استانا قالاسىندا ماجىلىستەگى «Amanat» پارتياسى فراكتسياسىنىڭ دەپۋتاتتارى وتان سوعىسى ارداگەرلەرىنە ارنالعان ورتالىق كلينيكالىق گوسپيتال ۇجىمىمەن كەزدەستى. سەناتور گەننادي شيپوۆسكيح جانە ماجىلىسمەندەر پاۆەل كازانتسەۆ, سامات نۇرتازا, مارات باشيموۆ, داۋلەت تۇرلىحانوۆ ونداعان جىل بويى ۇلى وتان سوعىسىنىڭ ارداگەرلەرىنە, تىل ەڭبەككەرلەرىنە جانە ولارعا تەڭەستىرىلگەن ازاماتتارعا مامانداندىرىلعان كومەك كورسەتەتىن گوسپيتالدىڭ جۇمىسىمەن تانىستى.
جيىندا گەرونتولوگيا مەن گەرياتريانى دەربەس مەديتسينالىق باعىت رەتىندە دامىتۋ, كەشەندى گەرياتريالىق باعالاۋ مەن پانارالىق ءتاسىلدى ەنگىزۋدىڭ ماڭىزدىلىعى ايتىلدى. «Amanat» پارتياسى فراكتسياسى باسشىسىنىڭ ورىنباسارى پاۆەل كازانتسەۆ حالىقتىڭ قارتايۋى جاعدايىندا ەگدە جاستاعى ازاماتتارعا قولجەتىمدى ءارى ساپالى مەديتسينالىق كومەك كورسەتەتىن جۇيەلى زاڭنامالىق شەشىمدەردىڭ ماڭىزىن اتاپ ءوتتى. كەزدەسۋدە مەديتسينا قىزمەتكەرلەرىن قورعاۋعا باعىتتالعان زاڭنامالىق باستامالار دا ءسوز بولدى.
سونداي-اق ءماجىلىس دەپۋتاتتارى شىعىس قازاقستان وبلىسىنىڭ التاي قالاسىنداعى سۋ جەلىلەرىنىڭ جاڭعىرتىلۋىن تەكسەردى. بۇگىندە التاي قالاسىندا سۋ قۇبىرى جەلىلەرىن جاڭعىرتۋ جۇمىسى 95 پايىزعا اياقتالعان. جوبا ىسكە قوسىلعاندا 9 420 تۇتىنۋشى ساپالى اۋىزسۋمەن قامتىلادى. الايدا نىساندى تولىق پايدالانۋعا بەرۋگە 60 جىل بۇرىن سالىنعان توزىعى جەتكەن قالاىشىلىك قۇبىرلاردىڭ توزىعى قولبايلاۋ بولىپ وتىر ەكەن. التاي اۋدانى اكىمىنىڭ ورىنباسارى زاڭعار ءشاۋحيننىڭ ايتۋىنشا, ەسكى شويىن قۇبىرلاردىڭ جەكەلەگەن بولىكتەرىن اۋىستىرۋ ءۇشىن شامامەن 2 ملرد تەڭگە كولەمىندە قوسىمشا قارجى قاجەت. سۋ جەلىلەرىن جاڭعىرتۋ جۇمىسى «Amanat» پارتياسىنىڭ سايلاۋالدى باعدارلاماسى اياسىندا جۇزەگە اسىرىلىپ جاتىر. جوبانىڭ جالپى قۇنى – 2,6 ملرد تەڭگە. بۇل قاراجاتقا 110,5 شاقىرىم سۋ قۇبىرى جەلىسىن تارتۋ كوزدەلگەن.
وبلىسقا جۇمىس ساپارىمەن كەلگەن ءماجىلىس دەپۋتاتتارى ەرلان سايروۆ پەن ۇلىقبەك تۇماشينوۆ جوبانى تولىق اياقتاۋ ءۇشىن بيۋدجەت قاراجاتىن ءتيىمدى جوسپارلاۋ مەن جۇمىستاردىڭ ساپاسىنا قاتاڭ باقىلاۋ قاجەتتىگىن اتاپ ءوتتى. «مىڭداعان وتباسى تازا اۋىزسۋمەن قامتىلادى. سوندىقتان بۇل جوبانىڭ ساپالى ءارى ۋاقتىلى اياقتالۋى ماڭىزدى. بولىنگەن قاراجاتتىڭ ماقساتتى جۇمسالۋىنا دەپۋتاتتىق باقىلاۋ كۇشەيتىلەدى», دەدى ە.سايروۆ.
الماتى وبلىسىنا جۇمىس ساپارىمەن بارعان ءماجىلىس دەپۋتاتى, جسدپ فراكتسياسىنىڭ مۇشەسى اسحات راقىمجانوۆ قوناەۆ قالاسىنىڭ پروكۋرورى جانىبەك جاقاەۆپەن كەزدەستى. كەزدەسۋدە «قاپشاعاي – التىن الما» تۇتىنۋشىلىق باقشا كووپەراتيۆىنە قاتىستى كوپتەن بەرى شەشىمىن تاپپاي كەلە جاتقان م ۇلىك داۋى تالقىلاندى. تۇرعىنداردىڭ ايتۋىنشا, ۇزىندىعى شامامەن 3,6 شاقىرىم سۋ قۇبىرى جەلىسى ولاردىڭ ءوز قاراجاتى ەسەبىنەن سالىنعانىنا قاراماستان, كەيىننەن كۇماندى راسىمدەر ارقىلى ءۇشىنشى تۇلعالاردىڭ مەنشىگىنە ءوتىپ كەتكەن. ا.راقىمجانوۆ م ۇلىكتى رەسىمدەۋ كەزىندە زاڭ تالاپتارىنىڭ ساقتالۋىنا قاتىستى كۇماندى ماسەلەلەر بار ەكەنىن اتاپ ءوتتى. كەزدەسۋ قورىتىندىسىندا قوناەۆ قالاسىنىڭ پروكۋراتۋراسى ءىستى باقىلاۋعا الىپ, بارلىق ءمان-جايدى قايتا زەردەلەيتىنىن مالىمدەدى.
