سپەكتاكل الەم ادەبيەتىنىڭ جاۋھارى لەۆ تولستويدىڭ «اننا كارەنينا» رومانىنىڭ نەگىزىندە قويىلادى. ساحنالىق نۇسقاسىنىڭ اۆتورى ءارى قويۋشى رەجيسسەرى – راچا ماحاتاەۆ, قازاق تىلىنە اۋدارعان – قىمبات ەلۋباەۆا.
قويىلىمدا اۆتوردىڭ ادام بولمىسى, مورالدىق تاڭداۋ, قوعام مەن جەكە تۇلعا اراسىنداعى قايشىلىقتار تۋرالى تەرەڭ فيلوسوفيالىق ويلارى زاماناۋي ساحنالىق تىلدە ۇسىنىلادى. سپەكتاكل ادامنىڭ ىشكى جان الەمىندەگى قاقتىعىستاردى, سەزىم مەن جاۋاپكەرشىلىك اراسىنداعى كۇردەلى تاڭداۋدى كورسەتەدى.
سپەكتاكلدىڭ جانرى – حورەودراما. بۇل جانر درامالىق ارەكەتتى قيمىل-قوزعالىس, پلاستيكا جانە مۋزىكالىق شەشىمدەر ارقىلى جەتكىزۋگە مۇمكىندىك بەرەدى. قويىلىمدا ءسوز بەن قوزعالىس ءبىرتۇتاس كوركەمدىك جۇيە قۇراپ, كەيىپكەرلەردىڭ ىشكى پسيحولوگيالىق كۇيىن جەتكىزەدى.
ساحنالىق كەڭىستىكتىڭ كوركەم شەشىمىن جاساعان – قويۋشى سۋرەتشى قانات ماقسۇتوۆ. قويىلىمنىڭ حورەوگرافيالىق ءتىلىن قالىپتاستىرعان – اناستاسيا چيستيۋحينا. ال كەيىپكەرلەردىڭ مىنەزىن, ءداۋىردىڭ رۋحىن اشاتىن كوستيۋمدەر كيىم سۋرەتشىسى شىنار ەلەمباەۆانىڭ قولتاڭباسىن تانىتادى.
باستى رولدەر ەكى قۇرامدا ورىندالادى. ساحنادا ينابات ابەنوۆا, قازاقستان جاستار وداعىنىڭ «سەرپەر» سىيلىعىنىڭ لاۋرەاتى جانات وسپانوۆ, قازاقستاننىڭ ەڭبەك سىڭىرگەن قايراتكەرى اينۇر بەرمۇحامبەتوۆا, قايىرجان سادىقوۆ, «دارىن» مەملەكەتتىك جاستار سىيلىعىنىڭ لاۋرەاتى اقمارال تاناباەۆا, ەرعۇلان جانپەيىسوۆ, ءبىرجان ءجۇنىسوۆ باستاعان تەاتردىڭ تالانتتى ارتىستەرى كورەرمەنمەن سىرلاسادى.
