قازاق ونەرىنىڭ جاۋھارلارى ورىندالعان بۇل كەش ەكى ەل اراسىنداعى مادەني بايلانىستاردى ودان ءارى تەرەڭدەتكەن ماڭىزدى وقيعاعا اينالدى. كونتسەرت باعدارلاماسى ۇلتتىق ءداستۇر مەن زاماناۋي مۋزىكالىق ىزدەنىستەردىڭ ۇيلەسىمىن ايقىن كورسەتتى. ساحنادا رەسپۋبليكالىق جانە حالىقارالىق بايقاۋلاردىڭ لاۋرەاتتارى, تانىمال ءارى جاس ونەرپازدار ونەر كورسەتىپ, قازاق مۋزىكاسىنىڭ تەرەڭدىگى مەن كوركەمدىك قۋاتىن ايگىلەدى. كەش بارىسىندا ءداستۇرلى ءان-كۇي جاڭاشا وڭدەۋدە ۇسىنىلىپ, كورەرمەنگە ەرەكشە اسەر سىيلادى. اتاپ ايتقاندا, كۇي اتاسى قۇرمانعازى ساعىرباي ۇلىنىڭ ءورشىل كۇيلەرى, سال-سەرىلىك ءداستۇردىڭ كورنەكتى وكىلى ۇكىلى ىبىرايدىڭ سىرلى اندەرى, قوبىز سارىنىمەن ماڭگىلىكتى تولعاعان قورقىتتىڭ مۇراسى, ۇلت رۋحىن جىرلاعان ساكەن سەيفۋللين شىعارمالارى مەن نۇرعيسا تىلەنديەۆتىڭ زاماناۋي ۇلتتىق مۋزىكاسى ورىندالدى. سونىمەن قاتار قازاق جانە تۇرىك حالىق اندەرى اۋەلەپ, ەكى حالىقتىڭ تاريحي-مادەني تامىرىنىڭ ورتاقتىعىن ايقىن سەزدىردى.
كەشكە جينالعان كورەرمەن قاۋىم قازاق ونەرىنىڭ تەرەڭ فيلوسوفياسىنا, اۋەن مەن ىرعاقتىڭ باي بوياۋىنا ءتانتى بولدى. ءاربىر ورىندالعان شىعارما ۇلتتىق بولمىس پەن رۋحتى تانىتىپ, شەتەلدىك تىڭدارمانعا قازاق حالقىنىڭ تاريحى مەن دۇنيەتانىمىنان سىر شەرتتى.
اتالعان مادەني ءىس-شارا قازاقستاننىڭ مۋزىكالىق مۇراسىن حالىقارالىق ارەنادا ناسيحاتتاۋعا, سونداي-اق قازاق-تۇرىك اراسىنداعى مادەني-گۋمانيتارلىق ىنتىماقتاستىقتى نىعايتۋعا باعىتتالعان ماڭىزدى قادام بولدى. ىستانبۇل تورىندە وتكەن بۇل كونتسەرت قازاق ونەرىنىڭ الەمدىك مادەني كەڭىستىكتەگى ورنى ايقىن ەكەنىن تاعى ءبىر مارتە دالەلدەدى.
