قىسقى سپورتتاعى جەڭىس
جىل باسىندا قىتايدىڭ حاربين قالاسىندا قىسقى ازيا ويىندارى جالاۋىن جەلبىرەتتى. جارىسقا 32 ازيا ەلىنەن 1000-نان استام سپورتشى قاتىستى. 7 اقپاندا تۇڭلىگى تۇرىلگەن اق الامان 14 اقپاندا مارەسىنە جەتتى. ەل سەنىمىن ارقالاپ بارعان 137 سپورتشىمىز 4 التىن, 9 كۇمىس, 7 قولا مەدال ولجالادى. بياتلون, كەرلينگ, سكي-الپينيزم, حوككەي, شورت-ترەك, كونكيمەن جۇگىرۋ, شاڭعى جارىسى, فريستايل-اكروباتيكا, تاۋ شاڭعىسى سايىسى, مانەرلەپ سىرعاناۋ سىندى سپورت تۇرلەرىنەن باق سىنادى. تەك جەتى سپورت تۇرىنەن عانا مەدال بۇيىرعان قىز-جىگىتتەر جالپى ەسەپتە ءتورتىنشى ساتىنى مىسە تۇتتى.
قىتاي سپورتشىلارى 32 التىن, 27 كۇمىس, 26 قولا مەدال يەلەنىپ كوش باستاسا, 16 التىن, 15 كۇمىس, 14 قولا جۇلدە العان وڭتۇستىك كورەيا سپورتشىلارى ەكىنشى ساتىعا تۇراقتادى. ۇشتىكتى 10 التىن, 12 كۇمىس, 15 قولا جۇلدە بۇيىرعان جاپونيا سپورتشىلارى تۇيىندەدى.
حاربيندەگى ءدۇبىرلى دودادا ءانۇرانىمىزدى الدىمەن شورت-ترەكتەن ەرلەر كومانداسى شىرقاتتى. 5000 مەترگە ەستافەتالىق سايىستا ءادىل عالياحمەتوۆ, ايبەك ناسەن, ابزال اجعاليەۆ, گلەب يۆچەنكو, دەنيس نيكيشا, مەرسايد جاقسىباەۆ قارا ءۇزىپ, ەل مەرەيىن اسىردى. فريستايل-اكروباتيكا تارتىسىندا شەرزود حاشيرباەۆ پەن رومان يۆانوۆ سينحروندى سەكىرۋ سىنىندا ۇزدىك ناتيجە تىركەپ, قىسقى ازيا ويىندارىنىڭ چەمپيونى اتاندى. قانجىعامىزعا ءۇشىنشى التىن مەدالدى بياتلوننان ۆلاديسلاۆ كيرەەۆ بوكتەرىپ بەردى. ول 10 شاقىرىم قاشىقتىققا سپرينتتىك جارىستا ۇزدىك شىقتى. حوككەيدەن ەرلەر قۇراماسى ىرىكتەۋ كەزەڭدەرىندەگى قارسىلاستارىن ايقىن جەڭىپ, فينالدىق ايقاستا جاپونيا قۇراماسىن 5:0 ەسەبىمەن ەڭسەرىپ, مارتەبەمىزدى اسىردى.
حاربيندە وتكەن اق ازيادانىڭ كۇمىس مەدالىن شورت-ترەكتەن ولگا تيحونوۆا, يانا حان, دەنيس نيكيشا, ءادىل عالياحمەتوۆ ەنشىلەدى. ساڭلاقتار 2000 مەترگە ارالاس ەستافەتادا كۇمىس جۇلدەنى قاناعات تۇتتى. كونكيمەن 100 مەترگە جۇگىرۋدە ەۆگەني كوشكينگە دە كۇمىس مەدال بۇيىردى. شورت-ترەكتەن يانا حان, ولگا تيحونوۆا, ماليكا ەرمەك, زەينەپ قۇمارقان, الينا اجعاليەۆا, مادينا جانبوسىنوۆا باستاعان ايەلدەر قۇراماسى 3000 مەترگە ەستافەتالىق جارىستا كۇمىسپەن كۇپتەلدى. فريستايل-اكروباتيكادان ايانا جولداس, شەرزود حاشيرباەۆ, اسىلحان اسان ارالاس كوماندالار تارتىسىندا كۇمىس مەدال ەنشىلەدى. بياتلوننان ۆاديم كۋرالەس 10 شاقىرىمدىق سپرينتتە كۇمىستى مىسە تۇتتى. شاڭعى جارىسىنان ەلىمىزدىڭ ايەلدەر قۇراماسى (كسەنيا شالىگينا, كاميلا ەلعازينوۆا, انگەلينا شۋرىگا, نادەجدا ستەپاشكينا) 4×5 شاقىرىمدىق ەستافەتادا كۇمىس مەدال يەلەندى. بياتلوننان ەرلەر قۇراماسى 4×7,5 شاقىرىمدىق ەستافەتادا كۇمىس مەدالدى قاناعات تۇتتى. الەكساندر مۋحين, اسەت دۇيسەنوۆ, كيريلل باۋەر, ۆلاديسلاۆ كيرەەۆ باستاعان جىگىتتەر التىنعا سىنىق سۇيەم جەتپەدى. حوككەيدەن ايەلدەر قۇراماسى وڭتۇستىك كورەيانى 3:0 ەسەبىمەن ەڭسەرىپ, كۇمىس مەدالدى يەلەندى.
