وتپەلى كەزەڭ 2026 جىلعى 1 قاڭتاردان 28 اقپانعا دەيىن بەلگىلەنگەن.
جاڭا سالىق كودەكسىنە سايكەس ارنايى سالىق رەجيمدەرىنىڭ ءۇش ءتۇرى قاراستىرىلعان: ءوزىن-ءوزى جۇمىسپەن قامتىعاندارعا ارنالعان رەجيم, وڭايلاتىلعان دەكلاراتسيا نەگىزىندەگى رەجيم جانە شارۋا نەمەسە فەرمەر قوجالىقتارىنا ارنالعان رەجيم.
ءوزىن-ءوزى جۇمىسپەن قامتىعاندارعا ارنالعان رەجيمدى جەكە كاسىپكەر بولىپ تىركەلمەگەن, جالدامالى قىزمەتكەر ۇستامايتىن جانە ۇكىمەت بەكىتكەن قىزمەت تۇرلەرىن جۇزەگە اسىراتىن جەكە تۇلعالار قولدانا الادى. 2025 جىلى پاتەنت نەمەسە ارنايى ءموبيلدى قوسىمشا ارقىلى جۇمىس ىستەگەن جەكە كاسىپكەرلەر بۇل رەجيمگە كوشۋ ءۇشىن 1 قاڭتار مەن 28 اقپان ارالىعىندا جەكە كاسىپكەر رەتىندە تىركەۋدەن شىعۋى قاجەت. بەلگىلەنگەن مەرزىمدە تىركەۋدەن شىقپاعان نەمەسە رەجيمدى وزگەرتۋ تۋرالى حابارلاما تاپسىرماعان تۇلعالار 1 ناۋرىزدا سالىق ورگاندارى تاراپىنان ەسەپتەن شىعارىلادى. بۇل جاعدايدا ەسەپتەن شىعارۋ كۇنى 2026 جىلعى 1 قاڭتار بولىپ سانالادى.
وڭايلاتىلعان دەكلاراتسيا نەگىزىندەگى ارنايى سالىق رەجيمىنە 2025 جىلى تىركەلگەن شەگەرىمدى نەمەسە بولشەك سالىقتى قولدانعانداردى قوسا العاندا, تالاپتارعا ساي كەلەتىن بارلىق سالىق تولەۋشىلەر وتە الادى. ول ءۇشىن 1 قاڭتار مەن 28 اقپان ارالىعىندا سالىق سالۋ رەجيمى تۋرالى حابارلاما تاپسىرۋ قاجەت.
كوميتەتتىڭ مالىمەتىنشە, 2025 جىلى جالپىعا بىردەي بەلگىلەنگەن سالىق سالۋ ءتارتىبىن قولدانعان, سونىڭ ىشىندە ارنايى سالىق رەجيمىنە سايكەسسىزدىككە بايلانىستى وسى تارتىپكە اۋىسقان سالىق تولەۋشىلەر دە اتالعان مەرزىمدە وڭايلاتىلعان دەكلاراتسياعا كوشۋگە قۇقىلى.
ەگەر 2025 جىلى وڭايلاتىلعان دەكلاراتسيانى تىركەلگەن شەگەرىم نەمەسە بولشەك سالىقپەن قولدانعان سالىق تولەۋشىلەر حابارلاما تاپسىرماسا, ولار 2026 جىلعى 1 ناۋرىزدان باستاپ جالپىعا بىردەي بەلگىلەنگەن سالىق سالۋ تارتىبىنە اۋىستىرىلادى. بۇل ءتارتىپتى قولدانۋ كۇنى 2026 جىلعى 1 قاڭتار بولىپ ەسەپتەلەدى.
مەملەكەتتىك كىرىستەر كوميتەتى كاسىپكەرلەرگە ءوز قىزمەتىنە سايكەس كەلەتىن سالىق رەجيمىن الدىن الا تاڭداۋعا كەڭەس بەردى.
