كەز كەلگەن جاڭالىقتى سانالى تۇردە قابىلداۋ, تالداۋ ونى دۇرىس قولدانۋ – اقپاراتتىق مادەنيەتتى قالىپتاستىرۋدىڭ نەگىزگى شارتى. بۇل داعدى جەكە ادامنىڭ عانا ەمەس, تۇتاس قوعامنىڭ جاۋاپكەرشىلىگىن بەكىتە تۇسەدى. «اقپارات تاسقىنىنداعى جاس ۇرپاق: قۇندىلىق, تاڭداۋ جانە جاۋاپكەرشىلىك» تاقىرىبىندا وتكەن جيىن بارىسىندا «Qazcontent» اق باسقارما توراعاسى اينا زادابەك ساۋاتتىلىقتىڭ بەس نەگىزگى كلاستەرىن اشىپ ءتۇسىندىردى.
مەدياساراپشىنىڭ ايتۋىنشا, قازىر اقپاراتتىق, ەموتسيونالدى, تەحنولوگيالىق, تايم-مەنەدجمەنت, سونداي-اق جاساندى ينتەللەكتىمەن جۇمىس ىستەۋ گيگيەناسى قاجەت. ال ءماجىلىس دەپۋتاتى ەكاتەرينا سمولياكوۆا بۇگىنگى جاس بۋىن بۇرىنعى ۇرپاققا قاراعاندا الدەقايدا ساۋاتتى جانە كوپتەگەن مۇمكىندىككە يە ەكەنىن ايتتى.
«پرەزيدەنتتىك كادرلىق رەزەرۆ, «بولاشاق» باعدارلاماسىنىڭ كەڭەيۋى, مەملەكەتتىك گرانتتار سانىنىڭ جىل سايىن ارتۋى – جاستاردىڭ ساپالى ءبىلىم الۋىنا جانە قوعام ومىرىنە بەلسەندى ارالاسۋىنا جول اشىپ وتىرعان ىزگى باستامالار. كەيىنگى ەكى-ءۇش جىلدا ەلىمىزگە الەمنىڭ الدىڭعى قاتارلى 20-دان اسا ۋنيۆەرسيتەتىنىڭ فيليالى كەلىپ, تالانتتى جاستاردى ەلدە ۇستاپ قالۋعا مۇمكىندىك تۋعىزىپ وتىر. ماجىلىستە قابىلدانىپ جاتقان جاڭا زاڭدار دا جاستاردىڭ تىكەلەي قاتىسۋىمەن ازىرلەنىپ جاتىر. ماسەلەن, جاساندى ينتەللەكت جانە تسيفرلىق كودەكس بويىنشا جۇمىس توپتارىندا IT-ساراپشىلار, جاس ماماندار, ستۋدەنتتەر دە بەلسەندى ەڭبەك ەتتى. قازىر ساياساتقا جاستاردىڭ كەلۋى قالىپتى ۇردىسكە اينالىپ كەلەدى. باسشىلىق قىزمەتتەر دە جاسارىپ جاتىر. باستىسى – ادالدىق, ءبىلىم جانە ەڭبەكقورلىق. وسى قاعيداتتى ۇستانعان جاسقا بارلىق ەسىك اشىق», دەدى ە.سمولياكوۆا.
ءسوز اراسىندا دەپۋتات تسيفرلاندىرۋ جانە جاساندى ينتەللەكتىنى ەنگىزۋ جونىندەگى ماقساتتاردى جۇزەگە اسىرۋ جاستاردىڭ مىندەتى ەكەنىن اتاپ ءوتتى. الاڭدا مەدياكەڭىستىكتەگى وزەكتى ترەندتەرگە دە ەرەكشە نازار اۋدارىلدى.
نەگىزىنەن «JastarX» جوباسى 2023 جىلدان باستاپ مادەنيەت جانە اقپارات مينيسترلىگىنىڭ قولداۋىمەن «جاستار» عىلىمي-زەرتتەۋ ورتالىعىنىڭ باستاماسىمەن جۇزەگە اسىرىلىپ كەلەدى. بيىل جوبا اياسىندا ءتورت ديالوگ الاڭى ءوتتى. اتاپ ايتساق, «جاڭا بۋىننىڭ قۇندىلىقتارى», «جۇمىسشى ماماندىقتاردىڭ بولاشاعى: ترەندتەر مەن پەرسپەكتيۆالار», «ەڭبەك نارىعىنداعى قازىرگى تەندەنتسيالار مەن جاعداي», «تسيفرلاندىرۋ جانە جاساندى ينتەللەكت». ءبىر ەرەكشەلىگى وسى جىلى جوبا جۇمىسىنا وڭىرلىك جاستار رەسۋرستىق ورتالىقتارى دا قاتىسىپ, تالقىلاۋلارعا ونلاين فورماتتا قاتىسۋعا مۇمكىندىك الدى.