قىسقى ازيا ويىندارىنىڭ قولا جۇلدەسىن فريستايل-اكروباتيكادان ايانا جولداس يەلەندى. قازاق سپورتىنداعى ساڭلاقتاردىڭ ءىزىن باسقان جاس تالانت جاھاندىق دوداداعى العاشقى مەدالىن يەلەندى. سينحروندى سەكىرۋدە اردانا ماحانوۆا مەن ايانا جولداستىڭ ونەرىن قازىلار قولا جۇلدەگە لايىق دەپ باعالادى.
كونكيمەن جۇگىرۋدە كريستينا سيلاەۆا, داريا ۆاجەنينا, نادەجدا موروزوۆا كوماندالىق سپرينتتە قولا مەدال ولجالادى. شاڭعى جارىسىندا ولجاس كليمينگە 10 شاقىرىم قاشىقتىققا ەركىن ستيلدە جۇگىرۋدە قولا مەدال بۇيىردى. ەرلەر ەستافەتاسىندا كونستانتين بورتسوۆ, نايل باشماكوۆ, ولجاس كليمين, ۆلاديسلاۆ كوۆالەۆ 4×7,5 شاقىرىمدىق تارتىستا قولا مەدال الدى. بياتلوننان ايەلدەر قۇراماسى 4×6 شاقىرىمدىق ەستافەتادا قولا مەدال ەنشىلەدى. كوماندا ساپىنداعى داريا كليمينا, ارينا كريۋكوۆا, ولگا پولتورانينا, ەليزاۆەتا بەلەتسكايا بارىن سالعانىمەن التىنعا قول جەتكىزە المادى.
مانەرلەپ سىرعاناۋ سىنىندا ميحايل شايدوروۆ 246,01 ۇپاي جيناپ, قولا مەدال ولجالادى. جالپى, ميحايل بيىل باسقا دا بىرقاتار بەدەلدى سايىستا توپ جاردى. ول وڭتۇستىك كورەيا ەلىندە وتكەن ءتورت قۇرلىق چەمپيوناتىندا ۇزدىك شىقتى. ودان كەيىن اقش-تىڭ بوستون قالاسىندا وتكەن الەم چەمپيوناتىندا كۇمىس مەدال ولجالاپ, كەلەسى جىلى وتەتىن قىسقى وليمپيادانىڭ ليتسەنزياسىنا يە بولدى.
قىسقى ازيا ويىندارىندا سپورتشىلارىمىزدىڭ جالپى ەسەپتە ءتورتىنشى ساتىعا تۇراقتاۋى ءتاۋىر-اق ناتيجە. دەسە دە كەي سپورت تۇرلەرىنەن ساڭلاقتار جانكۇيەر كۇتكەن مەجەدەن كورىنە المادى.
بوكسشىلار – جىلدىڭ ۇزدىگى
بيىل جۇلدە جاۋدىرعان بوكسشىلارىمىز بولدى. استانادا «World Boxing» ۇيىمى الەم كۋبوگىنىڭ كەزەڭىن وتكىزدى. 30-دان استام ەلدەن 300-گە تارتا بوكسشى جينالىپ, ەلوردا ءتورىن دۇبىرگە بولەدى. ەلىمىزدىڭ بوكسشىلارى بۇل سىندا 8 التىن, 4 كۇمىس, 4 قولا مەدال ەنشىلەدى.
