قازاقستاندا ەڭ ءىرى بيوفارماتسەۆتيكالىق كەشەن سالىنادى

ينۆەستيتسيالىق كەلىسىم

جوبا مەملەكەت باسشىسىنىڭ فارماتسەۆتيكا سالاسىندا وتاندىق ءوندىرىس ۇلەسىن 50%-عا جەتكىزۋ جونىندەگى تاپسىرمالارىن ىسكە اسىرۋ اياسىندا جۇزەگە اسىرىلادى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى.

قۇجاتقا سايكەس, دەنساۋلىق ساقتاۋ مينيسترلىگى مەن Khan Tengri Biopharma جشس اراسىندا «الاتاۋ» ارنايى ەكونوميكالىق ايماعىندا زاماناۋي وندىرىستىك كەشەن سالۋ جونىندەگى ينۆەستيتسيالىق كەلىسىم جوباسى ماقۇلداندى.

58 ءتۇرلى ءدارى-دارمەك وندىرىلەدى

جاڭا كەشەن وزىق تەحنولوگيالارمەن جابدىقتالىپ, 58 ءتۇرلى دارىلىك پرەپاراتتى شىعارۋعا مۇمكىندىك بەرەدى. ەرەكشە نازار تولىق وندىرىستىك تسيكلدى, سونىڭ ىشىندە بەلسەندى فارماتسەۆتيكالىق ينگرەديەنتتەردى (API) ءوندىرۋدى ىسكە قوسۋعا اۋدارىلادى.

وندىرىستىك پورتفەلگە 27 حالىقارالىق پاتەنتتەلمەگەن اتاۋ ەنەدى. ولاردىڭ قاتارىندا – ونكولوگيالىق, اۋتويممۋندىق, سيرەك كەزدەسەتىن, قابىنۋ اۋرۋلارىن ەمدەۋگە ارنالعان پرەپاراتتار بار.

ينۆەستيتسيا جانە ەكسپورت

جوبانىڭ جالپى ينۆەستيتسيا كولەمى 103 ملرد تەڭگەدەن اسادى, ناتيجەسىندە 180-نەن استام تۇراقتى جۇمىس ورنى اشىلادى.

بيوفارماتسەۆتيكالىق كەشەندى ىسكە اسىرۋ ەلدىڭ فارماتسەۆتيكا سالاسىن دامىتۋدا ستراتەگيالىق ماڭىزعا يە. جوبا – جەرگىلىكتى ءوندىرىستى كەڭەيتۋگە, يمپورتقا تاۋەلدىلىكتى ازايتۋعا, الەۋمەتتىك ماڭىزى بار ءدارى-دارمەكتەردى كەزەڭ-كەزەڭىمەن الماستىرۋعا باعىتتالعان.

سونىمەن قاتار وندىرىلەتىن ءونىمنىڭ ءبىر بولىگى ەاەو, تمد ەلدەرىنە جانە تاياۋ شىعىس نارىقتارىنا ەكسپورتتالماق.