اقپارات كوزدەرىنىڭ دەرەگىنشە, قازا تاپقانداردىڭ ەكەۋى يراننىڭ باتىسىنداعى لوردەگان قالاسىندا تىركەلگەن. ال بيلىك ورگاندارى باتىستاعى كۋحداشت قالاسىندا ءبىر ادامنىڭ كوز جۇمعانىن راستادى. سونىمەن قاتار Hengaw ۇيىمى ەلدىڭ ورتالىق بولىگىندەگى يسفاحان پروۆينتسياسىندا تاعى ءبىر نارازىلىققا قاتىسۋشىنىڭ وققا ۇشقانىن حابارلادى.
باستاپقىدا بەيبىت سيپاتتا باستالعان نارازىلىق كەيىننەن دەمونسترانتتار مەن قۇقىق قورعاۋ ورگاندارى اراسىندا قاقتىعىستارعا ۇلاسقان. شەرۋلەر جەكسەنبى كۇنى ۇلتتىق ۆاليۋتانىڭ كۇرت قۇنسىزدانۋىنا جانە باعانىڭ جاپپاي وسۋىنە نارازى بولعان ساۋداگەرلەردىڭ باس كوتەرۋىنەن باستالعان.
Fars اگەنتتىگىنىڭ مالىمەتىنشە, لوردەگان قالاسىندا قاۋىپسىزدىك كۇشتەرى «قارۋلى نارازىلىق بىلدىرۋشىلەر» دەپ اتاعان توپپەن قاقتىعىس كەزىندە ەكى ادام قازا تاپقان.
يراننىڭ يسلام رەۆوليۋتسياسى ساقشىلار كورپۋسى كۋحداشت قالاسىندا وزىمەن بايلانىستى «باسيدج» ەرىكتى اسكەري ۇيىمىنىڭ ءبىر مۇشەسى قازا تاۋىپ, تاعى 13 ادامنىڭ جاراقات العانىن حابارلادى. كيرس بۇل جاعدايعا نارازىلىق بىلدىرۋشىلەردى كىنالاپ, ولاردىڭ شەرۋلەردى ءوز ماقساتتارىنا پايدالانعانىن مالىمدەدى.
سونىمەن قاتار ونداعان نارازىلىققا قاتىسۋشى ۇستالعانى حابارلانىپ وتىر.
يرانداعى تارتىپسىزدىكتەر ەل ۇكىمەتى ءۇشىن كۇردەلى كەزەڭدە ءوتىپ جاتىر. باتىس سانكتسيالارى ەكونوميكاعا اۋىر سوققى بولىپ, ينفلياتسيا دەڭگەيى شامامەن 40 پايىزعا جەتكەن. بۇعان قوسا, ماۋسىم ايىندا يزرايل مەن اقش تاراپىنان يراننىڭ يادرولىق ينفراقۇرىلىمى مەن اسكەري باسشىلىعىنا باعىتتالعان اۋە سوققىلارى جاسالعان.
يران ۇكىمەتىنىڭ رەسمي وكىلى فاتيمە موحادجەراني بيلىك وكىلدەرى كاسىپوداقتار مەن ساۋداگەرلەردىڭ وكىلدەرىمەن تىكەلەي ديالوگ جۇرگىزەتىنىن مالىمدەگەن, الايدا ناقتى تەتىكتەرىن اشىپ ايتپادى.