وسى ۇيىم قوڭىر كۇزدىڭ باسىندا انگليانىڭ ليۆەرپۋل قالاسىندا الەم چەمپيوناتىنىڭ وتىن مازداتتى. ءبىزدىڭ قىز-جىگىتتەر جالپى ەسەپتە كوش باستاپ, قازاق بوكسىنىڭ مەرەيىن اسىردى. الۋا بالقىبەكوۆا, ايدا ابىكەەۆا, ناتاليا بوگدانوۆا, سانجار تاشكەنباي, ماحمۇد سابىرحان, تورەحان سابىرحان, ايبەك ورالباي الەم چەمپيونى اتاندى. پاريج جازعى وليمپياداسىنىڭ قولا جۇلدەگەرى نازىم قىزايباي ليۆەرپۋلدەگى الەم چەمپيوناتىنىڭ فينالىندا ءسۇرىنىپ, كۇمىس مەدالدى مىسە تۇتتى. ۆيكتوريا گرافەەۆا مەن ەلدانا ءتالىپوۆا قولا جۇلدە يەلەندى.
بيىل بوكستان الەم چەمپيوناتى ەكى رەت ءوتتى. حالىقارالىق بوكس فەدەراتسياسى (IBA) كوكتەمدە سەربيانىڭ نيش قالاسىندا بوكستان ايەلدەر اراسىنداعى الەم چەمپيوناتىنىڭ جالاۋىن جەلبىرەتتى. ەلدوس سايدالين باپتاپ بارعان بۇرىمدى بوكسشىلارىمىز بۇل الاماننان 3 التىن, 2 كۇمىس, 1 قولا ەنشىلەپ قايتتى.
IBA ەرلەر اراسىنداعى الەم بىرىنشىلىگىن قاراشا ايىندا بىرىككەن اراب امىرلىكتەرىنىڭ دۋباي قالاسىندا وتكىزدى. جىگىتتەرىمىز 3 التىن, 1 كۇمىس, 2 قولا مەدالمەن ورالدى.
بوكسشىلارىمىز ازيا چەمپيوناتىنان دا وراسان ولجامەن ورالدى. 19 جاسقا دەيىنگى جاستار اراسىنداعى قۇرلىق دوداسىن تايلاند ەلى ۇيىمداستىرىپ, بانگكوكتان جىگىتتەر 2 التىن, 5 كۇمىس, 6 قولا مەدال ەنشىلەدى. ال 15 جاسقا دەيىنگى جاسوسپىرىمدەردىڭ ازيا چەمپيوناتى يوردانيانىڭ اممان قالاسىندا ءوتىپ, قازاق بوكسىنىڭ ءىزباسارلارى 6 التىن, 13 كۇمىس, 4 قولا مەدال يەلەندى. 17 جاسقا دەيىنگى بوكسشىلاردىڭ قۇرلىق دوداسى دا امماندا ۇيىمداستىرىلدى. جالىندى جاستارىمىز 10 التىن, 2 كۇمىس, 9 قولا مەدال ولجالادى. بۇعان قوسا باحرەيندە وتكەن جاسوسپىرىمدەر اراسىنداعى ءىىى جازعى ازيا ويىندارىنان بوكسشىلار 5 التىن, 3 كۇمىس, 2 قولا مەدالمەن ورالدى.
قازاق بوكسىنىڭ تاريحىندا ەكى دۇركىن الەم چەمپيونى اتانعان سپورتشىلار ساۋساقپەن سانارلىق قانا ەدى. ناقتى ايتقاندا, سەرىك ساپيەۆ پەن نازىم قىزايبايدىڭ ەنشىسىندە ەكى دۇركىن الەم چەمپيونى اتاعى بار ەدى. سول مەجەگە بيىل الۋا بالقىبەكوۆا, ايدا ابىكەەۆا, سانجار تاشكەنباي, ماحمۇد سابىرحان, ساكەن بيبوسىنوۆ ات بايلاپ, ەكى دۇركىن الەم چەمپيونى اتاندى.
تۋريزم جانە سپورت مينيسترلىگى جىلان جىلىن قورىتىندىلاپ, «ۇزدىك – 2025» سىيلىعىن ساڭلاقتارعا تابىستاعاندا ەلىمىزدىڭ بوكس فەدەراتسياسى ۇزدىك ۇجىم دەپ تانىلدى.
