بولماعان.
وسىعان بايلانىستى جولداردا اۆتوپاترۋل سانى كوبەيتىلدى. بىرنەشە مەملەكەتتىك ورگاننىڭ قاتىسۋىمەن بىرلەسكەن ءموبيلدى توپتار قۇرىلدى. رەيدتەرگە جول پوليتسياسى, كولىك پروكۋراتۋراسى, كولىك باقىلاۋ ينسپەكتسياسى جانە قازاۆتوجول مەكەمەسىنىڭ وكىلدەرى قاتىسىپ جاتىر. تەكسەرۋ ناتيجەلەرى كۇن سايىن ىشكى ىستەر مينيسترلىگىنە جولدانادى.
قۇزىرلى ورگانداردىڭ مالىمەتىنشە, زاڭبۇزۋشىلىققا بارعان جۇرگىزۋشىلەردىڭ نەگىزگى ماقساتى جىلدامدىقتى اسىرۋ دەرەكتەرىن جاسىرۋ. كەيبىرى مەملەكەتتىك ءنومىردى جابۋعا نەمەسە تۇسىرۋگە ارنالعان ارنايى قۇرالدار قولدانعان. الايدا مۇنداي ارەكەتتەر دە بەينەباقىلاۋ جۇيەلەرى ارقىلى تىركەلەتىنى ەسكەرتىلدى.
كولىك باقىلاۋ ورگاندارى جۇرگىزىلىپ جاتقان شارانىڭ مازمۇنىن ءتۇسىندىردى.
«قازىرگى تاڭدا جول پوليتسياسىمەن, پروكۋراتۋرامەن جانە قازاۆتوجول ۇيىمىمەن بىرلەسىپ رەيدتىك تەكسەرۋلەر جۇرگىزىلىپ جاتىر. نەگىزگى نازار جالعان جانە وقىلمايتىن مەملەكەتتىك تىركەۋ نومىرلەرىن انىقتاۋعا اۋدارىلعان. جول پوليتسياسى ءوز باعىتى بويىنشا جۇمىس ىستەيدى. ال كولىك باقىلاۋ قىزمەتى سالماق پارامەترلەرىن, رۇقسات قۇجاتتارىن جانە تەحنيكالىق تالاپتاردىڭ ساقتالۋىن تەكسەرەدى. بۇل شارا 8 قاڭتاردان 10 قاڭتارعا دەيىن جالعاسادى», دەيدى ۆەدومستۆو.
ىشكى ىستەر ورگاندارى ءنومىردى جاسىرۋ نەمەسە قولدان جاساۋ اۋىر قۇقىقتىق سالدارعا اكەلەتىنىن اتاپ ءوتتى. قولدانىستاعى زاڭناماعا سايكەس, مۇنداي ارەكەتتەر ءۇشىن جۇرگىزۋشى كۋالىگىنەن ايىرۋ نەمەسە 5 تاۋلىككە دەيىن اكىمشىلىك قاماۋ جازاسى كوزدەلگەن.
پوليتسيا وكىلدەرى جول قوزعالىسىنا قاتىسۋشىلاردى زاڭ تالاپتارىن قاتاڭ ساقتاۋعا شاقىردى. مەملەكەتتىك تىركەۋ ءنومىرىن زاڭسىز وزگەرتۋ نەمەسە جاسىرۋ جول قاۋىپسىزدىگىنە تىكەلەي قاتەر توندىرەتىنى ايتىلدى.
ىشكى ىستەر مينيسترلىگى باقىلاۋ شارالارى تەك ەلوردا ماڭىندا ەمەس, رەسپۋبليكا كولەمىندە جالعاساتىنىن حابارلادى. قۇقىق قورعاۋ ورگاندارى جولداعى قاۋىپسىزدىكتى قامتاماسىز ەتۋ باستى مىندەت ەكەنىن اتاپ ءوتتى.
