قاراعاندىدا ايۋاندىقپەن ادام ولتىرگەن جاس جىگىت قولعا ءتۇستى

استانا. 12 مامىر. قاراعاندى قالاسىندا قىزدى ايۋاندىقپەن ءولتىرىپ, دەنەسىن بولشەكتەپ تاستاعان قىلمىس تۋرالى وسىعان دەيىن حابارلانعان ەدى. وبلىستىق ىشكى ىستەر دەپارتامەنتىنىڭ جەدەل-ىزدەستىرۋ شارالارى ناتيجەسىندە قاراعاندى وبلىسى وساكاروۆ اۋدانىنىڭ تۇرعىنى, 23 جاستاعى جىگىت قولعا ءتۇستى. بۇگىندە ول اسا اۋىر قىلمىس جاساعانىن مويىنداعان. بۇل تۋرالى NewTimes.kz حابارلادى. قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتى تاراتقان مالىمدەمەدە: «9 مامىردا قاراعاندى قالاسىنىڭ قازىبەك بي اۋدانىنداعى جىلۋ قۇبىرلارىنىڭ بىرىنەن 26 جاستاعى ايەل ادامنىڭ مۇردەسى تابىلدى. وعان ءىس-ءتۇسسىز جوعالىپ كەتۋىنە بايلانىستى 6 مامىردان باستاپ ىزدەۋ جاريالانعان بولاتىن. قولعا تۇسكەن 23 جاستاعى جاس جىگىت قىلمىستى مويىنداپ, ۇرىس-كەرىس كەزىندە قىزدى ولتىرگەنىن ايتتى. سوڭىندا قىلمىسىن جاسىرۋ ماقساتىندا قىزدىڭ دەنەسىن بولشەكتەپ, تىعىپ قويعان», – دەلىنگەن. ەلامان قوڭىر. دەرەك, سۋرەت: NewTimes.kz.