يسلام ىنتىماقتاستىعى ويىنىنداعى ولجامىز
ساۋد ارابياسىنىڭ ەر-رياد قالاسىندا وتكەن VI يسلام ىنتىماقتاستىعى ويىندارىنا قاتىسقان 97 سپورتشى 56 مەدال ەنشىلەدى. جارىستاردا 57 ەلدىڭ سپورتشىلارى باق سىنادى. ءبىزدىڭ ساڭلاقتار 16 سپورت تۇرىنەن سايىسقا ءتۇستى. اتاپ ايتقاندا جەڭىل اتلەتيكا, كيبەرسپورت, سەمسەرلەسۋ, گاندبول, دجيۋ-دجيتسۋ, دزيۋدو, كاراتە, ءجۇزۋ, ۇستەل تەننيسى, تاەكۆوندو, اۋىر اتلەتيكا, ەركىن كۇرەس, گرەك-ريم كۇرەسى, ايەلدەر كۇرەسى, ۋشۋ, مۋاي-تاي سىندى سپورت تۇرلەرىنەن جۇلدەگە تالاستى. ەنشىمىزگە 15 التىن, 20 كۇمىس, 21 قولا مەدال بۇيىردى.
سپورتشىلارىمىز بۇعان دەيىن دە يسلام ىنتىماقتاستىعى ويىندارىنا قاتىسىپ, بايگەلى بولعان. دەگەنمەن بيىلعى دودانىڭ دارەجەسى وزگەشە. ويتكەنى كەيبىر سپورت تۇرىنەن العاش رەت التىن مەدال بۇيىردى. ماسەلەن, دزيۋدو كۇرەسىنەن ارۋنا جانگەلدينا العاشقى التىندى تارتۋ ەتسە, ۇستەل تەننيسىنەن كيريلل گەراسيمەنكو جەكەلەي سايىستا, ەرلەر كومانداسى توپتىق تارتىستا چەمپيون اتاندى. مۋاي-تاي سپورتىنان تۇرار دۇيسەحاننىڭ, سەمسەرلەسۋدەن ەرلەر كومانداسىنىڭ التىنى دا العاشقى ولجامىز. سونىمەن قاتار دجيۋ-دجيتسۋ سايىسىندا وتانداستارىمىز ءۇش التىن يەلەندى. ەر-ريادتاعى ءدۇبىرلى دودادا گاندبول, ۋشۋ سىندى سپورت تۇرلەرىنەن دە ءبىرىنشى رەت مەدال بۇيىردى.
تۇڭعىش الەم چەمپيونى
بيىل تاەكۆوندورشىلار ەڭكەيگەن ەڭسەسىن تىكتەدى. ەرەسەكتەر اراسىنداعى الەم چەمپيونى قىتايدىڭ ۋسي قالاسىندا ءوتتى. نوديرا احمەدوۆا مەن ايدانا قۇمارتاەۆا قولا جۇلدە يەلەنىپ, تاريحي ناتيجەنى جاڭعىرتتى. قىزدارىمىز ەرەسەكتەر اراسىنداعى الەم چەمپيوناتىنىڭ جۇلدەسىن سوڭعى رەت 2007 جىلى يەلەنگەن ەدى. ارادا 18 جىل اۋناعاندا جاھاندىق دودانىڭ مەدالى بۇيىردى.
جەڭىستى ساپاردى جاستارىمىز جالعادى. كەنيا ەلى ۇيىمداستىرعان جاستار اراسىنداعى الەم چەمپيوناتىندا بەيبارىس قابلان (87 كگ) مەن باتىرحان تولەۋعالي (87 كگ) توپ جاردى. تامەرلان تىلەۋلەس (63 كگ) قولا جۇلدە ەنشىلەدى. تاەكۆوندودان ۇلتتىق قۇراما ۇزدىكتەرى وزگە دە حالىقارالىق سايىستاردا ولجا سالدى.
