بىلىكتى ماماندارعا تاپ بولعان ناۋقاس – سوزىلمالى جۇرەك جەتكىلىكسىزدىگىنىڭ سوڭعى ساتىسىنا شالدىققان 34 جاستاعى ازامات بولاتىن. ول بۇعان دەيىن جۇرەك اۋىستىرۋ وتاسىن كۇتىپ, رەسپۋبليكالىق كەزەكتە تۇرعان.
بەس ساعاتتان استام ۋاقىتقا سوزىلسا دا ءساتتى اياقتالعان جۇرەك اۋىستىرۋ وتاسىن الماتى قالالىق كارديولوگيالىق ورتالىعىنىڭ بىلىكتى ماماندارىنان قۇرالعان مۋلتيديستسيپلينارلىق كوماندا استاناداعى University Medical Center دارىگەرلەرىمەن بىرلەسىپ جاساعان ەدى. وعان قالالىق كارديولوگيالىق ورتالىقتىڭ ديرەكتورى ەرماعامبەت قۋاتباەۆ پەن UMC كورپوراتيۆتىك قورى باسقارما توراعاسى, پروفەسسور يۋري پيا جەتەكشىلىك ەتتى. قاجەتتى قولداۋ كورسەتۋ ءۇشىن UMC ماماندارى الماتىعا جەدەل تۇردە كەلدى.
قازىرگى تاڭدا قالالىق كارديولوگيالىق ورتالىعىندا جوعارى تەحنولوگيالىق وتالار جاساۋ ءۇشىن بارلىق قاجەتتى جاعداي جاسالعان. مۇندا بىلىكتى كارديولوگتار, كارديوحيرۋرگتەر, انەستەزيولوگ-رەانيماتولوگتار, پەرفۋزيولوگتار مەن وپەراتسيالىق مەيىربيكەلەر قىزمەت اتقارادى. زاماناۋي دياگنوستيكالىق جانە ەمدەۋ ادىستەرى ەنگىزىلىپ, حالىقارالىق ستاندارتتارعا ساي جابدىقتار قولدانىلادى.
قازىر ساۋىعىپ ۇلگەرگەن ناۋقاس دارىگەرلەر مەن مەديتسينا قىزمەتكەرلەرىنە شىنايى ريزاشىلىق ءبىلدىردى.
«اۋرۋىمنىڭ ءبارى ەنەرگەتيك سۋسىنداردان باستالدى. باسىندا كۇنىنە ءبىر بوتەلكەمەن شەكتەلسەم, كەيىن كۇن سايىن 8-10 ەنەرگەتيكالىق سۋسىنعا دەيىن جەتتىم. مۇنىڭ سوڭى اۋىر دياگنوزعا اكەلەتىنىن اڭعارماپپىن. بۇگىن مەن دارىگەرلەردىڭ جانكەشتى ەڭبەگىنىڭ ارقاسىندا ءتىرىمىن. ەندى دەنساۋلىقتىڭ ادام ومىرىندەگى ەڭ ۇلكەن بايلىق ەكەنىن انىق ءتۇسىندىم», دەدى ناۋقاس.
اۋرۋحانادان شىققاننان كەيىن ناۋقاس ءوزى تىركەلگەن ەمحانادا دارىگەرلەردىڭ تۇراقتى باقىلاۋىندا بولادى. جۇرەك ترانسپلانتاتسياسىمەن بىرگە, ستاتسيونارلىق ەم, قاجەتتى ءدارى-دارمەكپەن قامتاماسىز ەتۋ, وڭالتۋ مەن ودان كەيىنگى مەديتسينالىق باقىلاۋ مەملەكەتتىك كەپىلدىك بەرىلگەن تەگىن مەديتسينالىق كومەك اياسىندا مەملەكەت ەسەبىنەن كورسەتىلەدى.
ەسكە سالا كەتەيىك, ارتەريالىق گيپەرتەنزيانىڭ اۋىر تۇرىمەن اۋىرعان, ينسۋلت العان 50 جاستاعى ايەل دونور بولدى. الماتى قالالىق ورتالىق كلينيكالىق اۋرۋحاناسىنا شۇعىل تۇردە جەتكىزىلگەننەن كەيىن دارىگەرلەر كونسيليۋمى ونىڭ مي ءولىمىن انىقتاپ, مايىتتىك دونورعا رۇقسات بەردى. مارقۇمنىڭ تۋىستارى كەلىسىمىن بەرگەن سوڭ دونورلىق ۇدەرىس ۇيىمداستىرىلعان بولاتىن.
