اتالعان باعدارلاما سپورتشىلار مەن اۋەسقوي پايدالانۋشىلاردىڭ قوزعالىس تەحنيكاسىن اۆتوماتتى تۇردە تالداپ, جەكە فيزيكالىق كورسەتكىشتەرىنە سايكەس جاتتىعۋ ۇسىنىمدارىن قالىپتاستىرۋعا مۇمكىندىك بەرەدى. جاساندى ينتەللەكت الگوريتمدەرى ارقىلى قوزعالىستاعى قاتەلىكتەر انىقتالىپ, جاتتىعۋ پروتسەسىنىڭ تيىمدىلىگى ارتادى.
جوبانىڭ عىلىمي جەتەكشىسى – ينفورماتيكا جانە اقپاراتتىق تەحنولوگيالار كافەدراسىنىڭ دوتسەنتى, PhD ءادىلجان كەرەەۆ. ونىڭ ايتۋىنشا, بۇل جوبا عىلىم مەن پراكتيكانىڭ توعىسقان ناقتى ناتيجەسى.
«جاساندى ينتەللەكت نەگىزىندەگى بۇل باعدارلاما سپورتتاعى جەكە دايىندىقتى جاڭا دەڭگەيگە كوتەرۋگە مۇمكىندىك بەرەدى. ەڭ ماڭىزدىسى – ستۋدەنتتەر ناقتى وندىرىستىك تاپسىرمالاردى شەشۋ ارقىلى زاماناۋي تەحنولوگيالاردى تاجىريبەدە مەڭگەرىپ جاتىر. جوبا «Iron-BARS» جاۋاپكەرشىلىگى شەكتەۋلى سەرىكتەستىگىنىڭ تاپسىرىسىمەن ازىرلەنىپ وتىر», دەيدى جوبا جەتەكشىسى.
جوبانى ىسكە اسىرۋعا «ەسەپتەۋ تەحنيكاسى جانە باعدارلامالىق قامتاماسىز ەتۋ» ءبىلىم بەرۋ باعدارلاماسىنىڭ ستۋدەنتتەرى ەرلان ايمۇقانوۆ پەن كيريلل پيليپەنكو قاتىسىپ جاتىر. كيريلل پيليپەنكونىڭ ايتۋىنشا باعدارلامانىڭ قولدانۋ اياسى كەڭ.
«جۇيە كاسىبي سپورتشىلارعا دا, سپورتپەن اۋەسقوي تۇردە اينالىساتىن ادامدارعا دا بەيىمدەلە الادى. باعدارلاما پايدالانۋشىنىڭ دەڭگەيىنە قاراي جەكە ۇسىنىم بەرەدى», دەيدى ستۋدەنت.
ال ورىنداۋشى ەرلان ايمۇقانوۆ: «باعدارلاما كومپيۋتەرلىك كورۋ تەحنولوگياسى ارقىلى ادامنىڭ قوزعالىسىن ناقتى ۋاقىت رەجيمىندە تانۋعا نەگىزدەلگەن. بۇل جوبا بىزگە ماشينالىق وقىتۋ مەن دەرەكتەردى تالداۋ ادىستەرىن پراكتيكادا قولدانۋعا مۇمكىندىك بەرەدى. جاساندى ينتەللەكت جاتتىعۋ ساپاسىن ارتتىرۋعا ناقتى ۇلەس قوسا الادى», دەيدى.
مەملەكەت باسشىسى قاسىم-جومارت توقاەۆ جاساندى ينتەللەكتىنى عىلىم مەن يننوۆاتسيانى دامىتۋدىڭ نەگىزگى تەتىگى بولۋ قاجەت ەكەنىن اتاپ وتكەن ەدى. پرەزيدەنتتىڭ ايتۋىنشا, جاساندى ينتەللەكت سالاسىنداعى عىلىمي زەرتتەۋلەر مەن كادر دايارلاۋ – ەل دامۋىنىڭ ستراتەگيالىق باعىتى.
وسى تۇرعىدان العاندا, ق.جۇبانوۆ اتىنداعى اقتوبە وڭىرلىك ۋنيۆەرسيتەتىندە جۇزەگە اسىرىلىپ جاتقان بۇل جوبا ەلىمىزدەگى قولدانبالى جاساندى ينتەللەكت زەرتتەۋلەرىن دامىتۋعا, جاس عالىمدار مەن ستۋدەنتتەردىڭ عىلىمي الەۋەتىن ارتتىرۋعا باعىتتالعان ماڭىزدى باستامالاردىڭ ءبىرى.
