كونتسەرتتىك باعدارلامانىڭ ءسانى مەن سالتاناتىن اسىرۋعا ەلگە تانىمال باقتيار تايلاقباەۆ, وكتەم التاەۆ, تاحمينا اشىمبەكوۆا, جۇبانىش جەكسەن ۇلى, مارتا تولەپبەرگەن, اسحات تارعىن, بەيبىتگۇل نۇرىمحوجينا, ديماش داۋلەتوۆ, ابيك جەكسەن, عاريفا يگىسىنوۆا, ەرىك تولەنوۆ پەن DARO سىندى بەلگىلى ونەرپازدار ۇلەسىن قوستى.
«پانفيلوۆ كوشەسىندەگى جاڭا جىل» قالالىق فەستيۆال ءۇش مەترلىك قۋىرشاقتار قاتىسقان «الما مەن اتا» اتتى بىرەگەي كوشەلىك تەاترلاندىرىلعان شوۋعا ۇلاستى. الىپ قۋىرشاق-قاھارماندار اكتەرلەرمەن بىرگە مەيىرىم, جارىق پەن ادام جۇرەگىنىڭ كۇشى تۋرالى اسەرلى وقيعا ۇسىندى. يممەرسيۆتى فورماتتاعى قويىلىم انشلاگپەن ءوتتى.
«بۇل ءبىز ءومىر ءسۇرىپ جاتقان قالا, ادامدار جانە اركىم ءوز قولىمەن جاساي الاتىن شۋاق تۋرالى فەستيۆال. ءبىز الماتىنىڭ شىنايى بولمىسىن – جىلى, اشىق جانە دوستىق رۋحىن قايتا سەزىنگىمىز كەلدى», دەيدى جوعارىداعى جوبانىڭ پروديۋسەرى مايرا يزمايلوۆا.
فەستيۆال اياسىندا جاس مۋزىكانتتار بايقاۋى ۇيىمداستىرىلىپ, جاس دارىندار, جاندى داۋىستار مەن كورەرمەندەردىڭ ەرەك كوڭىل كۇيى الاڭدى شاتتىققا بولەدى.
سول سياقتى 27 جەلتوقساننان باستاپ فەستيۆال اۋماعىندا «Snow Park» قىسقى پاركى جۇمىسىن باستادى. بۇل تاۋ شاڭعىسى مەن سنوۋبوردتاعى فريستايل اۋەسقويلارىنا ارنالعان ارنايى ايماق. «Snow Park» 4 قاڭتارعا دەيىن كۇن سايىن جۇمىس ىستەيدى.
ال «ەكو-شىرشا الماتى» اللەياسى قوناقتاردىڭ ەرەكشە قىزىعۋشىلىعىن تۋعىزدى. قايتا وڭدەلگەن جانە ەكىنشى رەتتىك ماتەريالداردان جاسالعان ارت-شىرشالار كورمەسىنە open-call ارقىلى 30-دان استام ءوتىنىم ءتۇسىپ, فينالعا 15 جوبا ءوتتى. ءار فيناليسكە يدەياسىن جۇزەگە اسىرۋ ءۇشىن 100 مىڭ تەڭگە كولەمىندە گرانت بەرىلدى.
«يگى ىستەرى كيىز ءۇيى» قايىرىمدىلىق اكتسياسى فەستيۆالدىڭ الەۋمەتتىك وزەگىنە اينالدى. قوناقتار قولداۋعا مۇقتاج بالالار مەن ەرەسەكتەردىڭ ارمانى جازىلعان حاتتارىن وقىپ, تىلەكتەرىن ورىنداۋعا مۇمكىندىك الدى.
