اقتوبەدە ەكى سوعىس ارداگەرىنىڭ ۇيىنە جوندەۋ جۇرگىزىلدى

اقتوبە. 12 مامىر. اقتوبە فەرروقورىتپا زاۋىتى جەڭىستىڭ 70 جىلدىعىنا وراي ارداگەرلەرگە قۇرمەت كورسەتتى. «قازحروم» ترانسۇلتتىق كومپانياسى» اق-نىڭ فيليالى بولىپ سانالاتىن كاسىپورىن ارنايى 2 ميلليون 600 مىڭ تەڭگە ءبولىپ, ۇلى وتان سوعىسى ارداگەرلەرىنىڭ ۇيلەرىن جوندەپ بەردى. بۇل تۋرالى egemen.kz حابارلادى. بۇگىنگى تاڭدا اقتوبە فەرروقورىتپا زاۋىتىنىڭ ارداگەرلەر كەڭەسىندە 687 قاريا ەسەپتە تۇر. ونىڭ تورتەۋى ۇلى وتان سوعىسىنىڭ ارداگەرلەرى, ءۇش ادام وسى مارتەبەگە تەڭەستىرىلگەندەر, 130-ى تىل ەڭبەككەرلەرى جانە 7-ءى سوعىستا قازا تاپقانداردىڭ جەسىرلەرى. ارداگەرلەر ءاردايىم زاۋىت اكىمشىلىگىنىڭ باستى نازارىندا. ولاردىڭ تالاپ-تىلەكتەرى, وتىنىشتەرى قاشان دا شەشىمىن تابادى. بيىل ۇلى جەڭىستىڭ 70 جىلدىعى قارساڭىندا زاۋىت اكىمشىلىگى سوعىس ارداگەلەرىنىڭ پاتەرى مەن ۇيلەرىن جوندەۋ جۇمىستارىن ويداعىداي اياقتاپ, مەرەكە الدىندا ۇلكەن قۋانىش سىيلادى. «ارداگەرلەرگە قۇرمەت كورسەتۋ – ءبىزدىڭ ازاماتتىق پارىزىمىز. ءبىز تەك جەڭىس كۇنىندە عانا ەمەس, ولارعا ءاردايىم قامقور بولىپ, تالاپ-تىلەكتەرىن, وتىنىشتەرىن قاناعاتتاندىرىپ وتىرامىز. بيىل دا وسى يگى ءداستۇر ءوز جالعاسىن تاۋىپ, ارداگەرىمىز نيكولاي پاششەنكونىڭ (سۋرەتتە) ءوتىنىشى بويىنشا ونىڭ پاتەرىنە جوندەۋ جۇمىستارى جۇرگىزىلدى. وبلىس اكىمدىگىنىڭ تاپسىرماسىنا سايكەس قالا تۇرعىنى, سوعىس ارداگەرى وتەش جالماعامبەتتىڭ دە ءۇيىنىڭ شاتىرى الماستىرىلىپ, ءىشى جوندەلدى جانە سىرتى زامان تالابىنا ساي ماتەريالدارمەن قاپتالدى», – دەيدى كاسىپوداق ۇيىمىنىڭ توراعاسى باقىتكەرەي كاۆانوۆ. سونداي-اق, ونىڭ ايتۋىنشا, زاۋىتتىڭ 4 سوعىس ارداگەرىنە 70 000 تەڭگە كولەمىندە اقشالاي سىيلىق جانە ازىق-ت ۇلىك سالىنعان قالتالار, وسى مارتەبەگە تەڭەستىرىلگەن 3 ارداگەرگە 50 000 تەڭگە, 130 تىل ەڭبەككەرىنە 26 600 تەڭگە, 7 سوعىستا قازا تاپقانداردىڭ جەسىرلەرىنە 20 000 تەڭگە جانە 27 اۋعان سوعىسىنىڭ ينتەرناتسيونال جاۋىنگەرلەرى مەن چەرنوبىل اپاتىنىن سالدارىن جويۋعا قاتىسقاندارعا 17 800 تەڭگە كولەمىندە اقشالاي سىيلىق جاسالدى. شارا سوڭىندا ارداگەرلەر مەرەكەگە وراي جايىلعان داستارحاننان ءدام تاتتى. بۇدان بولەك, قالاداعى «ەۆرازيا» مەديتسينالىق ورتالىعىندا ارداگەرلەرگە تەگىن قىزمەت كورسەتۋ مۇمكىندىكتەرى قاراستىرىلدى. ساتىبالدى ءساۋىرباي. دەرەك, سۋرەت: egemen.kz.