2026 جىلى بۇل جۇمىس جول-قۇرىلىس جۇمىستارىنىڭ بارلىق تۇرلەرىن قامتي وتىرىپ, شامامەن 11 مىڭ شاقىرىم اۆتوموبيل جولىندا جۇزەگە اسىرىلادى.
جالپى كولەمنىڭ 2,3 مىڭ شاقىرىمى قۇرىلىس جانە رەكونسترۋكتسيالاۋ جۇمىستارىنا, 5 مىڭ شاقىرىمى كۇردەلى جانە ورتاشا جوندەۋگە, ال تاعى 4 مىڭ شاقىرىمى جەرگىلىكتى ماڭىزى بار جول جەلىسىن دامىتۋ جوبالارىنا باعىتتالادى.
2026 جىلى قۇرىلىس پەن رەكونسترۋكتسيالاۋ بويىنشا نەگىزگى جوبالاردىڭ قاتارىندا ۇلىتاۋ وبلىسى اۋماعىنداعى ۇزىندىعى 208 شاقىرىم بولاتىن قىزىلوردا – جەزقازعان اۆتوجولىنداعى جۇمىستاردى جالعاستىرۋ, جالپى ۇزىندىعى 896 شاقىرىمدى قۇرايتىن «ورتالىق – باتىس» جوباسىن جۇزەگە اسىرۋ, سونداي-اق 232 شاقىرىمدى قۇرايتىن اقتوبە – ۇلعايسىن, 572 شاقىرىمدىق قاراعاندى – جەزقازعان جانە وزگە دە باعىتتار بويىنشا جوبالار بار.
«2026 جىلى مەملەكەت باسشىسىنىڭ تاپسىرمالارى اياسىندا بىرقاتار ءىرى جوبالاردى جۇزەگە اسىرۋ جوسپارلانعان. بۇل ءبىزدىڭ ترانزيتتىك-كولىكتىك الەۋەتىمىزدى دامىتۋعا قاتىستى. ۇلكەن جوبالاردىڭ قاتارىندا: اقتوبە – ۇلعايسىن, قاراعاندى – جەزقازعان, بەينەۋ – سەكسەۋىل جانە وتە ماڭىزدى باستى جوبا – ورتالىق-باتىس.
بۇگىنگى كۇنى بارلىق جوسپارلانعان ءىس-شارالار مەن قاجەتتى تەحنيكالىق-ەكونوميكالىق نەگىزدەمەلەر الىندى, جۇمىستار شتاتتىق رەجيمدە جۇرگىزىلۋدە, قاجەتتى قارجى كوزدەلگەن», دەپ اتاپ ءوتتى ماقسات قالياقپاروۆ.
ءىرى ەلدى مەكەندەردى اينالىپ وتەتىن جولداردى سالۋ مەن رەكونسترۋكتسيالاۋعا ەرەكشە نازار اۋدارىلادى. اتاپ ايتقاندا, سارىاعاش, قىزىلوردا, پەتروپاۆل جانە رۋدنىي قالالارىنىڭ اينالما جولدارى بويىنشا جوبالاردى جۇزەگە اسىرۋ جوسپارلانىپ وتىر.
سونىمەن قاتار راحمان قاينارلارىنا اپاراتىن جولدى, سونداي-اق پەتروپاۆل – رەسەي فەدەراتسياسىنىڭ مەملەكەتتىك شەكاراسى ۋچاسكەسىن قوسا العاندا, تۋريستىك جانە شەكارالىق باعىتتاردى دامىتۋ جۇمىستارى جالعاسادى.
كۇردەلى جانە ورتاشا جوندەۋ جوبالارىن جۇزەگە اسىرۋ شەڭبەرىندە 2026 جىلى جەزقازعان – پەتروپاۆل, اتىراۋ – ورال, جاڭاوزەن – كەندىرلى, مۇقىر – قۇلسارى, ماكينسك – اقسۋ – تورعاي جانە تاعى دا باسقا باعىتتاردا جول جۇمىستارىن جۇرگىزۋ جوسپارلانعان.
جەرگىلىكتى جول جەلىسى بويىنشا اقتاۋ – فورت-شەۆچەنكو, تۇركىستان – ءشاۋىلدىر, چاپاي – سايقىن جوبالارىن جۇزەگە اسىرۋ, سونداي-اق سەمەي قالاسىندا اۆتوگۋجەۆتىك كوپىر قۇرىلىسىن جالعاستىرۋ كوزدەلۋدە.
سونىمەن قاتار اۆتوجول سالاسىندا زاماناۋي تسيفرلىق جانە تەحنولوگيالىق شەشىمدەردى ەنگىزۋ جۇمىستارى جۇرگىزىلۋدە. قازىرگى ۋاقىتتا اۆتوموبيل جولدارىندا 71 اۆتوماتتاندىرىلعان ولشەۋ ستانساسى ورناتىلعان, ونىڭ ىشىندە 38-ءى رەسپۋبليكالىق ماڭىزى بار جولداردا, 33-ءى جەرگىلىكتى جول جەلىسىندە ورنالاسقان.
