ۇلى وتان سوعىسىنداعى جەڭىستىڭ 70 جىلدىعىن اتاپ وتۋگە ارنالعان شارالار باعدارلاماسىنىڭ «جەلبىرە, جەڭىس جالاۋى!» اتتى ادەبي-سازدى كومپوزيتسيا بەتاشارى ناق وسى جەردەن باستالدى. بۇل تۋرالى egemen ءتىلشىسى حابارلادى.
«نۇر وتان» جاستار قاناتىنىڭ بەلسەندىلەرى ء«بىز ماقتان تۇتامىز جانە ۇمىتپايمىز» اكتسياسىن ۇيىمداستىرىپ, جۇرتشىلىققا «جەڭىس لەنتاسىن» تاراتقاننان كەيىن ەسكە الۋ ميتينگىسى بولدى. «ماڭگىلىك الاۋعا» قۇشاق-قۇشاق گۇل دەستەلەرى قويىلىپ, وتان قورعاۋ جولىندا شەيىت بولعان بوزداقتاردىڭ ارۋاقتارىنا تاعزىم ەتىلدى. سوعىس ۋاقىتىنداعى كورىنىستەردى بەينەلەيتىن ساحناگەرلەر وتىرعان اۆتوپويىز, وتتى جىلدارداعى اسكەري ن شەرۋى, قازاقستان رەسپۋبليكاسى ۇلتتىق ۇلانى اسكەري ينستيتۋتى كۋرسانتتارىنىڭ مارش-پارادى قالا تۇرعىندارىنا ەرەكشە اسەر قالدىردى. «ماڭگىلىك پولك» كولونناسىنىڭ قوزعالىسىنا ۇلكەن دە, كىشى دە ەرىپ, پۋشكين – سۇتىشەۆ – جامبىل - قازاقستان كونستيتۋتسياسى كوشەلەرىن بويلاي ءجۇرىپ, مادەنيەت جانە دەمالىس ساياباعىنداعى داڭق وبەليسكىسىنە ايالدادى. بۇل جەردە سوعىس جانە تىل ارداگەرلەرىن جۇرتشىلىق الاۋلاتا-جالاۋلاتا قارسى الىپ, زور قوشەمەت كورسەتتى. س. مۇقانوۆ اتىنداعى قازاق سازدى-دراما تەاترى جانە ن. پوگودين اتىنداعى ورىس دراما تەاترى شىعارماشىلىق ۇجىمدارىنىڭ قاتىسۋىمەن «ول كۇندەردىڭ وشپەس داڭقى» تەاترلاندىرىلعان كورىنىسى قويىلدى. «ماڭگى جاس روتا», «جەڭىس كەسكىنى» اكتسيالارى, «ۇرپاقتار ۇمىتپاسىن» قويىلىمى, تەاترلاندىرىلعان مايدان مينياتيۋرالارى, سولتۇستىكقازاقستاندىق كەڭەس وداعىنىڭ باتىرلارى تۋرالى ء«بىز داڭقتى جەڭىستى ۇمىتپايمىز» كورمەسى, 40-شى جىلداردىڭ بي مارافونى, تاعى باسقا شارالار مازمۇندىلىعىمەن كورەرمەندەردى باۋراپ الدى.
اباي-پۋشكين ەسكەرتكىشى جانىندا كوزى ءتىرى مايدانگەرلەرگە ارنالعان «ەرلىكتەرىڭىزگە تاعزىم ەتەمىز» ادەبي-سازدى كومپوزيتسيا تاماشالانسا, تاۋەلسىز ستەللاسى ماڭايىندا ۇسىنىلعان «اتامنىڭ جەڭىسى – مەنىڭ جەڭىسىم» بالالار كونتسەرتتىك باعدارلاماسى, «جەڭىس رەكوردى» جاستار سپورتتىق اكتسياسى مەرەكە شىرايىن اشا ءتۇستى. 20-شى ىقشام اۋداندا ورنالاسقان جەڭىس ساياباعى دا ەرەكشە دۋمانعا بولەندى. مۇندا داڭق اللاەياسى اشىلدى. ۇلى وتان سوعىسى ارداگەرلەرى مەن قاتىسۋشىلارىنا ارنالعان اسكەري-دالا اسحاناسى جۇمىس ىستەدى. ودان قالالىقتار دا ءدام تاتتى. اسكەري-سپورتتىق ەستافەتا, شاعىن فۋتبولدان جارىستار ۇيىمداستىرىلدى. جەڭىس كۇنىنە وراي ۇيىمداستىرىلعان موتو جانە اۆتوشەرۋلەرگە 20 موتوتسيكل, 80 اۆتوموبيل قاتىسىپ, پەستروە كولى جاعاسىنانا جەڭىس ساياباعىنا دەيىن ءجۇرىپ ءوتتى. ءوڭىردىڭ وزگە جەرلەرىندە دە تويلاۋ شارالارى جان-جاقتى كورىنىس تاپتى. نوۆونيكولسكوە ەلدى مەكەنىندە كەڭەس وداعىنىڭ باتىرى ت.كۋرەنكوۆتىڭ ءمۇسىنى ورناتىلدى. استراحانكا, نوۆويشيم, بەسكول اۋىلدارىندا سكۆەرلەر, وبەليسكىلەر بوي كوتەردى.
ءومىر ەسقالي.
دەرەك, سۋرەت: egemen.kz
