قوستاناي. 12 مامىر. قوستانايلىقتار جەڭىس كۇنىن اتاپ ءوتتى. تۇنىمەن, كۇنىمەن قۇيعان اق جاۋىن اتالار رۋحىنا تاعزىم ەتۋدى ماقسات تۇتقان مەرەكەلىك شاراعا كەدەرگى بولعان جوق. مىڭداعان قوستانايلىقتار مايداندا وتان ءۇشىن كەۋدەسىن وققا توقسان اتالارىنىڭ, اكەلەرىنىڭ پورترەتىن كوتەرىپ, ورتالىق الاڭعا كەلدى. بۇل تۋرالى egemen.kz ءتىلشىسى حابارلادى.
وبلىستىق اكىمدىكتىڭ الدىندا ۇلى وتان سوعىسىنداعى اتالار ەرلىگىن پاش ەتەتىن تەاترلاندىرىلعان كورىنىس كورسەتىلدى. كۋرسانتتار جانە سوعىسقا قاتىسقان اتالارىنىڭ پورترەتىن كوتەرگەن قالالىقتار جەڭىس ساياباعىنا قاراي بەت تۇزەدى. وندا بەلگىسىز سولدات پەن ماڭگىلىك وتقا گۇل شوقتارىن قويدى. وبلىس اكىمى نۇرالى سادۋاقاسوۆ سوعىس ارداگەرلەرىن جانە قوستانايلىقتاردى ۇلى جەڭىس كۇنىمەن قۇتتىقتادى. مايدانگەرلەرگە قۇرمەت كورسەتىلدى.
سۇراپىل سوعىستىڭ ءار وتباسىندا بۇگىنگە دەيىن ءىزى بار. اكەسىنىڭ پورترەتىن كوتەرىپ كەلگەندەردىڭ ءبىرى گۇلزيحان اسقارقىزى تولقىپ تۇر ەكەن. ءبىز تىلدەسكەندە كوز جاسىنا ەرىك بەردى.
قوستاناي قالاسىنىڭ تۇرعىنى گۇلزيحان اسقارقىزى: «اكەم اسقار بەكتىباەۆ 17-18 جاس شاماسىندا مايدانعا كەتكەن. ۋكراين مايدانىندا سوعىسىپ, ۆەنگرياعا دەيىن بارعان. سول جەردە اۋىر جارالانعان. سوعىستان كەلگەن سوڭ قالادا پارتيا جانە كاسىپوداق قىزمەتتەرىندە ىستەدى. بىراق سوعىستا العان جاراسى ونىڭ دەنساۋلىعىن ناشارلاتا بەردى. دەنەسىندە قالعان سنارياد جارىقشاقتارىنان 52 جاسىندا قايتىس بولدى. بۇگىن جەڭىس كۇنى جاڭبىردىڭ قۇيىپ تۇرعانىنا قاراماستان اكەمنىڭ ارۋاعى ريزا بولسىن دەپ, ماڭگىلىك وتتىڭ باسىنا كەلىپ تۇرمىن. مىنا قابىرعادا سوعىستان قايتپاعان قانشاما اكەلەرىمىزدىڭ, اتالارىمىزدىڭ اتى جازىلعان. كەۋدەسىن وققا توقسقان سول بوزداقتاردىڭ ارقاسىندا بۇگىنگى بەيبىت كۇننىڭ قىزىعىن كورىپ وتىرمىز», دەدى.
سوعىسقا قوستاناي وبلىسىنان 73500 ادام اتتانعان ەكەن. سونىڭ جارتىسىنان كوبى مايدان دالاسىندا قالعان, تۋعان جەردىڭ توپىراعىن باسقان جوق.
جەڭىس ساياباعىنا جينالعاندار بەلگىسىز سولدات ەسكەرتكىشى جانىنداعى ماڭگىلىك وتتىڭ جانىنا كەلىپ, بۇگىنگى بەيبىت كۇن ءۇشىن فاشيزممەن الىسقان اتالارىمىزدىڭ رۋحىنا تاعزىم ەتتى. جىلداعى ءداستۇر بويىنشا سولدات بوتقاسىنان ءدام تاتتى. ەرلىكپەن قازا تاپقان اتالارىمىزدىڭ بۇگىنگى ۇرپاقتارى سولدات بوتقاسىنان ءدام تاتتى.
ءنازيرا جارىمبەتوۆا.
دەرەك, سۋرەت: egemen.kz
