فوتو: قورعانىس مينيسترلىگى
جاقسى ناتيجەلەر
قورعانىس ءمينيسترى اۆياتسيا گەنەرال-لەيتەنانتى داۋرەن قوسانوۆ اتالعان كوميتەتتىڭ جۇمىسىن وڭ باعالادى. ول الماتىدا اسكەري-سپورت كوللەدجىنىڭ اشىلۋىن, اسكەري قىزمەتشىلەر اراسىندا قازاق كۇرەسىنەن العاشقى الەم چەمپيوناتىنىڭ وتكىزىلۋىن, ۇلتتىق وليمپيادالىق كوميتەتپەن, وقۋ-اعارتۋ مينيسترلىگى جانىنداعى دەنە شىنىقتىرۋ جانە سپورت ورتالىعىمەن جانە موڭعوليانىڭ قويان-قولتىق ۇرىس قاۋىمداستىعىمەن مەموراندۋمدارعا قول قويىلۋىن اتاپ ءوتتى.
«بۇگىن ءبىز ناقتى ناتيجەلەردى كورىپ وتىرمىز. 2025 جىلدىڭ وزىندە اوسك-نىڭ سپورتشىلارى شامامەن 500 مەدال ولجالاسا, ونىڭ 234-ءى التىن, 140-ى كۇمىس. بۇل – باپكەرلەر قۇرامىنىڭ جوعارى كاسىبيلىگىنىڭ, دايىندىقتىڭ ساۋاتتى ۇيىمداستىرىلۋىنىڭ جانە سپورتشىلارىمىزعا ءتان اسكەردە شىڭدالعان مىنەزدىڭ كورسەتكىشى» دەدى د.قوسانوۆ.
ماراپاتتاۋ ءراسىمى
جوعارى سپورتتىق جەتىستىكتەرى ءۇشىن «قازاقستان بارىسى» ءتۋرنيرىنىڭ جەڭىمپازى ەراسىل قاجىباەۆقا جانە پاريجدەگى وليمپيادا ويىندارىنىڭ قولا جۇلدەگەرى يسلام ساتپاەۆقا العاشقى وفيتسەرلىك «لەيتەنانت» اسكەري اتاعى بەرىلدى.
«ەل قورعانى» ۆەدومستۆولىق مەدالىمەن قورعانىس مينيسترلىگى سپورت كوميتەتىنىڭ باس جاتتىقتىرۋشىسى پودپولكوۆنيك مۇرات بيجانوۆ, تاەكۆوندودان الەم چەمپيونى باتىرحان تولەۋعالي, بوكستان الەم چەمپيونى انگەلينا لۋكاس جانە 600 شاقىرىمدىق ۋلترامارافوندى ەڭسەرىپ, قازاقستان رەكوردىن ورناتقان سەرجانت راۋان ءابىلحانوۆ ماراپاتتالدى.
«قازاقستان رەسپۋبليكاسى قارۋلى كۇشتەرىنىڭ ۇزدىگى» توسبەلگىسى قازاق كۇرەسى, تاەكۆوندو, كيكبوكسينگ جانە سامبودان الەم چەمپيوندارى مەن جۇلدەگەرلەرى باتىرحان قۋاندىقوۆقا, نۇرداۋلەت باقتىباي ۇلىنا, نۇرجان تۋمۋرزاەۆقا, ايدار بەسكەمپىرگە تابىستالدى.
سپورت كوميتەتى باسشىلىعىنىڭ شەشىمىمەن الەم چەمپيوناتتارىندا جەڭىسكە جەتكەن جانە جۇلدەلى ورىندارعا يە بولعان ۇزدىك سپورتشىلار اقشالاي سىياقىمەن كوتەرمەلەندى.
قۇقىق قورعاۋ جانە كۇش قۇرىلىمدارى اراسىندا وتكەن سامبو چەمپيوناتىنداعى جەڭىسى ءۇشىن قاتارداعى جاۋىنگەر سانجار نۇرسەيىت قورعانىس ءمينيسترى اتىنان گراموتامەن ماراپاتتالدى. سونىمەن قاتار اسكەر سپورتىن دامىتۋعا بەلسەندى اتسالىسىپ جۇرگەن مەملەكەتتىك ورگانداردىڭ, سپورت فەدەراتسيالارىنىڭ, بۇقارالىق اقپارات قۇرالدارىنىڭ جانە قوعامدىق ۇيىمداردىڭ وكىلدەرىنە العىس حاتتار تابىستالدى.
