مەملەكەت باسشىسىنىڭ تاپسىرماسى بويىنشا 2023 جىلدان باستاپ بەس جىل ىشىندە ەڭ تومەنگى بازالىق زەينەتاقىنى ەڭ تومەنگى كۇنكورىس دەڭگەيىنىڭ 70%-نا دەيىن, ال ەڭ جوعارعىسىن 120%-عا دەيىن جىل سايىن كەزەڭ-كەزەڭىمەن ارتتىرۋ ماسەلەسى جۇزەگە اسىرىلىپ جاتىر.
ماسەلەن, 2026 جىلعى 1 قاڭتاردان باستاپ بازالىق زەينەتاقىنىڭ ەڭ تومەنگى مولشەرى 35 596 تەڭگەنى (ەڭ تومەنگى كۇنكورىس دەڭگەيىنىڭ 70%-ى), ەڭ جوعارى مولشەرى ەڭ تومەنگى كۇنكورىس دەڭگەيىنىڭ 110%-ىنان 118%-ىنا دەيىن ارتىپ, 60 005 تەڭگەنى قۇرايدى.
2019 جىلى زەينەتكەرلىك دەمالىسقا شىققان 70 جاستاعى زەينەتكەردىڭ بيۋدجەتتەن تولەنەتىن زەينەتاقىسىنىڭ مولشەرى 2025 جىلى 171 588 تەڭگەنى قۇراعان, ونىڭ ىشىندە بازالىق زەينەتاقى تولەمى – 50 851 تەڭگە, ىنتىماقتى زەينەتاقى – 120 737 تەڭگە. 2026 جىلعى 1 قاڭتاردان مولشەردىڭ كوبەيۋىنە بايلانىستى وسى زەينەتكەرلەر ءۇشىن زەينەتاقىنىڭ جالپى سوماسى – 192 816 تەڭگەگە دەيىن ۇلعايادى, ونىڭ ىشىندە بازالىق زەينەتاقى – 60 005 تەڭگەنى, ىنتىماقتى زەينەتاقى – 132 811 تەڭگەنى قۇرايدى. اتالعان سومالارعا بىرىڭعاي جيناقتاۋشى زەينەتاقى قورى (بجزق) تولەمدەرى كىرمەيتىنىن اتاپ وتكەن ءجون.
ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگىنشە, 2026 جىلعى 1 قاڭتاردان باستاپ مەملەكەتتىك جاردەماقىلار تومەندەگىدەي مولشەردە كوبەيەدى:
- 1, 2, 3 بالا تۋعاندا بەرىلەتىن جاردەماقى – 149 416 تەڭگەدەن 164 350 تەڭگەگە دەيىن, 4 جانە ودان دا كوپ بالا تۋعاندا – 247 716 تەڭگەدەن 272 475 تەڭگەگە دەيىن كوبەيەدى;
- بالا سانىنا بايلانىستى كوپبالالى وتباسىلارعا بەرىلەتىن جاردەماقى مولشەرى 4 بالاسى بار وتباسىلار ءۇشىن 63 030 تەڭگەدەن 69 330 تەڭگەگە دەيىن, 10 بالاسى بارلارعا – 157 280 تەڭگەدەن 173 000 تەڭگەگە دەيىن ارتادى;
- I توپتاعى مۇگەدەكتىگى بار ادامدارعا ارنالعان جاردەماقى – 101 702 تەڭگەدەن 111 872 تەڭگەگە دەيىن, II توپتاعىلارعا – 81 362 تەڭگەدەن 89 498 تەڭگەگە دەيىن, III توپتاعىلارعا – 55 474 تەڭگەدەن 61 021 تەڭگەگە دەيىن كوبەيەدى.
سونداي-اق مەملەكەتتىك الەۋمەتتىك ساقتاندىرۋ قورىنان (ماسق) تولەنەتىن اسىراۋشىسىنان ايىرىلۋ جانە ەڭبەك ەتۋ قابىلەتىنەن ايىرىلۋ بويىنشا تولەمدەر دە 10%-عا ارتتى. بۇل تولەمدەر مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا بيۋدجەتتەن تولەنەتىن مەملەكەتتىك جاردەماقىلارعا قوسىمشا رەتىندە بەرىلەدى.