الداعى كەزەڭدە ولاردىڭ سانىن 220 بىرلىككە دەيىن ۇلعايتۋ جوسپارلانىپ وتىر. اۆتوماتتاندىرىلعان ولشەۋ ستانسالارىن ورناتۋ جانە پايدالانۋ بويىنشا بىرىڭعاي تەحنيكالىق تالاپتار بەكىتىلىپ, ولار «اكىمشىلىك وندىرىستەردىڭ بىرىڭعاي ءتىزىلىمى» ء(اوبت) پروتسەسسينگتىك ورتالىعىمەن ينتەگراتسيالاندى. سونىڭ ناتيجەسىندە اۆتوماتتاندىرىلعان ستانسالار تىركەگەن سالماق پارامەترلەرىنىڭ بۇزىلۋىنا قاتىستى نۇسقامالار اۆتوماتتى رەجيمدە قالىپتاستىرىلادى.
«جۇزەگە اسىرۋ بولىگىندە بىزدە اۆتوموبيل وتكىزۋ پۋنكتتەرى بويىنشا جاڭعىرتۋ ءجۇرىپ جاتىر. اۋقىمدى جۇمىس باستالدى. 2026-2027 جىلدار ىشىندە ءبىز 33 وتكىزۋ پۋنكتىن تولىق جاڭعىرتۋدى جوسپارلاپ وتىرمىز. 2030 جىلعا قاراي ولاردىڭ وتكىزۋ قابىلەتىن 35 ملن تونناعا دەيىن ۇلعايتۋ مۇمكىندىگىمەن رەكونسترۋكتسيانى تولىعىمەن اياقتايمىز», دەدى ۆيتسە-مينيستر.
2026 جىلى اۆتوجول سالاسىنداعى «e-Joldar» بىرىڭعاي تسيفرلىق جۇيەسىن ىسكە قوسۋ جوسپارلانۋدا. اتالعان جۇيەنىڭ نەگىزگى ماقساتى — ەتالوندىق دەرەكتەردى شوعىرلاندىرۋ جانە ولاردىڭ قوعامدىق باقىلاۋ ءۇشىن اشىقتىعىن قامتاماسىز ەتۋ.
«سونداي-اق بىزدە اۆتوموبيل جولدارى بولىگىندە سالانى تسيفرلاندىرۋ بويىنشا جۇمىستار جۇرگىزىلۋدە. ءبىز قازىر تولىق قالىپتاستىرعان «E-Joldar» اقپاراتتىق جۇيەسىن جۇزەگە اسىرۋدى جوسپارلاپ وتىرمىز: بارلىق قاجەتتى تەحنيكالىق تاپسىرمالار, شارتتار الىندى. كەلەسى جىلدان باستاپ تولتىرۋ باستالادى, بۇل قاجەتتى قۇجاتتارعا, تولقۇجاتتارعا, جوندەۋارالىق مەرزىمدەرگە جالپى قول جەتىمدىلىكتىڭ تولىق بولۋىنا, قوعامدىق باقىلاۋعا, بارلىعىنا قول جەتكىزۋگە مۇمكىندىك بەرەدى», دەپ اتاپ ءوتتى ول.
ۆيتسە-ءمينيستردىڭ ايتۋىنشا, 2026 جىل اۋقىمدى ينفراقۇرىلىمدىق جوبالاردى جۇزەگە اسىرۋدى, قولدانىستاعى جول جەلىسىن جاڭعىرتۋدى جانە زاماناۋي تسيفرلىق شەشىمدەردى ەنگىزۋدى ۇيلەستىرەتىن اۆتوجول سالاسىن دامىتۋدىڭ ماڭىزدى كەزەڭىنە اينالادى. جول سالۋ, جوندەۋ جانە باسقارۋ سالالارىنداعى كەشەندى ءتاسىل اۆتوموبيل جولدارىنىڭ ساپاسى مەن قاۋىپسىزدىگىن ارتتىرىپ قانا قويماي, وڭىرلەردىڭ تۇراقتى دامۋىنا جانە ەلىمىزدىڭ كولىك ينفراقۇرىلىمىن نىعايتۋعا باعىتتالعان ۇزاقمەرزىمدى الەۋمەتتىك-ەكونوميكالىق ناتيجەلەرگە قول جەتكىزۋگە مۇمكىندىك بەرەدى.
«كەلەسى جىلعا اۋقىمدى جۇمىس جوسپارلانعان, مەملەكەت باسشىسى قويعان بارلىق مىندەتتەر مەن ماقساتتار تولىق ورىندالاتىن بولادى», دەپ قورىتىندىلادى ماقسات قالياقپاروۆ.
