سۋرەت: gov.kz
- قىتايدىڭ شەنچجەن قالاسىندا تەننيستەن «World Tennis Continental Cup» تۋرنير اياقتالدى. بۇل جارىستا الەم قۇراماسى ەۋروپا قۇراماسىنا قارسى وينادى. الەم قۇراماسى ساپىندا ەلىمىزدىڭ ءبىرىنشى راكەتكاسى ەلەنا رىباكينا دا ونەر كورسەتتى. تۇساۋكەسەر كەزدەسۋىندە جەرلەسىمىز WTA رەيتينگىندە ەكىنشى ورىندا تۇرعان يگا شۆەنتەكتەن (پولشا) 3:6, 3:6 ەسەبىمەن ۇتىلدى. كەلەسى كۇنى ەلەنا وليمپيادا چەمپيونى بەليندا بەنچيچتەن (شۆەيتساريا) باسىم ءتۇستى – 6:3, 6:4. ءدال سول كۇنى اندرەي رۋبلەۆپەن (رەسەي) جۇپ قۇرعان ول ۆالانتەن ۆاشرو (موناكو) مەن يگا شۆەنتەككە شاڭ قاپتىردى – 6:4, 6:4.
- چەحيا استاناسى – پراگادا ارالاس جەكپە-جەكتەن Oktagon 81 ءتۋرنيرى ۇيىمداستىرىلدى. جەڭىل سالماقتاعى چەمپيوندىق بەلبەۋ ءۇشىن جالعاس جۇماعۇلوۆ (18-9) پەن چەحيالىق داۆيد دۆورجاك (22-6) كۇش سىناستى. بۇل باسەكەدە ءۇش راۋند بويى ءبىزدىڭ سپورتشى باسىم بولدى. ودان كەيىن جاراقاتىن جەلەۋ وتكەن دۆورجاك كەزدەسۋدى جالعاستىرۋدان باس تارتتى. جەكپە-جەك اياقتالعاننان كەيىن جالعاس جوعارى سالماققا وتەتىنىن جاريا ەتتى.
- تارازدا فۋتزالدان ەل كۋبوگى جولىنداعى جارىستىڭ شەشۋشى ويىندارى ءوتتى. جارتىلاي فينالدا «اقتوبە» ايدى اسپانعا شىعارىپ, داڭقتى «قايراتتى» جولىنان ىعىستىردى – 5:4. كەلەسى ويىندا «سەمەي» «اتىراۋدى» ازەر ۇتتى – 4:3. فينالدا «سەمەي» مەن «اتىراۋ» كلۋبتارى ءوزارا شەبەرلىك بايقاستى. بۇل باسەكەدە اباي وبلىسىنىڭ وكىلدەرى باسىمدىق تانىتتى. ءوز قارسىلاستارىن 5:2 ەسەبىمەن ۇتقان ولار ەل كۋبوگىنىڭ يەگەرى اتاندى.
- ەلىمىزدىڭ ۇلتتىق قۇراماسى مەن سەمەيدىڭ «ەلىماي» كلۋبىنىڭ 22 جاستاعى جارتىلاي قورعاۋشىسى عالىمجان كەنجەبەك الداعى ماۋسىمدا رەسەي پرەمەر-ليگاسىندا ونەر كورسەتىپ جۇرگەن گروزنىيدىڭ «احماتىنىڭ» نامىسىن قورعايدى. قازىرگى كەزدە ءدال وسى كوماندا دا ەلىمىزدىڭ تاعى ءبىر تانىمال فۋتبولشىسى ماكسيم سامورودوۆ ويناپ ءجۇر. ال «توبىلدىڭ» ويىنشىسى يسلام چەسنوكوۆ شوتلانديانىڭ «حارتس» كلۋبىنىڭ جەيدەسىن كيەدى.
- وسكەمەندە ۆولەيبولدان ايەلدەر اراسىنداعى ەل كۋبوگىنىڭ يەگەرى انىقتالدى. فينالدا تۇركىستاننىڭ «تۇرانى» مەن پەتروپاۆلدىڭ «قۋانىشى» كەزدەستى. بۇل باسەكە 23:25, 25:19, 21:25, 28:26, 15:9 ەسەبىمەن «تۇراننىڭ» پايداسىنا شەشىلدى.
