مەملەكەتتىك ءتىل جاناشىرلارىنا قۇرمەت

بايلانىس جانە اقپارات قىزمەتكەرلەرى كۇنى قارساڭىندا  مادەنيەت جانە سپورت مينيسترلىگى «مەملەكەتتىك ءتىل جانە باق» رەسپۋبليكالىق بايقاۋىنىڭ جەڭىمپازدارى مەن بۇقارالىق اقپارات قۇرالدارى قىزمەتكەرلەرىن سالتاناتتى ماراپاتتاۋ ءراسىمىن وتكىزدى. وندا مادەنيەت جانە سپورت ءمينيسترى ارىستانبەك مۇحامەدي ۇلى جۋرناليستەردى مەرەكەلەرىمەن قۇتتىقتاپ, مينيسترلىكتىڭ قۇرمەت گراموتالارى مەن العىس حاتتارىن تابىستادى. مەرەكەلىك شارانى مادەنيەت جانە سپورت مينيسترلىگىنىڭ تىلدەردى دامىتۋ مەن قوعامدىق-ساياسي جۇمىس كوميتەتى مەن ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى بىرلەسە ۇيىمداستىرىپ, بايقاۋ مەملەكەتتىك ءتىل ساياساتىن بۇقارالىق اقپارات قۇرالدارىندا ناسيحاتتاۋ بەلسەندىلىگىن ارتتىرۋ ماقساتىندا وتكىزىلگەن بولاتىن. وعان قازاق جانە ورىس تىلدەرىندە مەرزىمدى باسىلىمداردا, ينتەرنەت-رەسۋرستاردا جارىق كورگەن جاريالانىمدار, ەفيرگە شىققان حابار, باعدارلامالار بويىنشا كەلىپ تۇسكەن ماتەريالدار قابىلداندى. بايگەگە جەكەلەگەن تىلشىلەردىڭ ەل اۋماعىنداعى باق-تا جاريالاعان مەملەكەتتىك ءتىلدىڭ قىزمەت ەتۋ اياسىن كەڭەيتۋ, مارتەبەسىن نىعايتۋ جانە قازىرگى مەملەكەتتىك ءتىلدىڭ احۋالى تۋرالى 200-دەن اسا وتكىر دە وزەكتى ماتەريالدار كەلىپ ءتۇسىپتى. بايقاۋ ماتەريالدارىن سەناتور, قازاقستان جازۋشىلار وداعىنىڭ توراعاسى نۇرلان ءورازاليننىڭ توراعالىعىمەن ەلىمىزگە بەلگىلى جازۋشىلار مەن تاجىريبەلى جۋرناليست ماماندارىنان قۇرالعان ارنايى قازىلار القاسى قاراستىرىپ, جۇلدەگەرلەردى انىقتادى. قازىلار القاسى قاتىسۋشىلاردى «ۇزدىك ماقالا», «ۇزدىك تەلەارنا باعدارلاماسى», «ۇزدىك راديو باعدارلاماسى», «ۇزدىك سايت ماقالاسى» نوميناتسيالارى بويىنشا باعا­لا­دى. قازىلار القاسىنىڭ شەشىمىمەن ­ «ۇزدىك ماقالا» نوميناتسياسى بويىنشا «ەگەمەن قازاقستان» رەسپۋبليكالىق گازەتىنىڭ شولۋشىسى سۇلەيمەن مامەت ءبىرىنشى ورىندى جەڭىپ السا, «ارقا اقشامى» قوعامدىق-ساياسي اپتالىق گازەتىنىڭ جاۋاپتى حاتشىسى ق ۇلىنتاي موناي ەكىنشى, ەكىباستۇز قالالىق «وتارقا» گازەتىنىڭ جاۋاپتى حاتشىسى داريا ءجۇمادىلوۆا ءۇشىنشى ورىندى يەلەندى. ال «ۇزدىك سايت ماقالاسى» نوميناتسياسى بويىنشا ءبىرىنشى ورىن «مەملەكەتتىك ءتىلدى دامىتۋ ينستيتۋتى» سايتىنىڭ ءتىلشىسى قىمبات سىلامبەكوۆكە بۇيىرسا, «جاس قازاق ءۇنى» گازەتىنىڭ رەداكتورى داستان ەلدەسوۆ ەكىنشى, باتىس قازاقستان وبلىسى «قازاقپارات» حالىقارالىق اقپاراتتىق اگەنتتىگى» جشس «كاز­اقپا­رات.كز» سايتىنىڭ مەنشىكتى ءتىل­شىسى عايساعالي سەيتاق ءۇشىنشى ورىندى يەلەندى. «ۇزدىك تەلەارنا باعدارلاماسى» نوميناتسياسى بويىنشا «ءبىرىنشى قاراعاندى» تەلەارناسىنىڭ ءتىلشىسى الماس مۇسابەكوۆ ءبىرىنشى ورىندى جەڭىپ السا, ەكىنشى, ءۇشىنشى ورىندار «جەتىسۋ» تەلەارناسىنىڭ رەداكتورى ايمان اسىلبەكوۆا مەن قوستاناي وبلىسى «اكتسەنت» ليساكوۆسك تەلەارناسىنىڭ باس رەداكتورى ديانا ليزۋنوۆاعا تابىس ەتىلدى. «ۇزدىك راديو باعدارلاماسى» نوميناتسياسى بويىنشا ءبىرىنشى ورىندى قازاق راديوسىنىڭ پاۆلودار وبلىسىنداعى مەنشىكتى ءتىلشىسى ەسەنبەك سانات ۇلى يەلەنىپ, ەكىنشى, ءۇشىنشى ورىندار «رۋدنىي داۋىسى» راديوسىنىڭ ءتىلشىسى جانارىس استاناەۆ پەن «حالىق راديوسى» ورىس رەداكتسياسىنىڭ مەڭگەرۋشىسى اسەمگۇل امانجولوۆاعا بۇيىردى. سونداي-اق, تاۋەلسىز قازاقستاننىڭ مادەنيەت, سپورت سالالارى مەن كونفەسسياارالىق كەلىسىمدى دامىتۋدى ناسيحاتتاۋدا قول جەتكىزگەن تابىستارى مەن جەمىستى شىعارماشىلىق قىزمەتى ءۇشىن «ەگەمەن قازاقستان» گازەتىنىڭ شولۋشىسى قاراشاش توقسانباي مينيسترلىكتىڭ قۇرمەت گراموتاسىمەن ماراپاتتالدى. بەرىك سادىر, «ەگەمەن قازاقستان».