- «Transferroom» پورتالى جىل قورىتىندىسىندا 21 جاسقا دەيىنگى فۋتبولشىلاردىڭ اراسىنان ۇزدىكتەردى انىقتادى. ءبىر قۋانتارلىق جايت, وسى رەيتينگىدە ەلىمىزدىڭ ۇلتتىق قۇراماسى مەن الماتىنىڭ «قايرات» كلۋبىنىڭ 17 جاستاعى شابۋىلشىسى داستان ساتباەۆ كوش باستاپ تۇر. ەكىنشى, ءۇشىنشى ورىنداردا – گوندۋراستىق دەرەك مونكادا («وليمپيا») مەن بوليۆيالىق ەسكلەيزون فرەيتا («بوليۆار»).
- ءباا-ءنىڭ فۋدجەيرا قالاسىندا سەمسەرلەسۋدەن جاسوسپىرىمدەر اراسىنداعى الەم كۋبوگىنىڭ كەزەڭدىك سايىسى اياقتالدى. جارىستىڭ العاشقى كۇنى سوفيا اقتاەۆا راپيرادان كۇمىس مەدال جەڭىپ الدى. باستاپقى باسەكەلەردە بارلىق قارسىلاسىنان باسىم تۇسكەن ول جارتىلاي فينالدا قىتايلىق حۋ بەينيدى 15:8 ەسەبىمەن قاپى قالدىردى. فينالدا وتانداسىمىز رەسەيلىك ستەفانيا چاسوۆنيكوۆاعا ەسە جىبەردى – 11:15. جارىستىڭ سوڭعى كۇنى تيموفەي سەمەنوۆ قولا جۇلدە ەنشىلەدى.
- «استانا» كلۋبى ينۆەستورلارىنىڭ ءبىرى رەتىندە وليگارح ايدىن راقىمباەۆتىڭ ەسىمى اتالىپ جاتىر. «BI Group» كومپانياسىنىڭ باسشىسى ەلوردالىق كلۋبقا قارجىلاي كومەك كورسەتىپ قانا قويماي, جاڭا, زاماناۋي تالاپتارعا ساي فۋتبول اكادەمياسىنىڭ ىرگەتاسىن قالاۋدى جوسپارلاپ وتىر.
- تەننيستەن ەلىمىزدىڭ ەكىنشى راكەتكاسى يۋليا پۋتينتسەۆا بريسبەندەگى (اۋستراليا) WTA 500 ءتۋرنيرىنىڭ ىرىكتەۋ سىنىنان وتە الماعان ەدى. دەگەنمەن چەحيالىق كارولينا پليشكوۆانىڭ وسى جارىسقا قاتىسۋدان باس تارتقانىنىڭ ارقاسىندا وعان جاسىل قۇرلىقتا قالۋعا تاعى ءبىر مۇمكىندىك تۋدى. ونى يۋليا ۇتىمدى پايدالاندى. تۇساۋكەسەر كەزدەسۋىندە امەريكالىق حەيلي ءباپتيستى 6:2, 6:4 ەسەبىمەن ۇتتى. ەندى ۋكراينالىق مارتا كوستيۋكپەن شەبەرلىك بايقاسادى. باسەكەنى ەكىنشى كەزەڭنەن باستايتىن ەلەنا رىباكينا قىتايلىق چجان شۋايمەن كۇش سىناسادى. سول سەكىلدى اننا دانيلينا مەن سەربيالىق الەكساندرا كرۋنيچ جۇبى 1/8 فينالدا امەريكالىق سوفيا كەنين مەن دەزيرە كراۆچيكتى 7:6, 6:4 ەسەبىمەن ەڭسەردى. شيرەك فينالدا ولاردى رەسەيدىڭ قوس جۇلدىزى ەكاتەرينا الەكساندروۆا مەن ميررا اندرەەۆا كۇتىپ تۇر.
- جارتىلاي ورتا سالماقتاعى UFC-ءدىڭ ەكس-چەمپيونى دجەك دەللا ماددالەنا شاۆقات راحمونوۆپەن ايقاسقىسى كەلەتىنىن مالىمدەدى. 29 جاستاعى اۋستراليا سپورتشىسىنىڭ ارالاس جەكپە-جەكتى سەرىك ەتكەنىنە 10 جىل بولدى. سول ارالىقتا 21 كەزدەسۋ وتكىزگەن ول 19 مارتە جەڭىسكە جەتتى. 14 كەزدەسۋدى مەرزىمىنەن بۇرىن اياقتادى. دجەك سپورتتىق مانسابىن باستاعان بەتتە ەكى رەت جەڭىلگەن. ودان كەيىن توعىز جىلدان اسا ۋاقىت بويى ەشكىمگە دەس بەرمەدى. بىراق بىلتىر قاراشا ايىنىڭ بەل ورتاسىندا رەسەيلىك يسلام ماحاچەۆتەن ۇتىلىپ, چەمپيوندىق بەلبەۋىنەن ايىرىلدى. بۇل كۇندەرى ماددالەنا UFC رەيتينگىندە ءبىرىنشى ورىندا, شاۆقات ەكىنشى ساتىدا تۇر.
