سينوپتيكتەردىڭ بولجامىنشا, اقمولا, پاۆلودار, قاراعاندى جانە ۇلىتاۋ وبلىستارىندا قولايسىز اۋا رايى ەرتەڭ دە ساقتالادى. ەلدىڭ سولتۇستىگىندە, شىعىسىندا جانە ورتالىعىندا اۋا تەمپەراتۋراسى +3 گرادۋسقا دەيىن جىلىنادى.
ال وڭتۇستىك وڭىرلەردە كۇن +15°C-قا دەيىن ىسۋى مۇمكىن.
وسىعان بايلانىستى قازاۆتوجول بەس وبلىستا اقمولا, باتىس قازاقستان, قاراعاندى, پاۆلودار جانە جەتىسۋ وڭىرلەرىندە جول قوزعالىسىن ۋاقىتشا شەكتەدى.
جالپى سانى 9 رەسپۋبليكالىق ماڭىزى بار اۆتوجول جابىلعان. الدىن الا مالىمەت بويىنشا, جولداردى ەرتەڭ تاڭعى ساعات 8:00-دە اشۋ جوسپارلانىپ وتىر. جولداردى كۇتىپ ۇستاۋعا 862 ارنايى تەحنيكا جۇمىلدىرىلعان.
سونىمەن قاتار, اۋا رايىنىڭ قولايسىزدىعىنا بايلانىستى استانا اۋەجايىنىڭ قىزمەتتەرى كۇشەيتىلگەن رەجيمدە جۇمىس ىستەۋدە. قازىرگى تاڭدا اۋەجايدا 4 رەيس ۇشۋعا, 11 رەيس قونۋعا كەشىكتىرىلگەن.
