بۇعان دەيىن ورتادەرەسىن اۋىلىندا مەديتسينالىق قىزمەت كورسەتەتىن جەكە عيمارات بولماعان. اۋىلدا بۇگىندە 270 ادام تۇرادى, ونىڭ ىشىندە 70 بالا مەن بىرقاتار ەگدە جاستاعى تۇرعىن بار. سونىمەن قاتار, 20-عا جۋىق تۇرعىن ديسپانسەرلىك ەسەپتە تۇر. اۋدان ورتالىعىنان 245 شاقىرىم قاشىقتىقتا ورنالاسقان اۋىل ءۇشىن بۇل مەديتسينالىق پۋنكتتىڭ ماڭىزى ەرەكشە.
جاڭا نىسان «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا سالىنىپ, وعان 135 ميلليون تەڭگە قارجى بولىنگەن. زاماناۋي تالاپتارعا ساي بوي كوتەرگەن مەديتسينالىق پۋنكت التى بولمەدەن تۇرادى. مۇندا قابىلداۋ بولمەسى, پروتسەدۋرالىق كابينەت, فيزيوتەراپيا كابينەتى, ءدارى-دارمەك ساقتايتىن قويما, دەزينفەكتسيالىق كابينەت, اكۋشەرلىك كابينەت, سونداي-اق اس ءۇي قاراستىرىلعان.
ناۋقاستاردىڭ دەمالىپ, ەم قابىلداۋىنا بارلىق جاعداي جاسالعان. مەديتسينالىق پۋنكتكە جاس مامان جۇمىسقا قابىلدانىپ, «ديپلوممەن اۋىلعا» باعدارلاماسى اياسىندا اۋىلعا بىلىكتى كادر تارتىلىپ وتىر.
قاڭتار ايىنان باستاپ مۇندا قوسىمشا قىزمەتكەرلەر قابىلدانىپ, ناتيجەسىندە 4 جاڭا جۇمىس ورنى اشىلادى.
