العاش بولىپ 2025 جىلدىڭ جازىندا 32 جاستاعى ناۋرىز مۇقانعاليەۆ جوعالعان. ول اقتاۋ قالاسىنا جۇمىس ىزدەپ كەتكەننەن كەيىن بايلانىسقا شىقپاي قالعان. تۋىستارىنىڭ ايتۋىنشا, ونىڭ WhatsApp مەسسەندجەرى ۇزاق ۋاقىت بويى بەلسەندى بولىپ تۇرعان, الايدا پوليتسيا بۇل قوسىلۋلاردىڭ تەلەفون ارقىلى ەمەس, كومپيۋتەر ارقىلى جۇزەگە اسقانىن انىقتاعان.
كەيىنىرەك ناۋرىزدىڭ اتا-اناسى مەن اپكەسىنىڭ دە حابارسىز كەتكەنى بەلگىلى بولدى. ۇيىندە جارىق ءسونىپ تۇرعان, ۇيالى تەلەفوندار تابىلماعان. اۋلاداعى مالدىڭ ءبىر بولىگى WhatsApp ارقىلى ساتىلىپ, تۇسكەن قاراجات اكەسىنىڭ Kaspi Bank-تەگى ەسەپشوتىنا اۋدارىلعان. الايدا بۇل قاراجات كەيىن پايدالانىلماعان.
2025 جىلدىڭ قاراشا ايىندا تاعى ءبىر دەرەك تىركەلىپ, وتباسىنىڭ تاعى ەكى مۇشەسى – اقبايان جانە ونىڭ كۇيەۋى سۇلتاننىڭ دا جوعالىپ كەتكەنى انىقتالدى. ەرلى-زايىپتى سول كۇنى جولعا شىعىپ, سودان بەرى ۇيلەرىنە ورالماعان. قازىرگى ۋاقىتتا ولاردىڭ كامەلەتكە تولماعان بەس بالاسى تۋىستارىنىڭ قولىندا.
رەسمي مالىمەتكە سايكەس, اتالعان دەرەك بويىنشا قىلمىستىق ءىس تىركەلىپ, جەدەل-تەرگەۋ توبى قۇرىلعان. ىزدەستىرۋ شارالارىنا ىشكى ىستەر مينيسترلىگىنىڭ قىزمەتكەرلەرى دە تارتىلعان. بارلىق مەديتسينالىق مەكەمەلەر, سونىڭ ىشىندە جەكەمەنشىك كلينيكالار تەكسەرىلگەن. سونىمەن قاتار ۇيالى تەلەفون سيگنالدارى قازاقستان اۋماعىندا بىرنەشە رەت تىركەلىپ, سوڭعىسى شىمكەنت قالاسىندا انىقتالعان.
قۇقىق قورعاۋ ورگاندارى رەسپۋبليكا بويىنشا باعدارلار تاراتىپ, ىزدەستىرۋ جۇمىستارىن جالعاستىرۋدا.
قازىرگى ۋاقىتتا ءبىر اۋلەتتىڭ التى ادامىنىڭ قايدا ەكەنى ءالى بەلگىسىز. قۇزىرلى ورگاندار ولاردىڭ امان-ەسەن تابىلۋى ءۇشىن بارلىق قاجەتتى شارالاردى قابىلداپ جاتىر.
بۇعان دەيىن اتىراۋ وبلىسىندا ءبىر وتباسى جۇمباق جاعدايدا جوعالىپ كەتكەنى حابارلاندى.
