سۋرەت: yk-news.kz
مۇنداي وڭ ديناميكاعا باس كولىك پروكۋراتۋراسى, مادەنيەت جانە اقپارات مينيسترلىگى جانە كولىكتەگى پوليتسيا دەپارتامەنتىنىڭ حالىقارالىق ماركەتپلەيستەرمەن مەموراندۋمعا قول قويۋى ىقپال ەتكەن. ياعني تانىمال ساۋدا الاڭدارىندا تىيىم سالىنعان تاۋارلاردىڭ زاڭسىز جارناماسى مەن ساتىلىمىن دەر كەزىندە انىقتاۋ, بۇعاتتاۋ بويىنشا بىرلەسكەن شارالار كولىك نىساندارىنداعى قىلمىس دەڭگەيىنىڭ تومەندەۋىنە سەپ بولىپ وتىر. دەگەنمەن ماركەتپلەيستەردە سۋىق قارۋدى جارنامالاۋ دەرەكتەرى ءالى دە كەزدەسىپ ءجۇر. وسى باعىتتا جۇمىستى ۇدەتۋ ءۇشىن «اتامەكەن» استانالىق كاسىپكەرلەر پالاتاسى الاڭىندا جاۋاپتى مەملەكەتتىك مەكەمەلەر مەن پلاتفورما وكىلدەرى كەڭەس وتكىزدى.
– باستى ماقسات – «زاڭ جانە ءتارتىپ» تۇجىرىمداماسىن ىسكە اسىرۋ اياسىندا سۋىق قارۋدىڭ ساتىلۋىن بولدىرماۋ, ولاردىڭ قوعامداعى, اسىرەسە جاستار اراسىنداعى اينالىمىن ازايتۋ, سونداي-اق حالىق پەن ساۋدا سۋبەكتىلەرىنە سۋىق قارۋدى زاڭسىز الىپ ءجۇرۋ, وتكىزۋ نەمەسە ساتۋ بويىنشا قىلمىستىق كودەكستىڭ 287-بابى نەگىزىندە قىلمىستىق جاۋاپكەرشىلىك كوزدەلگەنىن كەڭىنەن ءتۇسىندىرۋ. ەكى جىلدا ەلدە مۇنداي 1 600-دەن اسا قىلمىستىق ءىس تىركەلدى. ونىڭ ىشىندەگى 260 دەرەك كولىك سالاسىنا قاتىستى, – دەدى باس كولىك پروكۋرورىنىڭ اعا كومەكشىسى ابزال باقاشباەۆ.
جالپى Kaspi, Halyk Market, OLX, Satu.kz, Ozon.kz, Wildberries جانە باسقا دا ساتۋ پلاتفورمالارىندا تىيىم سالىنعان زاتتاردىڭ ەركىن ساۋداسى ەلدەگى قۇقىقبۇزۋشىلىقتىڭ وسۋىنە تىكەلەي نە جاناما اسەر ەتەدى. وعان دالەل, جامبىل وبلىسىندا كامەلەتكە تولماعان ءجاسوسپىرىمنىڭ كاستەتپەن سوققى الۋ سالدارىنان قازا تابۋ فاكتىسى, ءتىپتى استانا قالاسىنىڭ حالىقارالىق اۋەجايىندا ءبىر ازاماتتىڭ سۋىق قارۋدان جاراقات الىپ, اۋرۋحاناعا جەتكىزىلۋى سىندى دەرەكتەر جەتەرلىك. وسى جىلدىڭ وزىندە سۋىق قارۋدى زاڭسىز ساتىپ الۋ بويىنشا 52 دەرەك تىركەلدى. ونىڭ 34-ءى ماركەتپلەيستەر ارقىلى, 18-ءى وزگە ساۋدا ارنالارى ارقىلى جۇزەگە اسقان.
– كوميتەت تاراپىنان ماركەتپلەيستەرگە تۇراقتى مونيتورينگ جۇرگىزىلەدى. جىل ىشىندە تىركەلگەن سۋىق قارۋ ساتۋعا قاتىستى جارناما ورنالاستىرىلعانى تۋرالى دالەلدەر بار. ياعني ولار ءوز تاراپىنان تىيىم سالىنعان تاۋارلاردى وزدىگىنەن سۇزگىدەن وتكىزۋ تەتىكتەرىن تولىق ىسكە اسىرماي وتىر, – دەدى مادەنيەت جانە اقپارات مينيسترلىگى اقپارات كوميتەتى توراعاسىنىڭ ورىنباسارى ءىلياس ەسماعۇل.
باس كولىك پروكۋراتۋراسى سۋىق قارۋدى ساتقان جانە ساتىپ العاندار جاۋاپقا تارتىلاتىنىن ەسكەرتەدى. ناقتىراق ايتقاندا, 180 ايلىق ەسەپتىك كورسەتكىش كولەمىندە ايىپپۇل سالىنادى نەمەسە قوعامدىق جۇمىسقا تارتىلادى, ءتىپتى 50 تاۋلىككە قامالۋى مۇمكىن.
