قاسىم-جومارت توقاەۆتىڭ ايتۋىنشا, زاڭسىز اكتيۆتەردى ەلگە قايتارۋ جونىندەگى جۇمىس ناقتى ناتيجە بەرگەن. باس پروكۋراتۋرا جانىنداعى ارنايى كوميتەت وليگوپوليا وكىلدەرىنەن ءىرى كولەمدە قارجى ءوندىرىپ الدى, ال بۇل قاراجات الەۋمەتتىك جانە كوممۋنالدىق نىساندار سالۋعا باعىتتالدى.
«زاڭسىز اكتيۆتەردى ەلگە قايتارۋ جونىندەگى كوميتەت ۇلكەن جۇمىس اتقارىپ, وليگوپوليا وكىلدەرىنەن 1,3 تريلليون تەڭگەدەن استام قارجى ءوندىرىپ الدى. سونىڭ 1 تريلليون تەڭگەدەن استامى مەملەكەت قازىناسىنا ءتۇستى. ارنايى مەملەكەتتىك قورداعى قاراجات ەسەبىنەن ەلىمىزدە جالپى قۇنى 482 ميلليارد تەڭگە بولاتىن 434 الەۋمەتتىك جانە كوممۋنالدىق نىسان سالىنىپ جاتىر», دەدى پرەزيدەنت.
مەملەكەت باسشىسى بۇل باعىتتاعى جۇمىس ءبىر جولعا قويىلعانىن, ەندى ونى ءبىر ورتالىقتان باسقارۋدىڭ قاجەتتىلىگى جوعىن ايتتى. وسىعان بايلانىستى ينۆەستورلاردىڭ قۇقىعىن قورعاۋعا باسىمدىق بەرىلمەك. ونىڭ سوزىنشە, كۇمان تۋدىرعان اكتيۆ يەلەرىنىڭ ءوزى قارجىسىن ەل ىشىندە ينۆەستيتسيا رەتىندە سالۋعا مۇددەلىلىك تانىتىپ وتىر.
«زاڭسىز اكتيۆتەردى ەلگە قايتارۋ ارقىلى الەۋمەتتىك ادىلدىكتى قالپىنا كەلتىرۋ – كونيۋكتۋرا نە بولماسا جۇرتقا جاعۋ ءۇشىن جاسالعان ساياسي ناۋقان ەمەس, بۇل – مەملەكەتتىڭ مىزعىماس ۇستانىمى. اڭگىمە يندۋلگەنتسيا نەمەسە ىمىرالاسىپ, استىرتىن كەلىسىم جاساۋ تۋرالى بولىپ وتىرعان جوق, ولاي بولۋى مۇلدەم مۇمكىن ەمەس», دەپ ناقتىلادى قاسىم-جومارت توقاەۆ.
پرەزيدەنت قازاقستان زاڭ ۇستەمدىگىن قاتاڭ ۇستاناتىن مەملەكەت رەتىندە ينۆەستورلارمەن اشىق ءارى ادال ديالوگ جۇرگىزۋگە دايىن ەكەنىن دە اتاپ ءوتتى. ونىڭ ايتۋىنشا, الداعى ۋاقىتتا دا ەلدىڭ ينۆەستيتسيالىق تارتىمدىلىعىن ارتتىرۋ, ءىرى جوبالاردى ىسكە اسىرۋ جانە الەۋمەتتىك سالالارعا قارجى تارتۋ باستى باسىمدىق بولىپ قالا بەرەدى.
بۇعان دەيىن مەملەكەت باسشىسى جاڭا سالىق رەفورماسىنا قاتىستى ەل ىشىندە دۇربەلەڭ تۋعىزىپ, جۇرتتى دۇرلىكتىرۋدىڭ ەشقانداي ءجونى جوق ەكەنىن اتاپ وتكەن ەدى.
