جيىنعا تۇركى ەلدەرىنىڭ ىسكەرلىك سالا وكىلدەرى قاتىستى. اتاپ ايتقاندا, ر.باتالوۆ («اتامەكەن», قازاقستان), م.كارىمساقوۆ (سىرتقى ساۋدا پالاتاسى, قازاقستان), ب.امرەەۆ (تۇركى ينۆەستيتسيالىق قورى), م.باشقۇرت (تۇركى الەمى مۋنيتسيپاليتەتتەر وداعى), ا.كۋلا (تۇركى ساۋدا-ونەركاسىپ پالاتالارى وداعى), ۆ.زەينالوۆ (ازەربايجان), م.باكيروۆ (قىرعىزستان), م.گۋردوۆ (تۇرىكمەنستان), ا.شايحوۆ (وزبەكستان) جانە باسقا دا وكىلدەر بولدى.
كەزدەسۋ بارىسىندا تۇركى مەملەكەتتەرى اراسىنداعى ەكونوميكالىق ىنتىماقتاستىقتى دامىتۋ, ساۋدا-ەكونوميكالىق بايلانىستاردى كەڭەيتۋ, سونداي-اق قاتىسۋشى ەلدەردىڭ ىسكەرلىك توپتارى اراسىنداعى ءوزارا ءىس-قيمىلدى نىعايتۋ ماسەلەلەرى تالقىلاندى.
ايدا بالاەۆا تۇركى ساۋدا-ونەركاسىپ پالاتالارى وداعىنىڭ جالپىتۇركىلىك ەكونوميكالىق مۇددەلەردى ىلگەرىلەتۋ مەن بىرلەسكەن باستامالاردى ىسكە اسىرۋعا ارنالعان ماڭىزدى ءارى ءتيىمدى الاڭ ەكەنىن اتاپ ءوتتى. سونداي-اق ساۋدا-ونەركاسىپ پالاتالارىنىڭ بيزنەس-قوعامداستىقتار اراسىندا تىكەلەي ديالوگ ورناتۋدا جانە مەملەكەتارالىق كەلىسىمدەردى ناقتى ەكونوميكالىق جوبالارعا اينالدىرۋدا شەشۋشى ءرول اتقاراتىنى ءسوز ەتىلدى.
سونداي-اق وداققا مۇشە ەلدەر اراسىنداعى ينۆەستيتسيالىق ارىپتەستىكتى دامىتۋعا ىقپال ەتەتىن تۇركى ينۆەستيتسيالىق قورىنىڭ جۇمىسىن جانداندىرۋ قاجەتتىگى تالقىلاندى.
تۇركىتىلدەس ەلدەردەگى تۋريزم مەن تۋريستىك سالانى دامىتۋ, كولىك-لوگيستيكالىق باعىتتاردى كەڭەيتۋ, ونەركاسىپتىك كووپەراتسيا, تسيفرلاندىرۋ جانە يننوۆاتسيالىق شەشىمدەردى, ونىڭ ىشىندە جاساندى ينتەللەكتىنى ەنگىزۋ ماسەلەلەرىنە ايرىقشا ءمان بەرىلدى.
كەزدەسۋ قورىتىندىسى بويىنشا تاراپتار تۇركى مەملەكەتتەرى ۇيىمى اياسىندا ەكونوميكالىق ينتەگراتسيانى ودان ءارى نىعايتۋعا جانە سەرىكتەس ەلدەرمەن پراكتيكالىق ىنتىماقتاستىقتى دامىتۋعا دايىن ەكەنىن راستادى.
