فوتو: اشىق دەرەككوز
پرەزيدەنت سوڭعى جىلدارى تاريحتى تالقىلاۋ سانگە اينالعانىن ايتتى. ءتۇرلى پودكاستتار, فيلمدەر, ماقالالار مەن كىتاپتار شىعىپ جاتقانىنان حاباردار ەكەنىن جەتكىزدى.
«ايتسە دە مەملەكەتكە كەسىرى تيەتىنىن جەتە تۇسىنبەي, كوپشىلىكتىڭ كوڭىلىن تابۋ ءۇشىن ويدان شىعارىلعان دەرەكتەر مەن جالعان اقپاراتتار تاراتاتىن, حالقىمىزدىڭ باسىنان وتكەن قيىندىقتارعا وزگە جۇرتتى كىنالايتىن تاريحشىسىماقتار پايدا بولدى. جۇرت ولاردىڭ ساندىراعىنا سەنىپ, وتكەن ءداۋىردىڭ جالعان باتىرلارىن ۇلىقتاي باستادى. مۇنىڭ سوڭى جاقسىلىققا اپارمايدى. بۇل – اقيقات جولى ەمەس, كەرىسىنشە «جالعان تۇسىنىك تۋعىزاتىن تەرىس جول», دەدى پرەزيدەنت.
سونىمەن قاتار مەملەكەت باسشىسى حالىقتى جاۋلاستىراتىن ەمەس, ۇيىستىراتىن قۇندىلىق العا شىعۋ كەرەكتىگىن ەسكەرتتى. بۇل تۇرعىدا حاكىم ابايدىڭ «تولىق ادام» كونتسەپتسياسىنىڭ ءمانى زور ەكەنىن اتاپ ءوتتى
« ۇلى ويشىلدىڭ ۇرپاققا قالدىرعان باعا جەتپەس مۇراسى سانالاتىن «قارا سوزدەرى» ءالى كۇنگە دەيىن وزەكتى بولىپ وتىر. اباي حالقىمىزدىڭ ەڭبەكقور, ءبىلىمپاز جانە ادامگەرشىلىگى جوعارى بولعانىن قالادى. ءمان-ماعىناسى جوق سانسىز پىكىرتالاستان باسقا ۇرپاققا ۇلاعات بولارلىق ءسوز قالدىرماعان بىرقاتار قوعام قايراتكەرلەرىنىڭ مۇراسىنان اباي ءىلىمى الدەقايدا بيىك تۇرعانى انىق. بىردە-ءبىر داۋىردە, اسىرەسە, ساياسي الاساپىراندار كەزەڭىندە كوپىرمە ءسوزدىڭ ەش پايداسى بولماعان», دەدى مەملەكەت باسشىسى.
ەسكە سالايىق, بۇگىن قازاقستان پرەزيدەنتى قاسىم-جومارت توقاەۆ «Turkistan» گازەتىنە كەڭ كولەمدى سۇحبات بەردى.
