تاراز قالاسى جىبەك جولى اۋدانىنا قاراستى ءشولدالا تۇرعىن الابىندا سالىنعان №70 مەكتەپتىڭ اشىلۋ سالتاناتىنا ءوڭىر باسشىسى ەربول قاراشوكەەۆ قاتىستى. ءوڭىر باسشىسى سۋ جاڭا وقۋ ورداسىنىڭ پەداگوگتەرى سانالى ۇرپاق تاربيەلەۋدى تالماي ەڭبەك ەتەتىنىنە سەنىم ءبىلدىردى.
- بيلىك تاراپىنان ءبىلىم بەرۋ سالاسىنا اۋىز تولتىرىپ ايتارلىقتاي قولداۋ كورسەتىلىپ جاتىر. وڭىردە دە ىلكىمدى ىستەر اتقارىلدى. «كەلەشەك مەكتەپتەرى» ۇلتتىق جوباسى اياسىندا التى مەكتەپ پايدالانۋعا بەرىلىپ, مىڭداعان وقۋشى قاۋىپسىز ءارى قولايلى ورتادا ءبىلىم الۋدا. بۇل جوبانىڭ جۇزەگە اسۋى ارقىلى وبلىستا ءۇش اۋىسىمدا وقىتۋ ماسەلەسى كەزەڭ-كەزەڭىمەن شەشىمىن تابۋدا. بۇگىن سول يگى باستامانىڭ جالعاسى رەتىندە تاعى ءبىر ەڭسەلى مەكتەپ ءوز ەسىگىن ايقارا اشىپ وتىر. بۇل – جاس ۇرپاقتىڭ ساپالى ءبىلىم الۋىنا باعىتتالعان ماڭىزدى قادام, – دەدى ەربول قاراشوكەەۆ.
جاڭا ءبىلىم وشاعى كەڭ ءارى جايلى, زاماناۋي وقۋ قۇرال-جابدىقتارىمەن تولىق قامتىلعان. ءۇش قاباتتى عيماراتتا 33 وقۋ كابينەتى, ءماجىلىس زالى, اسحانا, ەكى سپورت زالى, STEM جانە روبوتوتەحنيكا كابينەتتەرى, ەكى كومپيۋتەر سىنىبى, كىتاپحانا, ءۇش زەرتحانا, ءۇش شەبەرحانا جانە بەس كوۆوركينگ ورتالىعى بار. قازىرگى تاڭدا مەكتەپتە 723 وقۋشى ءبىلىم الىپ, 60-قا جۋىق پەداگوگ قىزمەت اتقارادى.
جامبىل وبلىسىندا ءبىلىم بەرۋ سالاسىندا 25 ملرد تەڭگەگە 26 نىساننىڭ قۇرىلىسى جۇرگىزىلۋدە. بۇگىنگە دەيىن 11 جاڭا مەكتەپ پايدالانۋعا بەرىلدى, سونىڭ ىشىندە بەسەۋى – «كەلەشەك مەكتەپتەرى» جوباسىنىڭ تالاپتارىنا ساي. جىل سوڭىنا دەيىن تاعى 2 نىساندى اياقتاۋ جوسپارلانىپ وتىر.
تاراز
