كودەكستىڭ جاڭا جوباسى تالقىلاندى

«نۇر وتان» پارتياسى وبلىستىق فيليالىندا «سوت تورەلىگىنىڭ قولجەتىمدىلىگىنە باعىتتالعان قازاقستان رەسپۋبليكاسى ازاماتتىق ءىس جۇرگىزۋ كودەكسىنىڭ جاڭا رەداكتسياسىنىڭ جوباسى» دەگەن تاقىرىپتا دوڭگەلەك ۇستەل وتكىزىلدى. دوڭگەلەك ۇستەلدى پارلامەنت ءماجىلىسىنىڭ زاڭناما جانە سوت-قۇقىقتىق رەفورما كوميتەتى, قازاقستان رەسپۋبليكاسىنىڭ جوعارعى سوتى, «نۇر وتان» پارتياسى جانىنداعى قۇقىقتىق كەڭەس جانە «قازاقستان زاڭگەرلەر وداعى» رەسپۋبليكالىق قوعامدىق كەڭەسى ۇيىمداستىردى. دوڭگەلەك ۇستەل جۇمىسىنا پارلامەنت ءماجىلىسىنىڭ دەپۋتاتتارى, باتىس قازاقستان, شىعىس قازاقستان, اتىراۋ, ماڭعىستاۋ, قوستاناي, پاۆلودار وبلىستارىنىڭ القا توراعالارى, جەرگىلىكتى سوتتاردىڭ توراعالارى مەن سۋديالارى, پروكۋراتۋرا, جەرگىلىكتى ءوزىن ءوزى باسقارۋ ورگاندارىنىڭ وكىلدەرى, زاڭگەرلەر قاۋىمداستىعى, ۇكىمەتتىك ەمەس ۇيىمدار وكىلدەرى, عالىمدار مەن مەدياتورلار قاتىستى. دوڭگەلەك ۇستەلدىڭ ماقساتى ازاماتتىق ءىس جۇرگىزۋ كودەكسى جوباسىنىڭ جاڭاشىلدىقتارىن تاجىريبەلىك تۇرعىدان تالقىلاۋ بولىپ تابىلادى. اتاپ ايتقاندا, جيىندا بىتىمگەرشىلىك راسىمدەرىن سوتتا قولدانۋ, سوت تورەلىگىنە قولجەتىمدىلىك, سوت ءىسىن جۇرگىزۋدى جەڭىلدەتۋ جانە جەدەلدەتۋ, اپەللياتسيالىق, كاسساتسيالىق, قاداعالاۋشى ساتىلارداعى سوت اكتىلەرىن قايتا قاراۋ بويىنشا ءىس جۇرگىزۋ, ازاماتتىق ءىس وندىرىسىندەگى پروكۋرور مەن ادۆوكاتتىڭ ءرولى, بىلىكتى زاڭ كومەگىن كورسەتۋ, سوتتا ساراپشىنىڭ قاتىسۋى, سوت شىعىندارى, ەلەكتروندىق سوت ءوندىرىسى جانە باسقا ماسەلەلەر تالقىلاندى. دوڭگەلەك ۇستەلدە پارلامەنت ءماجىلىسىنىڭ دەپۋتاتى, ازاماتتىق ءىس جۇرگىزۋ كودەكسىنىڭ جاڭا جوباسىن تالقىلاۋ جونىندەگى جۇ­مىس توبىنىڭ جەتەكشىسى نۇرلان ءابدىروۆ ءسوز سويلەپ, جوبانىڭ ەلى­مىز ءۇشىن, حالقىمىز ءۇشىن ماڭىزى زور ەكەنىن اتاپ ءوتتى. الماتىدا وتكەن دوڭگەلەك ۇستەلگە قاتىسقان ادام قۇقىن قورعاۋ جونىندەگى حالىق­ارالىق جانە قازاقستاندىق ۇيىمداردىڭ وكىلدەرى ازاماتتىق ءىس ءجۇر­گىزۋ كودەكسىنىڭ جاڭا جوبا­سىنىڭ دايىندالۋ دەڭگەيى جوعارى دەپ باعالاعانىن جەتكىزدى. الايدا, قۇجاتتى جان-جاقتى تالقىلاپ, ولقىلىعى بولسا ەسكەرىپ, تۇزەتەتىن جەرى بولسا تۇزەتۋ ءۇشىن مۇنداي تالقىلاۋدىڭ قايتارىمدىلىعىنا ايرىقشا توقتالدى. اقتوبە وبلىستىق سوتىنىڭ توراعاسى ەرلان ايتجانوۆ ءوزىنىڭ سوزىندە «ازاماتتىق ءىس جۇرگىزۋ زاڭناماسى قوعامدا تۇراقتىلىقتىڭ كەپى­لى, زاڭنىڭ ۇستەمدىگىن, ازا­ماتتار مەن زاڭدى تۇلعالاردىڭ كونستيتۋتسيالىق قۇقىقتارى مەن بوستاندىقتارىن مۇلتىكسىز ساقتاۋدى قامتاماسىز ەتۋى قاجەت. ازاماتتىق ءىس جۇرگىزۋ كودەكسى تەك سۋديالارعا عانا جازىلمايدى, ازاماتتىق سوت وندىرىسىنە قاتىساتىن جاي ازاماتتارعا دا قاتىستى جاساقتالادى. زاڭ انىق بولىپ, قولدانامىن دەۋشىلەرگە ونى اشىپ, وقىعاننان كەيىن ءوزىن پروتسەستە قالاي ۇستاۋ كەرەكتىگىن ءتۇسىنىپ, ءوزىنىڭ قۇقىقتارى مەن مىندەتتەرىن ايقىن ءبىلۋى قاجەت», دەدى. وبلىس اكىمىنىڭ ورىنباسارى مۇحتار جۇماعازيەۆ ءوز سوزىندە وڭىردە سوت جانە پروكۋراتۋرا ور­گاندارىنىڭ ماتەريالدىق-تەح­ني­كالىق بازاسىن نىعايتۋعا جەرگى­لىكتى بيلىك تاراپىنان قولداۋ كور­سەتىلىپ وتىراتىنىن تىلگە تيەك ەتە كەلىپ, دوڭگەلەك ۇستەلگە قاتى­سۋشىلار جۇمىسىنا تابىس تىلەدى. شاراعا قاتىسۋشىلار ازا­مات­تىق ءىس جۇرگىزۋ كودەكسىنىڭ جاڭا جوباسىنا ۇسىنىلىپ وتىر­عان جاڭاشىلدىقتاردى جانە ولاردىڭ ادىلەتتى سوت تالقى­لاۋى­نىڭ قامتاماسىز ەتۋدەگى ماڭىز­دىلىعىن جان-جاقتى تالقىلادى, ءوز ويلارى مەن پىكىرلەرىن ورتاعا سالدى. دوڭگەلەك ۇستەل جۇمىسىنىڭ قورىتىندىسى بويىنشا ءتيىستى ۇسىنىمدار ازىرلەندى. ساتىبالدى ءساۋىرباي, «ەگەمەن قازاقستان». اقتوبە وبلىسى.