فوتو: Oqu-agartu ministrligi
20 وڭىردەن 1700-گە جۋىق پەداگوگ قاتىسىپ جاتىر
20 وڭىردە ءوتىپ جاتقان سەمينارلار «زاماناۋي مەكتەپ زەرتحاناسى: مۇعالىمگە ارنالعان پراكتيكالىق داعدىلار» جانە «تاربيە ەكوجۇيەسى: پراكتيكالىق شەشىمدەر» تاقىرىپتارىنا ارنالعان. وعان 170 كەلەشەك مەكتەبىنەن مەكتەپ ديرەكتورى جانە ورىنباسارلارى, وعان قوسا, فيزيكا, حيميا, بيولوگيا, ينفورماتيكا پاندەرى, STEAM جانە روبوتوتەحنيكا كابينەتتەرىنىڭ 1700-گە جۋىق پەداگوگى قاتىسىپ جاتىر.
170 «كەلەشەك مەكتەبىندە» وقۋ پروتسەسى باستالعان
ەستەرىڭىزگە سالايىق, پرەزيدەنتتىڭ تاپسىرماسىمەن «كەلەشەك مەكتەپتەرى» ۇلتتىق جوباسى جۇزەگە اسىرىلىپ جاتىر. جوبا شەڭبەرىندە 460 مىڭ وقۋشىنى قامتيتىن 217 مەكتەپ سالىندى. ونىڭ 84-ءى اۋىلدا اشىلدى. مەكتەپتەردىڭ 170-ىندە وقۋ پروتسەسى باستالدى. بۇل يننوۆاتسيالىق ءبىلىم ورىندارىنىڭ بۇرىنعى تيپتىك مەكتەپتەردەن كولەمى 15-20%-عا ۇلكەن, تەحنيكالىق جابدىقتالۋ دەڭگەيى 4 ەسە جوعارى. بارلىق كەلەشەك مەكتەپتەرى فيزيكا, حيميا, بيولوگيا, ەڭبەككە باۋلۋ, مۋزىكا, حورەوگرافيا زالى, STEM-زەرتحانالارى مەن روبوتوتەحنيكا كابينەتتەرى, كوۆوركينگ جانە سپورت زالدارىمەن جابدىقتالعان.
ساپالى ءبىلىم – تىڭ ۇلگى
بۇگىندە نەگىزگى ماقسات وقۋشىلاردىڭ تۇرعىلىقتى جەرىنە, وتباسى جاعدايىنا قاراماستان ساپالى ءبىلىم الۋىنا تولىققاندى جاعداي جاساۋ. بولاشاقتا «كەلەشەك مەكتەپتەرىنىڭ» ستاندارتتارى, ادىستەمەسى, باسقارۋ جۇيەسى ەلىمىزدىڭ بارلىق مەكتەپتەرىنىڭ دامۋىنا نەگىز بولادى.
