شوتلانديالىق كلۋب يسلام چەسنوكوۆتىڭ رەسمي تۇردە كومانداعا قوسىلعانىن جاريالادى. 26 جاستاعى فۋتبولشى جاڭا كلۋبىمەن 2028 جىلدىڭ جازىنا دەيىن كەلىسىمشارتقا قول قويدى. ول «حارتسقا» قوستانايلىق «توبىل» كلۋبىنان ەركىن اگەنت رەتىندە اۋىستى.
وسىلايشا, يسلام چەسنوكوۆ «حارتس» تاريحىنداعى جانە جالپى شوتلانديا چەمپيوناتىنداعى العاشقى قازاقستاندىق فۋتبولشى اتاندى. جاڭا كومانداسىندا ول 99-نومىرمەن وينايدى.
«حارتس» – شوتلانديانىڭ ەڭ تيتۋلدى كلۋبتارىنىڭ ءبىرى. كوماندا ەل بىرىنشىلىگىندە ءتورت رەت چەمپيون اتانىپ, سەگىز مارتە شوتلانديا كۋبوگىن جەڭىپ العان. بيىلعى ماۋسىمدا 20 تۋردان كەيىن كلۋب 44 ۇپاي جيناپ, تۋرنير كەستەسىندە كوش باستاپ تۇر.
يسلام چەسنوكوۆ – وسكەمەندىك «التاي» كلۋبىنىڭ تۇلەگى. ول كاسىبي مانسابىن 2018 جىلى جاستار قۇرامىندا باستاپ, 2020 جىلعى 15 قىركۇيەكتە «تۇرانعا» قارسى ويىندا نەگىزگى قۇرامدا العاش رەت الاڭعا شىقتى.
2021 جىلدىڭ ساۋىرىندە فۋتبولشى بەلارۋستىڭ بەلشينا كلۋبىنا اۋىستى. جوعارى ليگادا 2022 جىلدىڭ 20 ناۋرىزىندا موگيليوۆتىك «دنەپرگە» قارسى ماتچتا دەبيۋت جاسادى. ال العاشقى گولىن سول جىلدىڭ 21 مامىرىندا «يسلوچ» قاقپاسىنا سوقتى. بەلارۋس كلۋبى ساپىندا بارلىق تۋرنيردە 59 ماتچ وتكىزىپ, 11 گول مەن 11 ناتيجەلى پاسقا اۆتور بولدى.
2023 ماۋسىمىنان باستاپ يسلام چەسنوكوۆ «توبىل» ساپىندا ويناپ, 92 ماتچتا 29 گول سوعىپ, 15 گولدىق پاس بەرگەن.
ەندى جەرلەس فۋتبولشىمىز مانسابىن شوتلانديا چەمپيوناتىندا جالعاستىرىپ, ەل فۋتبولى تاريحىندا جاڭا بەلەسكە قادام باسپاق.
