كەڭەس وداعىنىڭ باتىرىنا ءمۇسىن مەن مەموريالدىق كەشەن ورناتىلدى

پەتروپاۆل. 12 مامىر.  «زەنچەنكو جانە ك» كومانديتتىك سەرىكتەستىگىنىڭ باس ديرەكتورى گەننادي زەنچەنكونىڭ باستاماسىمەن قىزىلجار اۋدانىنىڭ نوۆونيكولسكوە ەلدى مەكەنىندە كەڭەس وداعىنىڭ باتىرى يۆان كۋرەنكوۆقا ارنالعان مەموريالدىق كەشەن مەن ءمۇسىن بوي كوتەردى. بۇل تۋرالى قىزىلجار اۋداندىق اكىمدىگىنىڭ ءباسپاسوز قىزمەتى حابارلادى. ي. كۋرەنكوۆ ارميا قاتارىنا 1937 جىلى شاقىرىلعان. سوعىسقا العاشقى كۇندەردەن باستاپ قاتىسىپ, ماسكەۋ مەن كۋرسك ءيىنى شايقاستارىندا ەرلىك ۇلگىلەرىن كورسەتكەن. ال دنەپردەن ءوتۋ كەزىندەگى جانقيارلىق باتىرلىعى ءۇشىن كىشى لەيتەنانت كەڭەس وداعىنىڭ باتىرى اتاعىنا يە بولادى. بۇدان باسقا «قىزىل جۇلدىز», قىزىل تۋ وردەندەرىمەن ماراپاتتالادى. ءومىرىنىڭ سوڭعى جىلدارىن نوۆونيكولسكوە اۋىلىندا وتكىزگەن. جيىندى قازاقستاننىڭ ەڭبەك ەرى گ. زەنچەنكو اشىپ, جەرلەستەرىن ايتۋلى وقيعامەن قۇتتىقتادى.  سالتاناتتى راسىمگە جينالعان جۇرتشىلىق, قوعامدىق ۇيىم وكىلدەرى, وقۋشىلار مەموريالدىق كەشەنگە گۇل شوقتارىن قويىپ, ارۋاققا باس ءيدى. ءومىر ەسقالي. دەرەك, سۋرەت: سولتۇستىك قازاقستان وبلىسى قىزىلجار اۋدانى اكىمدىگىنىڭ ءباسپاسوز قىزمەتى.