وتكەن جىلدار ىشىندە تۋرنير جاۋىنگەرلىك سامبو الەمىندەگى ەڭ بەدەلدى جوبالاردىڭ بىرىنە اينالىپ, رەسەي مەن شەت مەملەكەتتەردىڭ ەڭ مىقتى سپورتشىلارىن ءبىر ارناعا توعىستىردى.
رەسەي فەدەراتسياسىنىڭ استاناسىندا جاۋىنگەرلىك سامبو ليگاسىنىڭ گران-پري فينالى ءوتتى. اتالعان دوداعا قازاقستان, رەسەي, تاجىكستان, قىرعىزستان جانە كامەرۋن ەلدەرىنىڭ وكىلدەرى قاتىستى. كىلەمگە الەم چەمپيوندارى, سپورت شەبەرلەرى مەن ۇلتتىق قۇرامالاردىڭ كوشباسشىلارى شىعىپ, جارىستىڭ جوعارى حالىقارالىق دەڭگەيىن ايقىن كورسەتتى.
تارتىستى وتكەن بەلدەسۋلەر قورىتىندىسى بويىنشا قازاقستان رەسپۋبليكاسى ءىىم ۇلتتىق ۇلانىنىڭ اسكەري قىزمەتشىسى — 6697 اسكەري ءبولىمىنىڭ 1-وپەراتيۆتىك ماقساتتاعى باتالونى اۆتوموبيل ۆزۆودىنىڭ 1-اۆتوموبيل بولىمشەسىنىڭ اعا مامانى - اعا جۇرگىزۋشىسى ەفرەيتور مالىك بايسۇلتانوۆ ءبىرىنشى ورىندى يەلەندى. ونىڭ سەنىمدى ونەر كورسەتۋى مەن جوعارى دەڭگەيدەگى دايىندىعى كاسىبيلىك پەن سپورتتىق شەبەرلىكتىڭ جارقىن ۇلگىسىنە اينالدى.
ايتا كەتۋ كەرەك, مەرەيتويلىق تۋرنير جاۋىنگەرلىك سامبو ليگاسىنىڭ باتىل يدەيادان باستاپ, جارىستاردى ۇيىمداستىرۋدىڭ جاڭا ستاندارتتارىن قالىپتاستىرعان تۇراقتى كاسىبي الاڭعا دەيىنگى ءوسىمىن ايقىن كورسەتتى.
ۇلتتىق ۇلان اسكەري قىزمەتشىسىنىڭ حالىقارالىق ارەناداعى جەڭىسى قازاقستان رەسپۋبليكاسى ءىىم ۇلتتىق ۇلانى جاۋىنگەرلەرىنىڭ دەنە جانە جاۋىنگەرلىك دايارلىعىنىڭ جوعارى دەڭگەيدە ەكەنىن تاعى ءبىر مارتە دالەلدەدى.
