ەلوردادا مەكسيكانىڭ ەلشىلىگى اشىلادى

سىرتقى ىستەر ءمينيسترى ەرلان ىدىرىسوۆ مەكسيكا پارلامەنتى سەناتى كوميتەتىنىڭ ءتورايىمى, ۇلتتىق قوزعالىس پارتياسىنىڭ مۇشەسى گابريەلا كۋەۆاسپەن كەزدەستى, دەپ حابارلادى قر ءسىم-ءنىڭ ءباسپاسوز قىزمەتى. كەزدەسۋ بارىسىندا تاراپتار ەكىجاقتى ىنتىماقتاستىقتىڭ قازىرگى احۋالى مەن بولاشاق دامۋى ماسەلەلەرىن تالقىلادى. قازاقستان ءسىم باسشىسى اتاپ كورسەتكەندەي, ولار ىلگەرىلەمەلى تۇردە جاڭا دەڭگەيگە ءوتتى. «وعان دالەل رەتىندە ۇستىمىزدەگى جىلى مەكسيكا ۇكىمەتىنىڭ استانادا ەلشىلىگىن اشۋى بولىپ تابىلادى, ءوز كەزەگىمىزدە ءبىز اتالعان ماسەلەگە بارىنشا جاردەمدەسۋگە دايىنبىز», – دەپ اتاپ ءوتتى ە. ىدىرىسوۆ. سونىمەن قاتار, قازاقستان سىرتقى ساياسات ۆەدومستۆوسىنىڭ باسشىسى مۇناي-حيميا, ماشينا جاساۋ, كەن ءوندىرۋ, مەتاللۋرگيا, توقىما جانە تاماق ونەركاسىبىندە مەكسيكامەن تىعىز بايلانىستىڭ ودان ءارى دامۋىنا مۇددەلى ەكەنىن بايانداپ ءوتىپ, مەكسيكالىق جەتەكشى كومپانيالاردى اۋىل شارۋاشىلىعى مەن ازىق-ت ۇلىك وندىرىسىندە قازاقستاندىق بيزنەس­پەن ىنتىماقتاستىققا شاقىردى. قازاقستاننىڭ دسۇ-عا مۇشە بولۋى جونىندەگى كەلىسسوزدەردىڭ اياقتالۋىن ەسكەرە وتىرىپ, ە.ىدى­رىسوۆ پرەزيدەنت ن.نازارباەۆتىڭ الداعى كۇزگە جوسپارلانعان مەكسي­كاعا ساپارى بارىسىندا قوسار­لانعان سالىق سالۋدى بولدىرماۋ جونىندەگى كونۆەنتسيا مەن ءوزارا ينۆەستيتسيالاردى قورعاۋ تۋرالى كەلىسىمگە قول قويۋدى, سونداي-اق, مەكسيكالىق ۆيزانى ەلەكتروندىق راستاۋ جۇيەسىنە قازاقستاندى قوسۋ ماسەلەسىن قاراستىرۋدى ۇسىندى. كەزدەسۋ سوڭىندا مينيستر مەكسيكانىڭ قازاق­ستاننىڭ 2017-2018 جىلدارداعى بۇۇ قاۋىپسىزدىك كەڭەسىنە تۇراقتى ەمەس مۇشەلىگىن قولداعانى ءۇشىن العىسىن ءبىلدىردى. سونداي-اق, قازاقستاننىڭ مەكسي­كانىڭ بۇۇ قاۋىپسىزدىك كەڭەسىندەگى تاجىريبەسىن زەرتتەۋگە ىنتالى ەكەنىن مالىمدەپ, «مۇشەلىككە سايلانۋ – مەملەكەتىمىزدىڭ سىرتقى ساياسي باعىتىنداعى ماڭىزدى ماسەلەلەردىڭ ءبىرى» بولىپ تابىلاتىنىن اتاپ كورسەتتى. ءوز كەزەگىندە گ.كۋەۆاس مەك­سيكا قازاقستاننىڭ ەلدەگى جانە حالىقارالىق ارەناداعى تابىستارىن مۇقيات باقىلاپ وتىرعانىن جانە ەكىجاقتى ىنتىماقتاس­تىق­تى ءتۇرلى سالادا كەڭەيتۋگە, كوپجاق­تى پىشىمدە ءوزارا ىقپالداسۋدى جاڭارتۋعا نيەتتى ەكەنىن ايتتى.