حالىقارالىق سايىستار – شىڭدالۋ مەكتەبى
2025 جىلى ەلىمىزدە ءىرى حالىقارالىق سپورتتىق جارىستار دا جوعارى دەڭگەيدە ۇيىمداستىرىلدى. بوكستان, سونداي-اق فريستايلدان الەم كۋبوگى كەزەڭدەرى وتسە, دزيۋدودان «Grand Slam» ءتۋرنيرى جالاۋىن جەلبىرەتتى. بۇدان وزگە بىرقاتار وليمپيادالىق سپورت تۇرلەرىنەن حالىقارالىق جارىستار ءوتتى. استانادا العاش رەت ازيا پاراليمپيالىق كوميتەتىنىڭ كونفەرەنتسياسى مەن باس اسسامبلەياسى ۇيىمداستىرىلىپ, ەلىمىزدىڭ ازياداعى ينكليۋزيۆتى سپورت ورتالىقتارىنىڭ ءبىرى رەتىندەگى مارتەبەسىن نىعايتا ءتۇستى.
الماتىنىڭ «قايرات» فۋتبول كلۋبى ۋەفا چەمپيوندار ليگاسىنىڭ نەگىزگى كەزەڭىنە شىعىپ, الەمدەگى تەگەۋرىندى فۋتبول كلۋبتارىمەن تارتىسقا ءتۇستى.
دزيۋدو كۇرەسىنەن بيىلعى الەم چەمپيوناتى ماجارستاننىڭ بۋداپەشت قالاسىندا ءوتتى. وكىنىشكە قاراي ەرلەر كورسەتە الماعان قايسارلىقتى ايەلدەر باسەكەسىندە ءابيبا ابۋجاقىنوۆا (48 كگ) تانىتتى. بۇعان دەيىن جاھاندىق دودانىڭ ەكى دۇركىن قولا جۇلدەگەرى اتانعان ارۋ بۇل جولى فينالعا دەيىن بارلىق قارسىلاسىن قوعاداي جاپىردى. قازاق سپورتىنىڭ تاريحىندا دزيۋدو كۇرەسىنەن الەم چەمپيوناتىنىڭ فينالىنا شىققان العاشقى قازاق قىزى تاريحي ناتيجەگە قول سوزىم قالعاندا ءسۇرىنىپ, كۇمىستى مىسە تۇتتى. وسى سپورت تۇرىنەن جاستار اراسىنداعى الەم چەمپيونى پەرۋدە ءوتىپ, دانا ءابدىروۆا دا كۇمىس مەدال يەلەندى.
شورت-ترەكتەن قىتايدىڭ بەيجىڭ قالاسىندا وتكەن الەم چەمپيوناتىندا دەنيس نيكيشا 500 مەتردە كۇمىس جۇلدە ولجالادى. ول بىلتىرعى الەم چەمپيوناتىندا دا كۇمىسپەن كۇپتەلگەن بولاتىن.
ساداق اتۋدان ەلىمىزدىڭ ۇلتتىق قۇراماسى الەم چەمپيوناتىنان قولا مەدالمەن ورالدى. ۆيكتوريا ليان, ادەل جەكسەنبينوۆا, روكسانا يۋنۋسوۆا بلوكتىق ساداق اتۋدان كوماندالىق تارتىستا جۇلدە يەلەندى. بۇل سپورت تۇرىنەن بىزگە الەمدىك الاماننىڭ مەدالى 1997 جىلدان بەرى بۇيىرماي كەلگەن ەدى.
كۇرەس تۇرلەرىنەن دە تاريحي ناتيجە تىركەلگەن جىل بولدى. گرەك-ريم كۇرەسىنەن ايدوس سۇلتانعالي (60 كگ) حورۆاتيانىڭ زاگرەب قالاسىندا كوك تۋىمىزدى جەلبىرەتىپ, ءانۇرانىمىزدى شىرقاتتى. 1999 جىلدان بەرى ۋىسىمىزعا تۇسپەي كەلگەن التىن مەدال بۇيىردى. ەركىن كۇرەستەن ەرەسەكتەردىڭ الەمدىك دوداسىندا اسىلجان ەسەنگەلدى (61 كگ), بىلتىر الەم چەمپيونى اتانعان نۇرقوجا قايپانوۆ (74 كگ), ريزابەك ايتمۇحان (97 كگ) قولا مەدالدى قاناعات تۇتتى. جاستار اراسىنداعى الەم چەمپيوناتىندا ەدىگە قاسىمبەك الىپتار اراسىندا توپ جارسا, قىزدار باسەكەسىندە شۇعىلا ومىربەك چەمپيون اتاندى.
