فوتو: ءماجىلىستىڭ ءباسپاسوز قىزمەتى
پوليگون باياندى اۋىلىنان وڭتۇستىك-باتىسقا قاراي 2,5 كم جەردە, اقتاۋ حالىقارالىق اۋەجايىنان 21 كم تۇستا ورنالاسقان. جوبالىق اۋماعى – 25 گەكتار, ەسەپتى پايدالانۋ مەرزىمى – 30 جىل. قازىرگى تاڭدا جەكە كاسىپكەرلەردىڭ جۇمىسى ەسەبىنەن پوليگونعا تۇسەتىن قالدىقتىڭ شامامەن 40 پايىزى قايتا وڭدەۋگە جىبەرىلەدى. ءماجىلىستىڭ ەكولوگيا ماسەلەلەرى جانە تابيعاتتى پايدالانۋ كوميتەتىنىڭ توراعاسى بۇل شارالاردىڭ ءوزى دە ءماجبۇرلى سيپاتتا ەكەنىن جانە تولىققاندى قايتا وڭدەۋ جۇيەسىن الماستىرا المايتىنىن اتاپ ءوتتى.
ەدىل ءجاڭبىرشيننىڭ ايتۋىنشا, دەپۋتاتتاردىڭ باستاماسىمەن ماجىلىستە ەكولوگيا ماسەلەلەرىنە قاتىستى تۇزەتۋلەر ازىرلەنىپ جاتىر.
«جاڭا زاڭ جوباسى قالدىقتاردى باسقارۋ جۇيەسىن جەتىلدىرۋگە, قايتا وڭدەۋگە ارنالعان ەكونوميكالىق ىنتالاندىرۋ تەتىكتەرىن ەنگىزۋگە جانە ۋتيل تولەمدەرىنە قاتىستى تاسىلدەردى قايتا قاراۋعا باعىتتالعان. ەكولوگيا – ابستراكتىلى تاقىرىپ ەمەس. پرەزيدەنت «Turkistan» گازەتىندە جاريالانعان سۇحباتىندا ايتقانداي, تازالىق ءبىزدىڭ ۇلتتىق مەنتاليتەتىمىزدىڭ وزەگىنە اينالۋعا ءتيىس. سول ءۇشىن دە ءبىزدىڭ پارتيامىز ەكولوگيا ماسەلەسىنە ەرەكشە كوڭىل بولەدى. «تازا بەيسەنبى» پارتيالىق اكتسياسى اياسىندا ەكى جىلعا جەتپەيتىن ۋاقىتتا ەل بويىنشا 190 مىڭ توننادان استام قوقىس جينالدى», دەدى دەپۋتات.
دەپۋتات ماڭعىستاۋ وبلىسىندا قالدىقتاردى باسقارۋ ماسەلەسى جالپى العاندا ءالى دە وتكىر پروبلەمالاردىڭ ءبىرى بولىپ وتىرعانىن اتاپ ءوتتى. ونىڭ ايتۋىنشا, ايماقتىڭ كليماتتىق ەرەكشەلىكتەرىن, قۇرىلىس تىعىزدىعىن جانە كوشى-قون ءوسىمىن ەسكەرە وتىرىپ, قوقىستى سۇرىپتاۋ مەن قايتا وڭدەۋدى دامىتۋ پوليگوندار تولىپ كەتكەننەن كەيىن ەمەس, زاڭنامالىق وزگەرىستەرمەن قاتار جۇرۋگە ءتيىس.
ءبىر كۇن بۇرىن ەدىل جاڭبىرشين جەرگىلىكتى ءماسليحاتتاردىڭ توراعالارىمەن جانە دەپۋتاتتارىمەن كەزدەسۋ وتكىزدى. كەزدەسۋ بارىسىندا ول ماجىلىستە قابىلدانعان جانە ازىرلەنىپ جاتقان, ازاماتتاردىڭ ءومىر ساپاسىن ارتتىرۋعا باعىتتالعان زاڭدار تۋرالى, سونداي-اق نەگىزگى سالالىق ماسەلەلەر بويىنشا جۇرگىزىلگەن تالدامالىق جانە مونيتورينگتىك جۇمىستاردىڭ ناتيجەلەرى جونىندە كەڭىنەن باياندادى.
ايماقتاردى دامىتۋ, تىرشىلىكتى قامتاماسىز ەتۋ نىساندارىن – سۋ, جىلۋ جانە گازبەن جابدىقتاۋدى جاڭعىرتۋ, ەنەرگەتيكالىق ينفراقۇرىلىمدى, سونىڭ ىشىندە ماڭعىستاۋ اتوم ەنەرگەتيكالىق كومبيناتىن قولداۋ ماسەلەلەرىنە, سونداي-اق ەكولوگيا, جەر قويناۋىن پايدالانۋ, ازىق-ت ۇلىك قاۋىپسىزدىگى, دەنساۋلىق ساقتاۋ جانە ءبىلىم بەرۋ سالالارىنا ەرەكشە نازار اۋدارىلدى. ءوز كەزەگىندە ءماسليحات دەپۋتاتتارى مەكتەپتەر مەن جولداردىڭ جاي-كۇيىنەن باستاپ تاريحي مۇرانى ساقتاۋ مەن ەكولوگيالىق پروبلەمالاردى شەشۋگە دەيىنگى وزەكتى ماسەلەلەردى كوتەردى.
ايتىلعان بارلىق ماسەلەنى دەپۋتات جەكە باقىلاۋىنا الدى.