تارازدا ءماجىلىس دەپۋتاتتارى جاڭا مەكتەپ قۇرىلىسىنىڭ بارىسىمەن تانىستى. تاراز قالاسىندا ءماجىلىس دەپۋتاتتارى گۇلدارا نۇرىم, مۇقاش ەسكەندىروۆ جانە ءابۋتالىپ ءمۇتالى مانشۇك مامەتوۆا اتىنداعى №27 ورتا مەكتەپتىڭ جاڭا وقۋ كورپۋسىنىڭ قۇرىلىس بارىسىن كوردى. جوبا «Amanat» پارتياسىنىڭ سايلاۋالدى باعدارلاماسى اياسىندا جۇزەگە اسىرىلىپ جاتىر. 600 وقۋشىعا ارنالعان ۇشقاباتتى جاڭا كورپۋس قۇرىلىسى بۇگىندە 40 پايىزعا ورىندالعان. قازىر شاتىر جابۋ, ىشكى ارلەۋ جانە اۋماقتى اباتتاندىرۋ جۇمىسى جۇرگىزىلىپ جاتىر. قۇرىلىس كەستە بويىنشا وسى جىلدىڭ قاراشا ايىندا اياقتالۋعا ءتيىس. دەگەنمەن مەردىگەر نىساندى مەجەلى مەرزىمگە جەتكىزبەي, جاڭا وقۋ جىلى باستالعانعا دەيىن پايدالانۋعا بەرۋگە دايىن ەكەنىن مالىمدەدى.
ءماجىلىس دەپۋتاتى گۇلدارا نۇرىم ءبىلىم سالاسىنداعى مەملەكەتتىك ساياساتتىڭ باستى وزەگى – وقۋشى مەن مۇعالىمگە قامقورلىق ەكەنىن اتاپ ءوتتى. ونىڭ ايتۋىنشا, كەيىنگى جىلدارى قابىلدانعان «پەداگوگ مارتەبەسى تۋرالى» زاڭ ناقتى ناتيجەلەر بەرىپ وتىر: مۇعالىمدەردىڭ ورتاشا جالاقىسى ەداۋىر ءوسىپ, جۇكتەمەسى ازايعان, ەڭبەگىنە دەگەن قوعامنىڭ قۇرمەتى ارتقان.
نىساننىڭ جاي-كۇيىن كورگەن دەپۋتاتتار مەكتەپ ينفراقۇرىلىمىن دامىتۋ مەملەكەت ءۇشىن باسىم مىندەتتەردىڭ ءبىرى بولىپ قالا بەرەتىنىن اتاپ ءوتتى. مۇقاش ەسكەندىروۆتىڭ ايتۋىنشا, وڭىردەگى وقۋشىلار سانىنىڭ ءوسۋى ءبىلىم مەكەمەلەرىن دە تەزدەتىپ سالۋدى قاجەت ەتەدى.
پرەزيدەنت تاپسىرماسىنىڭ ورىندالۋ بارىسىمەن تانىسۋ ماقساتىندا ءماجىلىس دەپۋتاتى, «اۋىل» پارتياسىنىڭ توراعاسى سەرىك ەگىزباەۆ اقتوبە وبلىسىنا بارىپ, اۋىل شارۋاشىلىعى سالاسىندا اتقارىلىپ جاتقان جۇمىستى كوردى. ءىسساپار اياسىندا س.ەگىزباەۆ قارعالى اۋدانىنداعى «ستەپنوە» جشس قىزمەتىمەن تانىستى. مال جانە ەگىن شارۋاشىلىعىن قاتار دامىتىپ وتىرعان كاسىپورىن اۋىل تۇرعىندارىن تۇراقتى جۇمىسپەن قامتىپ, جەرگىلىكتى جەردىڭ الەۋمەتتىك-ەكونوميكالىق جاعدايىن جاقسارتۋعا ەلەۋلى ۇلەس قوسىپ كەلەدى. سەرىكتەستىك – 2002 جىلدان باستاپ ەليتالىقتۇقىم وندىرەتىن شارۋاشىلىق. 250 ادامدى جۇمىسپەن قامتىعان جشس 52 مىڭ گەكتار جەردى يگەرىپ وتىر.
سەرىكتەستىك باسشىسى, «اۋىل» پارتياسىنىڭ مۇشەسى امانعوس تولەۋوۆ – بىلتىر مەملەكەت باسشىسىنىڭ جارلىعىمەن «قازاقستاننىڭ ەڭبەك ەرى» اتاعىنا يە بولعان تاجىريبەلى شارۋاشىلىق جەتەكشىسى. كەزدەسۋ بارىسىندا ونىڭ اگرارلىق سالا مەن پارتيا جۇمىسىنا قوسقان ۇلەسى باعالانىپ, «اۋىل» پارتياسىنىڭ 25 جىلدىق مەرەيتويلىق مەدالى سالتاناتتى تۇردە تابىستالدى. مۇنداي قادامدار اۋىل شارۋاشىلىعىندا ادال ەڭبەك ەتىپ جۇرگەن ازاماتتاردىڭ ەڭبەگىن باعالاپ, سالانىڭ دامۋىنا دەگەن سەنىم مەن ىنتانى كۇشەيتە تۇسەدى.