سەمسەرلەسۋ سايىسىنان الەم چەمپيوناتىندا ەرلەر قۇراماسى العاش رەت جۇلدەگە قول جەتكىزدى. كوماندالىق تارتىستا رۋسلان كۋربانوۆ, ۆاديم شارلايموۆ, ەلمير ءالىمجانوۆ, كيريلل پروحودوۆ قولا مەدال يەلەندى.
الەمدىك رەيتينگىدە كوشباستاۋشىلار قاتارىندا تۇرعان ەلەنا رىباكينا ساۋد ارابياسىنىڭ ەر-رياد قالاسىندا وتكەن WTA قورىتىندى تۋرنيرىندە جەڭىمپاز اتاندى. فينالدىق تارتىستا ءبىزدىڭ تەننيسشى الەمنىڭ ءبىرىنشى راكەتكاسى ارينا سوبولەنكونى ەكى سەتتە ۇتتى. ە.رىباكينا ەل سپورتىنىڭ تاريحىندا بۇل ءتۋرنيردىڭ العاشقى جەڭىمپازى اتاندى.
كوركەم گيمناستيكادان اقمارال ەرەكەشوۆا جاستار اراسىنداعى الەم چەمپيوناتىنان 2 التىن, 1 كۇمىس مەدال ەنشىلەدى. بۇعان دەيىن دە بۇل سايىستا بىزگە الەم بىرىنشىلىگىنىڭ جۇلدەسى بۇيىرماي كەلگەن ەدى.
نىسانا كوزدەۋدەن مىسىردىڭ كاير قالاسىندا وتكەن الەم چەمپيوناتىندا 50 مەتر قاشىقتىقتان ءۇش قالىپتان اتۋ سايىسىندا الەكساندرا لە, ارينا مالينوۆسكايا, ەليزاۆەتا بەزرۋكوۆا ۇشتىگى قولا مەدال يەلەندى. ەرلەر اراسىندا 25 مەتردەن تاپانشامەن اتۋدا نيكيتا چيريۋكين, كيريلل فەدكين, ارتەم كاباكوۆ قولا جۇلدە ولجالادى.
رەكوردتى تىركەگەن سۋردليمپيادا
قاراشا ايىندا جاپونيانىڭ توكيو قالاسىندا XXV جازعى سۋردليمپيادا ويىندارى ءوتتى. ەلىمىزدەن بارعان سپورتشىلار 8 التىن, 4 كۇمىس, 13 قولا مەدال جەڭىپ الىپ, 81 ەلدىڭ اراسىندا جالپى ەسەپتە 9-ساتىعا تۇراقتادى. ەستۋ قابىلەتىنە زاقىم كەلگەن سپورتشىلاردىڭ ءتورت جىلدا ءبىر اينالىپ سوعاتىن تارتىسىندا قىز-جىگىتتەر بۇرىن-سوڭدى بۇيىرماعان وراسان تابىسقا كەنەلدى. سايىسقا قوسىلعان 78 سپورتى سپورتتىڭ سەگىز تۇرىنەن سىنعا ءتۇسىپ, ابىرويىمىزدى اسىردى. اسىرەسە سۋردو دزيۋدودان بەلدەسۋگە شىققان بالۋاندار جوعارى جەتىستىككە قول جەتكىزىپ, 5 التىن, 2 كۇمىس, 4 قولا مەدال يەلەندى. ەركىن كۇرەستەن 1 التىن, 1 كۇمىس, 3 قولا, گرەك-ريم كۇرەسىنەن 1 التىن, 1 كۇمىس, 1 قولا مەدال بۇيىردى.
جەڭىل اتلەتيكادان 1 التىن, 1 قولا, تاەكۆوندو سايىسىنان 3 قولا جۇلدە ەنشىمىزگە جازىلدى. ۇستەل تەننيسىنەن ەرلەر قۇراماسى كوماندالىق سىندا قولا مەدال ولجالادى. بۇعان دەيىن سۋردليمپيادا ويىندارىنان مۇنداي ناتيجە بۇيىرماعان ەدى. ساڭلاقتارىمىز ەل سپورتىنىڭ دەڭگەيىن پاش ەتە ءبىلدى.
ءبىز سايىپقىران ساڭلاقتارىمىزدىڭ قاداۋ-قاداۋ جەتىستىكتەرىنە عانا توقتالدىق. كەلەر جىل دا ءدۇبىرلى دودالارعا تولى بولماق. ەل ابىرويىن اسقاقتاتار سپورتشىلارعا ساتتىلىك سەرىك بولسىن دەيمىز.
