پەتروپاۆل. 12 مامىر. سەرگەەۆكا قالاسىندا № 6637 اسكەري ءبولىمنىڭ بۇرىنعى جاۋىنگەرى قاعازبەك نۇرسەيىتوۆتىڭ قۇرمەتىنە مەموريالدىق ەكەرتكىش بوي كوتەرىپ, شىرشا كوشەتتەرى وتىرعىزىلدى. بۇل تۋرالى egemen ءتىلشىسى حابارلادى.
شىعىس قازاقستان وبلىسى ريددەر قالاسىنىڭ تۋماسى ق. نۇرسەيىتوۆ وتان الدىنداعى ازاماتتىق مىندەتىن وتەۋ ءۇشىن 1961 جىلى اسكەر قاتارىنا شاقىرتىلادى. پەتروپاۆل قالاسىنداعى № 6637 اسكەري ءبولىمنىڭ قۇرامىنا جىبەرىلگەن ول بورىشىن شالعايداعى سەرگەۆكا قالاسىندا وتەيدى. ءۇش جىلدىڭ ىشىندە ءوزىن ۇلگىلى سارباز رەتىندە كورسەتە بىلەدى.
ەكى مۇشەلگە تولعان ازامات 1964 جىلدىڭ 21 ماۋسىمىندا تۇزەتۋ مەكەمەسىنەن قاشقان اسا قاۋىپتى قىلمىسكەردى قۇرىقتاۋ جولىندا ەرلىكپەن قازا تابادى. سودان بەرى ونىڭ ەرلىگى جاستارعا ۇلگى ەتىلىپ كەلەدى. ەسىمى قوعامدىق ءتارتىپ كۇزەتىنىڭ «قۇرمەت كىتابىنا» جازىلىپ, جەكە قۇرام تىزىمىندە ماڭگىلىككە قالدىرىلادى. «ەرلىگى ءۇشىن» مەدالىمەن ماراپاتتالادى.
مەموريالدىق تاقتانىڭ اشىلۋ سالتاناتىنا وتستاۆكاداعى گەنەرال-مايور بوريس تسحاي, № 6637 اسكەري ءبولىمنىڭ كومانديرى اقيقات جۇماحانوۆ, شال اقىن اۋدانىنىڭ اكىمى مارات وماروۆ, قۇرىلىم وفيتسەرلەرى مەن جاۋىنگەرلەرى جينالىپ, باتىر وعلاننىڭ اۋراعىنا تاعزىم ەتتى.
ءومىر ەسقالي.
دەرەك, سۋرەت: egemen.kz
