قازاقستان قارۋلى كۇشتەرىنىڭ اسكەري قىزمەتشىلەرى اقش-تىڭ اريزونا شتاتىندا ءوتىپ جاتقان حالىقارالىق «Best Warrior» بايقاۋىندا ۇزدىك ناتيجەلەر كورسەتىپ جاتىر.
جىل سايىن اريزوناداعى كەمپ ناۆاحو اسكەري بازاسىندا ۇيىمداستىرىلاتىن بۇل بەدەلدى دوداعا بيىل اقش-تىڭ جەتى شتاتىنان, سونداي-اق فيدجي, گۋام, تونگا جانە فيليپپيننەن كەلگەن ۇزدىك جاۋىنگەرلەر قاتىسۋدا.
بيىل قازاقستاننىڭ نامىسىن 54835-ا اسكەري ءبولىمىنىڭ 3-سىنىپتى سەرجانتى اسلان دارحان مەن 18404 اسكەري ءبولىمىنىڭ 3-سىنىپتى گۆارديا سەرجانتى راۋان توقتاربەكوۆ قورعاپ جاتىر. ەكەۋى دە بۇعان دەيىن رەسپۋبليكالىق جانە حالىقارالىق دەڭگەيدەگى اسكەري جارىستاردا ۇزدىك ناتيجە كورسەتكەن تاجىريبەلى ماماندار.
بايقاۋ باعدارلاماسى
«Best Warrior» سايىسى 10 نەگىزگى باعىت بويىنشا وتەدى:
- ارميالىق جاۋىنگەرلىك فيتنەس تەستى
- تاكتيكالىق مەديتسينا
- قارۋ تۇرلەرىنەن (م-240ۆ, م-4, م-17) اتۋ
- تۇنگى كۇزەت پەن جەرگىلىكتى جەردى باقىلاۋ
- ازيمۋتپەن قوزعالۋ جانە كارتامەن جۇمىس
- ارنايى اسكەري جابدىقپەن 22 شاقىرىمدىق مارش جۇگىرۋ
- پاترۋلدەۋ جانە جاۋىنگەرلىك جاتتىعۋلار
قازاقستاننىڭ اسكەري قىزمەتشىلەرى بايقاۋدا اقش ارمياسىنىڭ قارۋ-جاراعىن قولدانىپ, شەتەلدىك نورماتيۆتەردى ورىنداسا دا جوعارى كاسىبيلىك تانىتىپ كەلەدى. اتاپ ايتقاندا, 3-سىنىپتى سەرجانت اسلان دارحان 800 مەتر قاشىقتىقتى 2 مينۋت 5 سەكۋندتا جۇگىرىپ ءوتىپ, اريزونا شتاتىنىڭ ۇلتتىق گۆاردياسى تاريحىنداعى رەكوردتى جاڭارتتى.
18 مامىرعا دەيىن جالعاساتىن حالىقارالىق بايقاۋ قازاقستان قارۋلى كۇشتەرىنىڭ كاسىبي دەڭگەيىن تاعى ءبىر مارتە دالەلدەپ وتىر. اسكەري دايىندىق پەن جاۋىنگەرلىك قابىلەتتىلىكتى باعالايتىن مۇنداي دودادا ەلىمىزدىڭ وكىلدەرى ناعىز كاسىبي جاۋىنگەرلەر ەكەنىن كورسەتتى.
